Midang Fanu Ngaidam Ve Aw
Rawl dawr ih kan tonak cabuai ttuanvo latu nute cu a kum a no lai zet. Amah ka hminsinnak san cu hna a ttuan dan ah ti cuapco in a um ih a thiam hmel lo ruangah a si. Tihang a rak ret lai ah ka taksa parah tihang a run bungter pang khal ka phang.
Ka theihzung paruknak cun i rak bum lo. Ka kiang ihsin nga hut mi hang a ra ret tikah kheng a ken dan cu a peng leilei. Nga rim theng nam hiamhiam ti pawl cu cabuai parih ka ret mi paisa bawm parah an for kohko. Cumi ka hmuh vete'n ka theihawk man hlan ah ka ding vukvi. Ka mithmai khal khua a ri tum mi khawdawr thimpi vekah a cang cih. Cumi paisa bawm cu Italy ram ihta mankhung zet ih ka lei mi paisa bawm ttha zet a si. Ka duhbik mi paisa bawm a si fawn.
Asinan ka thinhengnakpawl a parih a thlen hlan ah ka duhbik mi ka fanu cu a ding vukvi ih cu nui' kiangah a ra ding. Cu thluh ah nel-um zet ih hni siamsi phah in a liang a pawk ih, "A poi lo. Zianghman a poi lo," a ti.
Rawl dawr ih hnattuantu nute cun thinphang le runtu nei lo mitmeng thawn tihang ih forh mi ka paisa bawm cu a zoh ih, "Umm..um...puanthem thawn ka...ka...hnul ding," tiah khabe tthia phah in a ttong.
Ruah lo pi'n ka fanu cun, "A poi lo. Inn kan thlen tikah tidai thawn kan kholh ding. Zianghman a poi lo taktak. Ruat buai duh hlah. Na ttuan ding mi ttuan ko aw," tiah a rak hnem.
Ka fanu cu amah ih thil dik lo tuah mi bang in a awkam khal a nem. Cutikah rawl dawr hnattuantu nute ih thinphang mithmai cu a hung reh vivo ih dimte'n, "In ngaithiam uh," a ti. Cu thluh ah a lu kun in a feh.
Ka fanu cu mitmeng cang hrehre in ka zoh. Thli pua luan tuk balloon vek a si mi ka thinhengnak cun puakkuainak can a ngah nawn lo. Ka fanu khal cun daite'n i zoh sal. Rawl dawr ih meisa tleu fiangfai zet hnuai ahcun ka fanu ih mit ah mitthli tthenkhat an hung um ti fiang zet in ka hmu. Cutikah thin tawi lo in ka thin a phang sawn thlang. Ka fanu ziang a cang thlang?
Cumi zan inn kan thlen tikah ihkhun parih naihawtei' zau phah in ka fanu in a ton mi thuhla in sim.
Amah le mah rinsanawk thiam ding in ka fanu cu England ah tlawng ka kaiter. Tlawng pih can khal ah inn ah ka tlunter lo. England ah hna ttuan phah ih tlawng kai timi a theihthiam ka beisei ruangah a si.
A u mipa upabik America ih tlawng a kai lai ah tlawnginn sungih carek palai a rak ttuan dah. A u mipa nauta deuh khal tuahhmuhnak pindan (laboratory) ah bawmtu a ttuan dah. Ka fanu virvat le duhnung hi cun innsang hnattuan khal zianghman a ttuan dah lo. Innsang hnattuan a ttuan ding can a thleng ve lo. Cuvek ih ka duat mi fanu cu hmun dang ram dang England a thlen tikah rawl dawr ah hna ttuan phah in tlawng a kai.
Hna a ttuannak ni hmaisabik kherkher ah thil dik lo a tuah ngah.
Cumi ni ih a ngah mi ttuanvo cu coka ah wine no pawl kholh ding a si. Ke fem ngeungi nei wine no pawl cu titeng thla vekin an paa derdi. Tha malte suah ih kaih men ah kuairuai cih ding an bang.
Ka fanu cun rialno pawl cu ralringte'n a kholh ko. Thih tiang kholh hman ih cem thei lo ding ah a ruat mi a vun kholh ttheh cun a thin a hahdam sualso. Asinan a taksa a vun herawk zawng ah ruah lo pi in rialno pawl cu a khong ngah. "Krak...krak..." timi awn pawl an suah celcel hnu ah zial par ahcun rialno kek them tleu surhso cu an pengkhawm aw ta mai.
"Cumi lai ciah kha cu Hremhmun tawdeng ih thleng vekin ka thei aw sokhaw, Nunu."
Ka fanu ih aw ahcun ttihphannak an tel lai.
"Asinan kan manager in ziangtin i bia ti na thei maw, Nunu? Ka hnenah mithmai hahdam zet in a ra feh ih i pom. Cu thluh in 'My Dear, na tuahmawh aw lo ti aw' ti'n i sut. Cumi rual ah hnattuantu dang pakhat a hei ko ih rialno kuai pawl a phiatter. I mawhthluknak ttongkam kam khat hman a ttong lo."
Neta khal ah, ka fanu in rialno sungih wine a thlet lai ah a intu ding nu ih hni var fai zet ah a bungter pang. Tipang mi si hmansehla thinheng um zet a si ko. Asinan cu nu cu a thinheng lo lawng si lo in, thinphang zet ih um ka fanu cu, "A poi lo. Wine forh mi cu a sawp a ol ko," tiah a hnem. A tonak ihsi ding phah in ka fanu ih liang cu dimte'n a beng ih thiarfaiawknak pindan lam ah a feh.
Ka fanu cun mitthli hal kelki ih a ton mi thuhla in sim phah in, lungawinak awphawi thawn, "Nunu, midang hman in na fanu hi in ngaidam thei lai si. Nang khal in thil dik lo a tuah pangtu midang fanu va ngaidam ve ko aw maw, Nunu," i ti.
Ka fanu cu ka ttang ah fek zet in ka pom. Midang hman in ka fanu an rak ngaidam thei lai a si si. Kei in teh ziangruangah midang fanu ka ngaidam thei lo ding? Ka fanu parah ka lung a awi. A nauhak lai ko nan ngaidamnak nei thei ding ih i zirh ruangah a si.
Credit: Nine Nine Sanay
No comments:
Post a Comment