13 November, 2017

Na Thiamnak Hawlsuak Lohli Aw

Na Thiamnak Hawlsuak Lohli Aw

Anthony Burgess cu kum 40 a ti kum ah, kum khat lawng a nung thlang ding ti a thei ngah. A thluak ih hmasia a um ruangah kum khat bak nungdam nawn lo ding a si. A do ding mi ral cu a ttihnung zet. A theih pek ahcun a thin a na tuk. A nupi Lynne hrangah zianghman tanta ding a neih fawn lo ruangah a thinharnak a luar cuang.

Burgess hi nunthuleng (novel) ngan ih pumcawmtu a rak si dah lo nan, amah ah cangantu si theinak ding thiamnak a um ti a thei ringring. Curuangah, nuhmei a rung si ding mi a nupi a rung cawmawk theinak ding ah, typewriter ah cahnah a thun ih ca a ngan thok. A ngan mi cu cabu ih suaksaktu  a neih le neih lo ding khal a thei cuang lo. Asinan cumi lo bak cu tuah ding dang a thei fawn lo.

"1960 kum January thla a si. Ka nat zohfelnak ihsin, thlatang le tthaltir lawng ka nungdam ding ti ka thei. Thighnah ttilh can a thlen rual ah ka thi ve ding," tiah a sim.

Cui' a neih mi can malte ahcun Burgess cun taima zet in ca a ngan ciamco ih kum a cem hlan ah nunthuleng panga le hrek a ngan man (Nunthuleng nganthiam hminthang E. M. Forster in a dam sungih a ngan zat deuhthaw, le J. D. Salinger ih ngan zat leh hnih zikte a si).

Asinan Burgess cu a thi lo. A thluak cancer cu mangbangza in a dam sal. Cutin minung dam kum kim a nung ih cabu 70 lenglo a ngan.

Burgess hin cancer ruangah a thi ding timi thuhla rak thei lo sehla cun ca a ngan lo lawlaw tla a si thei. Ziangruangahtile kum 40 a kim tiangah ca a rak ngan cuang lo.

Mi tampi cu Anthony Burgess vek thotho kan si. Kan sungah thil ropi a um nan, a lenglam boruak cakkhai pakhatkhat in lo theih lo ih in nor lawng ah cui' thil ropi cu kan tuah ttheu. Cuvek um lo cun cui' thil ropi cu kan phorhsuak dah lo.

Nang teh kum khat lawng nungdam ding si thlang bang awla, ziangmi na tuah ding? Tu ih na phorhsuah hrih lo mi na sungih thil ropi kha phorhsuak lohli tum aw. Ziangahtile kan nundam ding zat ciah kan thei cio lo.

Hram: Pravs J ih "One Year To Live."


No comments: