Siangpahrang Pakhat ih Duhdawtnak (8)

Siangpahrang Pakhat ih Duhdawtnak

(8)

Thlipi

July thla le August thla ah Wallis le Siangpahrang cu Mediterranean tipithuanthum kiang ih rampawl ah an tlawng. Greece ram ah Tlangbawipi Metaxas thawn an tong aw. Portugal ah Kemal Ataturk thawn an tong aw. Bulgaria ah siangpahrang Boris thawn an tong aw. Asinan cui' kum Tthal ih thuthang lar zet pakhat cu Edward ih hnipuan hruhdan sawn a si. Athens ihsi Istanbul an fehnak zin ah siangpahrang cun kor hlit in ni hlum a ai. Nikhua a hlum ruangah minit hra a rei tikah a itthat. Curuangah zuk zuktu mino pakhat in a rak zuk lai kha a thei ngah lo.

Mediterranean tipithuanthum ihsi Edward a ra tlun tikah ca pakhat in a rak hngak.

Ca cu Burmingham ih um Mr. Albert Thompson hnen ihsin a si. Ca sung ih a ngan mi cu, "Bawipa, tuizng thuthangca pakhat ah na zuk pakhat ka hmu. Ka thin a heng nasa. Siangpahrang pakhat in duhdah zet ih hnipuan a hruh lai hi vei khat hman ka rak hmu dah lo. Shirt kor hruh lo, necktie orh lo, kedam hruh lo, lukhuh khum lo hlei ah, bawngbi tawi lawng hruh bet. Ziangruangah hivek a cang, Bawipa?"

Edward in cui ca cu Tlangbawipi Stanley Baldwin a hmuh ih, "Himi ca hi ziangtin na ruat?" tiah a sut. 

"Mr. Thompson ih rel mi kha a dik, Bawipa. San thar nun ih nun na duh nan, cumi cu mipi in an duh lo," tiah Tlangbawipi in a sawn. 

Edward in ca cu meisa thawn a ur.

"Cuti asile tthenawk hi the san thar cindan a si maw, Mr. Baldwin?"

Tlangbawipi cu a to ih, a ttong thok.

"Si ko, Bawipa. Mrs. Simpson ih thuhla hi ka rak siar ngah ve. Pasal pahnih a nei ih, an pahnih in an nungdam lai. Bawipa, himi hi ziangvek sullam a nei timi na theihthiam a ttul in a lang. Anih cu siangpahrang pakhat thawi' kutsih theih a si lo."

"Asinan ka hrang ahcun anih cu um lo theih lo a si," tiah Edward in a sawn.

"Bawipa, cuti a si ahcun thlipi pakhat a ra hrang leh ding ti cu ka hmu thok thlang. Na innsang, Archbishop le kei kan relkhawm zo. Hi nu hi kan siangpahrangnu ding ah kan cohlang lo."

Cumi zan ah Tlangbawipi le Siangpahrang cu nazi tawkfang rei sung thu an rel tlang. Thusuhnak cu tampi um hman sehla a sonnak cu pakhat lawng a um. Cutin a thaizing khawvan rual ah Edward cun, "Wallis in siangpahrang a nei thei lo na ti. Cuti a si ahcun ka tuah thei mi cu pakhat lawng a um. Cumi cu siangpahrang sinak hi ka nau hnenah hlan in England ihsin ka suak ding. Ka thinlung dung sawn ka thlun ding. Pakhat le pakhat duhdawtawk hi sualnak pakhat a si tiah I sim. Aipuannak timi hi thil dik lo pakhat na ti. Hi ram hi ziangah hitluk lawmam in a dnaglam?"

Nazi pakhat a rei tikah Edward in Wallis a phone.

"Tlangbawipi in thlipi pakhat a ra hrang thlang ding a ti. Curuangah hitawk hmun hi suahsan awla ka duh," tiah Edward in a sim.

Wallis cun a thilripawl a cingfel khawm ih France ram a pan.

Cuihnu ah Edward cun a nu a va tong.

Tui ttum an tonawk cu lungngai riahsiatnak, hmuh mikhualawknak, thinhengnak meikhu pawl in a luah khat.

"Ziang ka tuah ti the na thei aw maw? Tukverh lenglam khi zoh hnik. Siangpahranginn lenglam ih minung million 400 in Siangpahrang Bawipa tiah an lo ko. Nangmah an lo ttul. Nang cun Mrs. Simpson pakhat lawng hrangah ziangkim na tansan ding tinak maw?" tiah siangpahrangnu cun a sut.

"Aw, si, ka nu.Anih cu ka duh taktak."

"Duhdawt maw?" Siangpahrangnu Mary a kawk. "Siangpahrang pakhat na si hi. Na duhdawt hmaisabik ding mi cu na ram hi a si."

"Asinan kei khal mipa pakhat ka si ve.Tingaihnak dang ka thei ve lo," tiah Edward cun nemte'n a sawn sal.

Cumin i, simlam ah Siangpahrang cun a rualpi komngaihbik Winston Churchill a phone.

"Thuthang sia pakhat ka lo sim ding. Mizan ah Mr. Baldwin in i ra tong. Hmai zarh ah hitawk suahsan ding in ka ruatcat zo," tiah Edward in a sim.

"Tlawnvah ding maw na rel, Bawipa?"

"Si lo, Winston, England suahsan ding thus i ka rel. Ziangtik hman ah ka rat lung sal lo ding. George in siangpahrang a ttuan ding."

"Cuvek cu a cang lo ding, Bawipa. Mi zalen pakhat na si si, anmahpawl na hmaton thei ve ko."

"A cang lo.Ralbuai ka rak hmu dah.Ttih a nung tuk.Zo thawn hman in doawk ka duh lo."

"Asinan mipi in an lo ngaina si lawm, Bawipa. Mipi in Wallis siangpahrangnu ttuanter an duh."

"An ngaina ko nan Wallis cu siangpahrangnu ttuanter a ngah lo. Ka ral hi kei hnakin an thazang a cak sawn. Kei cu long hlautu ve meimei ka si. Thli hrandan a thlengawk vete'n ka long cu tisuar fawn pawl in an sep let mei ding."