Billy Graham ih Thucah Pakhat
2000 kum January thla ahkhan Sakta Carolina ramkulh, Charlotte khawpi ih hruaitu pawl cun an uar zet mi Billy Graham cu amah sunlawihnak suncaw ruai an tuahmi ra telpi ding ah an sawm.
Dr. Graham cun ttawnttaih tha-thir nat (Parkinson's disease) a neih ruangah an sawmnak cu el a tum lawk. Asinan Charlotte hruaitu pawl cun, "Thucah pipa kan beisei lo. Ra awla kan lo sunlawih ding ih a tawk ko," an ti ruangah a cohlang sal.
Suncaw ruai ahcun Dr. Graham faknak thuhla phunphun an rel. Cu thluh ah Dr. Graham cu donhlei (rostrum) ah a va feh ih mipi a zoh hai hnu ah, "Tuini ah physics mithiam ropi Albert Einstein thuhla lo ruah sal ka duh. Anih hi tui thla ah Time Mekazin in 'Zabi huap Mitling' (Man of the Century) tiah sunlawihnak an pe."
"Einstein kha vei khat cun Princeton ihsin tlangleng a to. Tawkfang ah tlangleng ticket khongtu a ra ih tlangleng totu pawl hnen ihsin ticket a khong. Einstein hnen a thlen tikah Einstein cun a kor zal a pur. Ticket a hmuh lo ruangah a bawngbi zal pawl a pur sal. A um cuang lo. Curuangah a khaibawm ah a vun hawl nan a hmu cuang lo. A sir ih tohkham khal a zoh nan a hmu fawn lo.
Ticket khongtu cun, "Dr. Einstein, zo na si ti ka lo thei. Kan zate'n kan lo thei thluh. Ticket na lei ding ti cu ka ringhlel lo. Ruat buai duh aw hlah," a ti.
Einstein cu lungkim zet in a lu a su. Ticket khongtu cu mi dang pawl hnenah feh in ticket a khong peh. Pindan dang a feh zawng ih a ra hoi kir tikah Einstein cu a khuk le kut thawi' zial nam in a tohkham hnuai ih ticket a hawl rero ti a hmu.
Ticket khongtu cu a ra kir vurvo ih, "Dr. Einstein, Dr. Einstein, phang aw hlah. Zo na si ti ka lo thei. Buainak ding a um lo. Na ticket ka hmuh kherkher a ttul lo. Na lei ding ti ka thei si lawm," a ti.
Cutikah Einstein cun a hun zoh ih, "Naupa, kei khal in zo ka si ti cu ka thei. Ka theih lo mi cu khuiah ka feh timi sawn a si," tiah a sim.
Cumi a sim ttheh ah Billy Graham cun, "Ka hruh mi thuamhnaw hi nan hmu maw? A thar a si. Ka tu le fa pawl in ka tar hnu cun ka hnipuan hruhdan a mumal lo deuh thlang tiah in sim. A hlan ahcun hnipuan hruhdan duh uluk zet ka si. Curuangah a leng ah ka suak ih, tuini suncaw ruai hrangah le ni thupi dang pakhat hrangah thuamhnaw thar ka va lei."
Ni thupi dang pakhat ka timi cu nan thei maw? Phum ka si can a si. Asinan ka thih thu nan theih tikah, ka hruh mi thuamhnaw nan mansuah hmaisat cu ka duh lo.
Nan cinken ding ih ka duh mi sawn cu:
"Kei cun zo ka si ti ka theih lawng si lo in, khuitawk ah ka feh ti khal ka thei."
....................
Billy Graham hi Protestant santhuanthu ah leitlun mipi hnenih Pathian thucah sim tambiktu a si. A zung hnattuantu pawl ih simdan in, 1993 tiang hman ahkhan, minung million hnih le hrek cu Billy Graham ih crusade ah "Anmah Rundamtu ih Jesuh Khrih cohlang ding in hmailam ah an ra suak." 2008 kum ahcun Graham ih thucah ngaitu mipi cu, radio le television ihsi ngaitu tel in, billion 2.2 an kim. A website ih na len duh asile hinah: www.billygraham.org
Hram: "Billy Graham's Einstein Speech"
18 February, 2016
Billy Graham ih Thucah Pakhat
Subscribe to:
Post Comments (Atom)
No comments:
Post a Comment