01 February, 2017

A Danglam Lo

A Danglam Lo

Hlan lai ahhin ram pakhat ah siangpahrang ih nupi sur mawi zet pakhat a rak um. Siangpahrang ih duhdawt bik mi nupi a si ko nan, siangpahrang fapa, unau le ram dang minung pawl khal in neih ding ah an duh ti a si.

Ni khat cu mifim khawnbawl pakhat in siangpahrang nupi hnenah nikhaw thuhla sim ding in ton a ra dil. Siangpahrang nupi khal in a rak siansak. Siangpahrang nupi cu tidai a bual ttheh pekte a si ih,  a taksa pianthlai cu a hmutu pohpoh thisen soter thei khop in a mawi.

Asinan mifim khawnbawl cun a fimnak thawn a thinlung cu a thunun ih, daite'n siangpahrang nupi cu nikhaw umtudan a sim. Cutikah mifim khawnbawl ngaina le ttihzahtu siangpahrang nupi cun thingthei rah pawl amah rori ih do a duh ruangah cabuai lam ah a va feh. Cu lai ah a hnipuan cu malte an pelh deuh ih thuh ding mi a taksa mawinak tthenkhat cu mifim khawnbawl in a rak hmu ngah kherkher. Cumi ihsi cun a fimnak khal in a thinlung a thunun neh nawn lo ih, siangpahrang nupi ih mawinak zuun tuar in vansang a lam.

Can a rei tikah it thei lo, ei thei lo in a um ih a taksa khal ttumttawl in a harhdamnak tiang a siatsuah thlang. A netnak ah siangpahrang nupi in cumi thuhla cu a rak thei ih, mifim khawnbawl cu siangpahrang inn ah a ko. Cu thluh ah sui khuathai, ngun khuathai le dar khuathai pawl ah tanphaza ti a thletter hai.

Cule, sui khuathai sungih tanphaza ti cu mifim khawnbawl a inter.
"Khawnbawl pa, a thawtnak ziangvek a si?"
"A thur zet, siangpahrang bawinu."

Cu thluh ah ngun khuathai ih tanphaza ti a inter sal.
"Khawnbawl pa, a thawtnak ziangvek a si?"
"A thur zet, siangpahrang bawinu."

A netnak ah dar khuathai ih tanphaza ti a inter lala.
"Khawnbawl pa, a thawtnak ziangvek a si?"
"A thur zet, siangpahrang bawinu."

Cu thluh ah pakhat le pakhat be aw lo in tawkfang sung an um. A netnak ah siangpahrang nupi cun khawnbawl pa hnenah, "Khawnbawl pa, tanphaza ti timi cu a retnak khuathai kan thleng khalle a thur thotho," tiah a sim.

Cumi a theih tikah khawnbawl cu a thir dukdi ih, a thinlung a thunun thei lo mi a vun mangsuak sal. Titsa hiarhalnak timi cu a rong le pianhmang lawng a thleng aw men: theihnak a hloter, fimnak a dalter, thinlung a mawlhter. Hiarhalnak timi hi thluak fimnak thawn kan thunun thei lo ahcun, hiarhalnak ih dung lawng kan thlun vivo pang thei.

Curuangah ruat ttha aw, ralring aw, na hiarhalnak kha sup aw. Tanphaza ti cu ziang khuathai ih a um khalle a thur thotho so khaw!

Credit: Thet Tant Cho


No comments: