Bawipa Ka Duhdawt Taktak Maw?

Bawipa Ka Duhdawt Taktak Maw?

Ni khat cu zing ni suak zoh ding in zingpit te ah ka tthangharh.

Pathian ih sersiam mi a mawizia cu sim thiam rual lo a si.

Ka zoh phah cun, a kutsuak mawinak ruangah Pathian ka thangtthat.

Zing ni suak zoh ih ka to lai ah ka hnenah Pathian a um ti ka thei.

Pathian cun, "I duhdawt maw?" tiah i sut.

Kei in, "Duhdawt tuk e, ka Pathian! Ka Bawipa le Rundamtu na si!" tiah ka sawn.

Cutikah, "Na taksa ruangpum ah tlaksamnak um sehla i duhdawt lai pei maw?" tiah i sut sal.

Ka thinlung a cau ruahro. Ka kut, ke ke le ka taksa ruangpum dangdang ka vun zoh. Tlaksamnak um sehla ka tuah thei lo ding  mi a tamzia ka vun ruat. Cu thluh in, "Bawipa, ka hrangah tuar har zet a si ding, sihmansehla ka lo duhdawt thotho ding," tiah ka sawn.

Cu thluh ah Bawipa in, "Na mit caw bang sehla, ka sersiam mi pawl hi na duhdawt lai pei maw?" tiah i sut sal.

Ziangtin ka hmuh thei lo mi cu ka duhdawt ding? Asinan leitlun ah mitcaw ziang tluk in an tam ih, an lak ih mi tampi cun Pathian le a sersiam mi pawl an duhdawt thotho timi ka vun ruat.

Curuangah, "A ruat men hman ah a harsa zet ko, asinan ka lo duhdawt hrih thotho ding," tiah ka let.

Cu thluh ah Bawipa in, "Na hna set sehla, ka thu na ngai thotho pei maw?" tiah i sut sal.

Ka hna a set ahcun ziangmi ka ngai thei ding? Asinan ka vun theithiam sal. Pathian ih Aw ngai timi cu hna ih theih men lawng a si lo, thinlung ih donson ding a si. Curuangah, "A har ka ti zet ding, asinan Na thu cu ka ngai thotho ding," tiah ka sawn.

Cu thluh ah Bawipa in, "Ttng thei lo si bang awla, Ka hmin na thangtthat thotho pei maw?" tiah I sut sal.

Ttong thei lo cing cun ziangtin ka thangtthat thei ding? Asinan Pathian cun ka thinlung le thlarau taktak thawi' zaihla kan sak a duh ti ka vun ruat. A suak mi awn cu ziangvek a si khal ah a poi lo. Cun, Pathian thangqhat timi cu hla lawng in a si lo, hrem kan tuar can khal ah lungawithu simnak thawn Pathian kan thangtthat thei thotho. Curuangah, "Aw suak ih hla ka sak thei lo khal ah, Na hmin cu ka thangtthat thotho ding," tiah ka let.

Bawipa cun, "I duhdawt taktak maw?" tiah i sut sal.

Huaisennak le thutluknak hngetkhoh zet thawn, "Aw, Bawipa! Pathian taktak na si ruangah ka lo duhdawt," tiah ralttha zet in ka sawn.

Keimah cun ka thulehnak cu ttha zet ah ka ruat. Asinan Pathian cun, "Asile, ziangruangah sualnak na tuah thotho?" tiah i sut sal.

Kei cun, "Milai men ka si. Mi tlamtling ka si lo," tiah ka let.

Pathian cun, "Asile hnangam daihnak na ngah can ah keimah thawi' a hlatbiknak ah ziangah na feh? Ziangruangah harsatnak na ton can lawng ah nasate'n thla na cam ttheu?" tiah i sut sal.

Ka let thei lo. Ka mitthli an tla.

Bawipa cun, "Ziangruangah pawlkomawknak le khawmpi lawng ah hla na sak? Ziangruangah biakkhawm can lawngah i hawl? Ziangruangah hamttam zet in thil i dil ttheu? Ziangruangah rin um lo zet in thil i dil ttheu?" tiah i sut peh.

Ka biang ah mitthli an lung rero.

"Ziangruangah i zahpi ttheu? Ziangruangah thuthangqha na karhzaiter lo? Hremnak na tawn lai ih lo thiar ding in ka liang ka lo tun can ah ziangruangah mi dang hnen sawn ah bomnak na dil? Ziangruangah ka hmin ih hnattuannak ding canvo ka lo pek can ah puhmawh na hawl?"

Son sal ka tum. Asinan a soonnak ding ka nei lo.

"Nunnak nei ding ih thlawsuah mi na si. Himi nunnak laksawng hi hlawn hlo men ding ih ka tuah mi a si lo. Ka hna ttuan thei ding in talent ka lo pe, asinan lamzin dang ah na feh san hrih thotho. Na hnenah ka Thu ka phuang, asinan fimnak ah na hmang cuang lo. Na hnenah ka ttong, asinan na hna na phit. Ka thlawsuah ka lo hmuhter, asinan na mit in khawdang an tan san. Hnattuantu ding ka lo pe, asinan zangzel zet ih na to cuahco ruangah an lo tlansan thluh. Na thlacamnak hmuahhmuah ka thei ih, ka lo sang thluh a si."

"I duhdawt taktak maw?"

Ka let thei lo. Ziangtin ka let thei ding? Rel ban rual lo in ka ning a zak. Puhmawh ding ka nei lo. Rel ding ziang ka nei nawn ding? Thinlung sungih ttah aihramnak le mitthli thawn, "Bawipa, in ngaithiam aw. Na fa si ding ah ka tling lo a si," ka ti.

Bawipa cun, "Khami kha ka Lainatnak a si, ka fa," tiah i sawn.

"Ziangruangah i ngaidam hrih thotho? Ziangruangah hitluk lawmam in i duhdawt?" tiah ka sut.

Bawipa cun, "Ka sersiam mi na si ruangah a si. Ka fa na si. Ziangtik hman ah ka lo thlahthlam lo ding," i ti.

"Na ttah tikah, ka lo lainat ding ih ka lo ttahpi ding.

Lungawi aipuang ih na au tikah, ka lo hnihpi ding.

Na bei a dong tikah, tha ka lo pe ding.

Na tlukbah tikah, ka lo tungding ding.

Na bangcau tikah, ka lo thiar ding.

Ni netabik tiang in na hnenah ka um ding ih, kumkhua in ka lo duhdawt ding."

Cumi ttum tluk in vei khat hman ka ttap dah lo. Ziangtluk in ka lung a rak ruh? Ziangtluk in Pathian thin natertu ka rak tuah tam? Ka vun ruat tikah qap lo thei ka si lo.

Pathian hnenah, "Bawipa, ziangtluk in i duhdawt?" tiah ka sut.

Bawipa cun a ban a phar. Cutikah tlawngkhen ih khennak hma pawl ka hmu. I Rundamtu Khrih ih ke hram ah ka lu ka kun. Cutin, thlacamnak taktak hmaisabik ka nei.

#Inspire21 ih "One Day I Woke Up."