90/10 Kalhmang

90/10 Kalhmang

90/10 kalhmang hin na nun a danglamter ding. (A si lo bik in, thil na khirhkir dan cu a danglamter ding).

90/10 kalhmang timi cu ziang a si?

Na hringnun 10% cu na hualvan ruangah a si.

A dang 90% cu na khirhkir (respone) dan parah a tthum aw.

A sim duh mi ziang a si? Hualvan ruangah a ra cang mi 10% cu kan control thei lo.

Mawttaw siat, vanzam khelh lo, mawttaw cepther tuk tivek pawl cu kan control thei lo. Asinan a dang 90% cu kanmah in thutluknak kan tuah thei.

Ziangtin thutluknak kan tuah ding? Na khirhkir sal dan ah a tthum aw.

Lamzin meisa a sen mi kha cu na control thei lo. Asinan na khirhkir dan cu na control thei. Midang in duhtawk ih an herhawi thei mi va si aw hlah. Na khirhkir dan ding cu nangmah in na control thei a si.

Tthimnak ah:

Nan innsang in thawhhlam nan ei. Na fanu te in na angki parah khawfi a fuanter pang. Cumi cu na control thei lo mi thil a si. Asinan a lehhnu ah ziang a cang ding timi cu na khirhkir dan ah a tthum aw.

Na kawk thok. Na fanu cu na kawk ciamco. Na fanu a ttap. Cu thluh in na fanu na kawknak cu na nupi lam ah na her. Cabuai kap tuk ih khawfi no ret ding a si lo ti'n na kawk. Cutin, thukam elbuaiawknak a ralbuai te a suak. Thinheng zet in inn tlunta pindan ah hnipuan na hung thleng. Inn hnuaita dot na rung thlen tikah ttap phah ih rawl ei rero na fanu te cun tlawng feh a timtuah. Asinan Bus a feh liam zo.

Na nupi khal hnattuan ah zamrangte'n a feh. Mansahlap in na fanu tlawng na va thlah. Office tlai na phan ruangah nazi pakhat peng 30 lawng khalhnak ding ah peng 40 in mawttaw na khal. Mawttaw khalh cak luan ruangah cawhkuan na tuar. Tlawng nan thlen tikah minute 15 a tlai zo. Na fanu khal in lo 'sunttha' man nawn lo in tlawnginn sungah a tlan lut cih. Office na thlen tikah nazi 9:20 a si zo. Office na thlen hnu lawng ah na kut-khai dip na hngilh thu na mangsuak. Na hrangah ni ttha lo zet a si. Tuini cu ka va van se ve ti'n inn ih tlun lawnglawng na hiar men. Asinan inn na thlen sal khal ah na nupi le fanu thawi' nan karlak ah a kekkuai mi thil fatakte a um thotho ding.

Ziangruangah? A zate'n zinglam ih thuhla na khirhkir dan ruangah a si.

Ziangah cuvek ni siava ah a cang?

(1)   Khawfi ruangah

(2)   Na fanu ruangah

(3)   Traffic police ruangah

(4)   Nangmai' ruangah

Sonnak dik cu nambat (4) a si.

Na fanu ih khawfi fuanter pang mi ahkhan na control aw thei lo. Cumi ruangah minute 5 sungih na khirhkir dan kha na hrangih ni siava um thokter tu cu a si.

A hnuai ih ca hi na hualvan na thlengter thei hnu ih na ngah mi rahsuah a si.

Na taksa parah khawfi a bung. Na fanu cu a ttap zik zo. Cutikah zaidamte'n, "Duatte, zianghman a cang lo, lehhnu ahcun ralring awla si ko," ti phah in hrukpuan na la ih inn tlunta dot ah na kai. Hnipuan thleng in office feh ding ah inn hnuaita dot ah na ra ttum. Tukvirh lenglam na hei zoh tikah na fanu cu tlawng bus sungah a thleng zo ih a kut zap in a lo bye-bye rero. Office ah minute 5 tuan in na thleng ih na hnattuanpi pawl nel zet in na be hai. Lungawinak thawn a thok mi na ni thar cu na tlunlam upa in hmat ttha a pe.

