Tawh cun Tawhfung A Nei

Tawh cun Tawhfung A Nei

“Nun hlawhtling na ngah duh ahcun hlawhtlinnak ding tawhfung pawl khimkhuahtei’ na hawlhmuh thiama  ttul,” i rak ti lai ah Nunui’ ttongkam cu tthate’n ka rak theithiam lo. “Cun, na ngah duh mi hmuitin in lamzin na hawl thiam a ttul. Thanaunak thinlung tivek nei aw hlah,” in rak timi khal ka nauhak tuk lai ruangah ka rak theithiam lo.

Cumi lai cu Lailak Tlawng ka ttheh ih Sang Tlawng ka kai ding kum a si. Kum 13 ka luan thok lai a si. Papa in cem net nei lo khuallam hla in tlawnsannak tla a rei hrih lo cuh! Papa a um lai ahcun ka u-pa thawn thuanthum in sim, mathematics in zirh ih kan nuam aw thei zet. Nunu khal in ka duh zet mi tanphaya ciah kaikuang in tuahsak ttheu. Ka rak nuam aw tuk. Papa a um nawn lo hnu cun kan unau in ka tha a nau sualso. Nunu a um lai ih kan remcang thei fang. Nunu cu Papa vek in cepoh hnihsuak sai a nei lo nan, mithmai hnget le awka thlum a nei. Nunu cun ttong hleifuan a ttong dah lo. A ttong tikah thungaile sunsak zet in a ttong ttheu.

Papa a um nawn lo hnu cun kan inn kan zuar ih hmun dang ah kan tthawn. Inn thar ah kan thleng. Thilri kan thiar ih kan rem thluh cun kan sungkua in kan bang zet thlang. Cumi caan ah ka thaw a sat ruangah bual-inn (bathroom) ah lut in ti ka bual. Ka u in ei ding a va lei ih, Nunu cu kan inn kiangkap leiram pawl a zoh vivo lai ah a si.

Ti ka bual ttheh in bual-inn sangka kutkaih ka herh. Aizelaw.....Pathian ee! Sangka kutkaih ka herh cing in sangka cu a ong aw thei lo. Ka herh bet rero. Asinan a hnin hman a hnin lo. Ka thin a phang tukih ka tha suah in ka herh. A ngah cuang lo. Cutikah tidai bual ttheh pek ka si nan, ka thlan an hung pawt sal. Ttihphannak ruangah ka hit thluh. Thinphang zet in Nunu ka hei auh. Hmuan deng ih thleng zo Nunu cun ka aw cu a thei lohli lo. Curuangah sangka cum ciamco phah in Nunu cu ka ko rero.

Cu hnu lawng ah Nunu in a thei ih, “Nute, ziang na cang?” ti phah in bual-inn lam ah a ra tlan. Nunui’ aw ka theih cun ka lung a zur ih aw suak in ka ttap. Nunu cun ‘ziang na cang, ziang na cang?” tiah vei tampi i sut bet. Ka ttihphannak le riahsiatnak ruangah sawn sal thei lo in ka ttap rero men. “Amy....ziang na cang? Sangka ong hnik!” tiah Nunu in thinhar aw thawn i run sut.

Cumi hnu lawng ah, “Sangka on a theih lo i......hih..hih...” tiah ka ttap bet. Nunu cun a theithiam ih, “Na thinlung kha ret dai hnik, Nute. Thin le ham kai aw lo ih na buai cun ziangtin na tuah ding mi na ruatcat thei ding? Na thin daite’n ret aw,” tiah i run sim.

Kei khal Nunu a ra thlen ruangah malte ka thin a dai deuh thlang. Cutin, sangka kutkaih cu ka herh sal. Asinan a ngah cuang lo. Nunu in, “Sangka kutkaih kha vorhlam ah maw, kehlam ah si na herh?” tiah i run sut sal.

“Vorhlam ah si, Nunu. Hmaisa bual-inn khal ahkhan vorhlam ah kan herh kha, Nunu. Cutin ka herh nan a ngah lo. Ziangtin ka tuah ding? Sobul thawi’ sut on a ttul ding a bang Nunu. Sobul in va lak aw,” tiah ka let.

Nunu in, “Sangka a onawk lo cun ziangtin sobul ka lo pe thei ding?” i run ti tikah ka bei a dong. Asinan Nunu in, “Vorhlam ih herh a theih lo len kehlam ah herh hnik,” i run ti. Kehlam ih ka vun herh tikah sangka cu ‘ku-ruk’ ti’n a ong aw cih. Cumi lawng ah ka thin a dam sualso.

Nunu in, “Kha si ko. Hringnun ahhin ziangvek harsatnak khal si sehla, thin daite’n hmunkip ihsi ruat a ttul. Pakhat a ngah lo tikah a dang pakhat ruat aw. Nun harsatnak lak ih hlawhtlinnak cu a pehpar mi pawl ruat kaikawh vivo ih tuahnak ihsin ngah mi a si. Harsatnak ah tthum aw in ruat hlah, harsatnak cemternak ding ah tthum aw in ruat sawn aw,” tiah i sim.

Tu ahcun nun hlawhtlinnak hrang thuron petu ka si zo. Nun hlawhtlinnak tawhfung tampi cu Nunu ih i rak kawhhmuh mi an si. Cumi thu Nunu ka sim tinte’n Nunu in, “Ruat kaikawh vivo ih cinfel thiam hi hlawhtlinnak ih tawhfung a si,” ti’n kum 75 pitar aw tthia derdo thawi’ i sawn phah in a hni-no ttheu.

#Dr. Abel ih “A Lock has A Key”, Irrawady ih Naing Suan ngan mi Nun Hlawhtlinnak Cahram -17 ihta.