Duhdawtnak Cu...

Duhdawtnak Cu...

(1)

A leng ah mipa dang pakhat a ton ruangah a pasal thawn ihkhun pakhat ah a it paih nawn lo. Bizu sungih puan le lukham thar a phorh ih ihkhun dang ah a it. Amah lawng a si ruangah a khua a sik tuk ih, ihkhun parah cun a khur rero. A pasal cu a kiang ah a ra lohli ih amai sin mi puan a sinter bet.

Cu thluh ah, "Mi aa nu te, tuihlan ah nang hnakih ka ih tuan ttheunak cu ka taksa thaw thawn puan ka rak hlumter cia duh ruangah sokhaw. Thinphang hlah, na sin mi puan ka lo laksak lo ding," tiah a sim. A thinlung a tii-ral.

A thaisun ah a leng ih a ngaizawng thawi' an tonawk tikah hitin a sut.

"In duhdawt maw?"

A sut thutthi ruangah a anhai lawk.

"Mmm...aw. Duhdawt e."

"Cuti asile ka sin ding mi puan na hlumter ttheu pei maw?"

A anhai sinsin.

"Ziangtin maw...ziangmi cu?"

Sangka a ong ih vei khat a vun ttong ta hnu ah a feh.

"Tuini hi kan pahnih hrangih ni netabik a si. Bye."

(Duhdawtnak cu taksa thaw hlum te pakhat a si)

(2)

Mawttaw a khalh tikah a ruahnak a vavai buai ol zet. Zung ihsi a ra tlun phah ah a um a har ih a pasal a phone. A pasal a phone tinte'n a pasal cun "Aw" ti lo bak a ttong dah lo. Curuangah phone a thlak ih, a tlawngkaipi mipa pakhat a phone.

An thu a feh tluang vivo ih, khatlam ihsin velthem anka tiang a hung thlen tikah a thinlung a buai ih a mawttaw a cangsual phah. Zato (hospital) ah a pasal in sunsun zanzan in a tuamhlawm. A lung a hung fimharh tikah a kut kai phah in a pasal in hitin a sim.

"Ziangah hitluk in na daithlang? Mawttaw na khalh lai ah ttongkam khat bak ka ttonglonak san cu hivek ih na cangsual ding ka phan ruangah si lawm. Na thinlung a buai ol zia hi ka thei lo ah na ruat maw si?"

A pasal ih kut cu hnget zet in a hum. A biang ah mitthli hlum an rung luang. A awm sung a hlum.

(Duhdawtnakcu ttongkam kam khat bak ttong lo mi khi a si)

(3)

Zan ih zawng ah a pasal a sut.

"Kan hung upa vivo ding ih kan pahnih ah pakhat thi ding si bang sehla, zo thih hmaisat sawn na duh?"

"Keimai' nupi ka thiter hmaisa ding."

"Nge...na thinlung a va siava ve. Ziangah maw?"

"Ziangahtile keimah tel lo in nangmah lawng umhar zet ih ni khat hnu ni khat na run hman ding ka duh lo. Curuangah cuvek harsatnak cu keimah sawn i tuarter aw."

"Aw, cuti maw? Asile tuamhlawm dam theih lo nat sia rak ngah bang ta awla teh?"

"Aaa... it thlang aw. Ih zawng ah thil si lolo na rel rero."

"Aih..a ngah lo. In sim ta aw. Si bang sehla ka timi a si kha."

"Cuti a si ahcun ka tuamhlawm aw nawn lo ding."

"Ziangah maw?"

"Nangmah lawng na rung tan ahcun na hrangah paisa run hawl sal a har tuk lo ding maw?"

(Duhdawtnak cu mah harsat khal ah nangmai' zawn lo ruat sawntu khi a si)

(4)

Apple a ngaina zet. A pasal in ni tinte'n apple pahnih a zelh ttheu. Pakhat veve an co. Anih khal in cumi cu a romantic ti'n a ruat ih a ngaina ve. Asinan a duh lo mi pakhat cu a pasal in apple pahnih cu kawh khat veve a kawh ta hnu lawng ih a pek ttheu mi a si.

Cumi cu sut a duhnak a rei zet thlang nan a sup aw. Ni khat cu a pasal in phone a va kaih lai ah cabuai parih a tanta mi a apple cu kawh khat a kawh sak. Cui' apple cu amai' ei ttheu mi apple tluk in a thlum lo. Cutikah a biang ah mitthli hlum te an rung luang.

(Duhdawtnak cu na hrangah a ttha sawn a lo pek mi kha a si)

(5)

A pasal in, "Ka bawngbi zalte ah mutthai (sweet) paziat a um na zum?" tiah a sut.

Anih in, "Ka zum dik len i pe ding maw, rel ta aw?" a ti ve.

A lu su phah in, "Na zum dik ahcun pahnih ka lo pe ding," a ti.

A cil dolh phah in, "Panga a um," a ti.

A pasal cun hni phah in a kut ah mutthai a pe ih, "Pathum ka lo bak," a ti.

(Duhdawtnak cu na duhamnak fatakte tiangih lo phuhruksak mi khi a si).

(6)

Tohkham parah putar pakhat cu tha thlah sialsial in a cawl. Pitar pakhat in putar ih kut cu ra kai phah in hitin a sim.

"Papi, ngaidam lo dil ding pakhat ka nei. Khami kum ahkhan ka sentecai in i ra hawl. Ka lo duh lai i ti. Keimah ra hruai ding ih ra a si thu i sim. Kei khal in khami lai ahcun ka rak duhdawt lai a bang. Curuangah amah thlun ding ih thilri timtuah ding in ka ra tlung. Inn sung ka lut tikah coka ih arsa uam na rak suan rero lai ka lo hmu. Nangmah hman in 'Tulai na thinlung a buairuai ruangah, thazang nei ding in ka lo suansak' i ti kha. Khami ahkhan ka pindan ah tlan lut in ka ttap ciamco. Cumi ihsin ziangtik hman ih lo tthen lo ding in thutluknak ka tuah."

Putar cun a mit bi curco ko ih hni phah in a sawn.

"Nupi, khami kha a tir lam ihsin ka rak thei. Nan kutawk mi ca pawl a thupte'n ka rak siar. Khami arsa uam khal kha na feh thlang ding ti ka theih ruangah, a netabik hrangah na hrangih ka lo tuahsak thei mi umsun a si ti ih ka lo tuahsak mi a si. Pum sungah rawl um lo khal sehla arsa uam ti na in ahcun mawttaw rit malte a zia-um deuh ding si lawm. Na nauhak lai ah mawttaw na ri thei zet si lo sawm?"

Pitar ih hmaivun kir zo cu mitthli thawn a ciar thluh. Malte a rei hnu ah pitar cun a sim sal.

"Papi, ka dam sungih ka thil tuah dik bik cu khami kum ih ka rak lo tthen lo mi kha a si."

Credit: Aung Min Thein