Ziangmi a danglam ti na hmu ngah zo maw?

A thoknak a bang aw nan, a cemnak a bang aw lo mi ih danglamnak cu ziang a si pei? Nangmai khirhkir dan ruangah a si.

Hualvan ruangih a cang mi 10% cu na control thei lo khal a si thei. Asinan a dang 90% cu na khirhkir dan in lai a rel ding.

9/10 kalhmang a tak ih hman theidan tthenkhat vun tarlang sehla.

Mi in an lo soisel tikah tidai a hawp ttheutu 'ti-hawp puan nem' vek in um hlah aw. An lo dodalnak, soiselnak pawl kha thlalang parih tidai vek in luang lanter men aw. A selam soiselnak pawl thawn ttawnttem aw hlah aw.

Khirhkirnak ttha in na ni le thla an siatsuah lo. Khirhkirnak dik lo cun rualpi a lo sungralter, na thin a tawiter, thinlung delhrittu a lo neih tamter ih na thawthawt a harter.

Lamzin ah mawttaw an khat tuk ih na feh lohli thei nawn lo tikah ziangtin na khirhkir ding? Na thin a heng ding maw? Ti bupbo in mawttaw khalhnak na cum ciamco ding maw? Ka rualpi pakhat cu mawttaw khalhnak phong tiang in a cum dah. Na camriam ding maw? Na luthlung tiang na thisen thleng thluh ko in na buai ding maw? Mawttaw dang pakhatkhat pah hrim duhnak thinlung na nei ding maw?

Second 10 men office tlai ruangah zo in a lo kawk cuang ding? Mawttaw khah tuk ruangah tthatei' mawttaw na khalh dan ziaza cu na siatralter ding maw?

Thinhar hlah aw. 90/10 kalhmang vun mangsuak ttheu aw.

Hnattuan ihsin banter na si thu an lo theihter thlang. Ihthah thei lo ruangah ziangah na thin a heng ding? A thleng zo mi thil ruangih thinheng rero hnak in, cumi hrangih na hman ding mi thazang le can kha hnattuan thar hawlnak hrangah hmang sawn aw.

Vanzam a pok tlai ding ruangah na ruahman cia mi khualtlawnnak pawl an buairuai ding. Ziangruangah na thinhengnak, lungawilonak pawl vanzam hnattuantu pawl parah na thlenter ding? Cumi thleng lo ding in an tuah thei mi zianghman a um cuang lo.

Cumi ruangih thinheng le phunciar hnak in ca siar san men sawn aw. Asilole khualtlawnpi midang pawl thawn rualpi ah tuah sawn aw. Na thin a heng, na hngir a tteu ahcun na ni hman mi kha a bese sinsin sawn ding.

90/10 kalhmang na theihtiam zo ahcun tu ihsin a tak in hmang aw. Mangbangza rahsuah danglam na ngah ding. Himi na hman ruangah zianghman na sungral lo. 90/10 kalhmang hi zum ban rual lo khop in thil a ti thei. Asinan mi malte lawng in a hmannak cang an thiam.

Minung million tampi cu tuarnatnak, hniksak tuarnak, buaibainak le lungngainak sungah an phum lut aw. Curuangah 90/10 kalhmang hi theithiam in a tak ih kan hman a ttul.

Himi kalhmang hin na nun zalam tluan a danglamter thei.

Leitlun ih neihsiah thilri 80% cu minung zatek 20% in an hawlhmu ih an co zo. Minung zatek 80% in a dang neihsiah thilri 20% an cuh aw rero. Minung 80% cun ni tinte'n nasa tak in an cuh aw rero nan duh khop ti an nei lo. Neihsiah thilri 20% sung ahcun an talbuai rero. Nangteh ziang zat na cuh ngah ve na zum?

90/10 kalhmang hi hmang thok aw. Cu lo ahcun ni riahsiatza sungah kumkhua in na pil ringring pang ding.

Ngantu: Stephen Covey (Discover The 90/10 Principle)

Lehnak: Nine Nine Sanay ih "90/10 Niyama."