Pathian Pek mi Zinghnam Pakhat
Amah cu mahte lawng in umhar zet ih um ttheu zuksuaitu pakhat a si. Ruahsannak timi lo bak cu thil dang zianghman a rak nei lo. A suangtuahnak le ruahsannak pawl a tak ih sersuak ding in hmun hla zet ih a um mi Kansas khawpi ah a va feh.
Kansas a va thlen tikah thuthangca zung pakhat ah hnattuan a dil. Thuthangca hrangah a ttul mi phosuah cahram pawl a ngan thei thu a sim nan, ttuanvo neitu pawl in a cahram pawl cu mi hip theinak le tharhlamnak an um lo ti'n an lu an thin san.
Hnon a tuar tikah a lenglam ah suak in hnattuan ngah ding ih zuam rero tu mino dang pawl vek thotho in hlawhsamnak, ruahsan ding neihlonak, beidonnak tivek a tep thok.
A netnak ahcun biakinn pakhat hrangih zuk suaisaktu hnattuan a ngah. Asinan a ngah mi hlawh a mal tuk ruangah inn khal a sang thei lo. Hman nawn lo mi mawttaw retnak kudawng cu man um lo in a sang ih, camkhat hrangih a hnattuannak pindan ah a hmang. Petrol rim, zinan ek rim pawl nam hiamhiam kudawng ahcun ni tinte'n, zan siimpi tiang in hna a ttuan ttheu.
Cumi kudawng ih a um lai ah zinghnam pakhat in a lung a hnokter. It ding ih meisa a mih vete'n zial parah awn ruri ih tlan rero zinghnam pakhat ih thawmvang a thei cih ttheu. Asinan a thaisun ah thazang kimcang ih hna ttuan thei ding in cumi thawmvang pawl cu hngilh hrim in a it. A cauh tuk ruangah a lu ih lukham a dai vete'n a hngawk hluahhlo ttheu. Cutin, mawttaw kudawng hlun sungah zuksuaitu rethei pakhat le zinghnam pakhat cu an rak um tlang.
Zan khat cu kun ngernger ih hna a ttuan rero lai ah a taksa a kham tuk thlang. A tha sawizoi ding ih a lu a hun tunsoh tikah meisa tleu eng riari hnuai ahcun mit tleu zet pahnih a hun hmu. Hivek zinghnam pakhat hi a liam zo mi kum pawl ah rak hmu sehla cun kalhmang tintian hmang in a that rori ding. Asinan tui can ahcun zinghnam nung lai pakhat cu zinghnam thi zo pakhat hnakin a hrangah thil ttha a si sawn ding tiah a ruat. Zungthiam (artist) picang pawl ih neih ding mi lungput thawn retheih harsatnak pawl cu tuar ttentto ding in thutluknak a tuah ih, a hrangih rualpi umsun a si mi zinghnam duhnung cu zoh phah in a hung hni siamsi. Asinan zinghnam cu phenthlam pakhat vekin a hmai ihsin a hlo vukvi.
Tukvirh lenglam ih thli hrang awn ngai phah in, a kiang ih zinghnam pakhat a um ruangah, mahte lawng um mi a si lo ti'n a vun ruat. Zinghnam cu ningzak ih tlantu fala mawi zet bang in a kiangah a ra kir sal ding timi zumnak thawn a hnattuan cu a ttuan peh.
A zum vek taktak in zinghnam cu a kiang ah a ra sal leuhleuh. Zan lawng ah si lo in, sun khal ih a ra naihniam ttheutu zinghnam cu a rak ttihtthaih lo ih, na ding khal in a tuah lo. Zial parih vaktu zinghnam te cun pianhmang phunphun thawn a hlimter rero. Puai zohtu dinhmun in zinghnam cu laksawng ah sang them khat a pe.
Nuam tete'n an karlak ah rinngamawknak a um vivo ih rualpi ah an cang. A tir ahcun zinghnam te cu amah thawi' malte hlatawknak tiang a ra ngam. A netnak ahcun zuk a suainak cabuai par tiang ah a hung kai ngam ih, style phunphun thawn a hlimter. Zinghnam te cu a dawitlan siang lo. Style phunphun thawi' lek ih veivak rero zinghnam cu daite'n a zoh cuahco ttheu.
Pakhat le pakhat rinngamawknak hin a mawi mi kiangkap boruak a sersuak thei.
A rei hlan ah zuksuaitu cun Kansas khawpi a suahsan ih Hollywood ah ttawnttok zuknung (cartoon film) pakhat suai ding ah a feh. Himi hi a hrangah oltei' ngah theih lo mi canvo a si ih hlei ah, a ruahnak pawl sangka onsaktu khal a si. Asinan vanduai thlak zet in hlawhsamnak a tong lala ih, sumpai khal 'pia nga tlang kang' hman nei nawn lo ih a can hlei ah, hnattuan nei nawn lo ah a cang.
Hlawhsamnak ih vuakvelhnak le beidongnak pawl ruangah it thei lo ih to ngiaungiau in pindan thim miamiam sungah zan tampi a paltlang. A thiamtlinnak le a tuahttuan theinak khal a ringhlel thok thlang. Mi santlai lo taktak ah amah le mah a ruat aw sual thlang. Luatsuahnak pakhat hawl in amah le mah a cekfel aw.
Harsat retheihnak pawl thawi' a nun a tlukbah tum rero lai ah, zan khat cu Kansas khawpi ih a rak ton mi zinghnam pakhat kha a vun mangsuak thutthi. Zial parih tlan kual rero zinghnam te cu vun mitthlam in a tleu zet mi ruahnak pakhat cu a lu sungah a ra lut. Cuvete'n a tho cih ih zinghnam zuk pakhat a suai.
Cutin, a zuksuainak fung hnuai ihsin san tampi tiang a rung hminthang mi Mickey Mouse timi zinghnam pakhat a rung piangsuak.
Cui zuksuaitu rethei cu lehhnu ahcun American thuanthu ah Walt Disney ti ih a rung hminthang lehtu a si.
Pathian in Disney cu zinghnam pakhat lawng a pe. Cumi hman cu Disney in ei ding sang hlom pakhat men hman a neih lo lai ih a pek mi a si. A rilrawn lai ih ra thlengtu zinghman cu Disney cun that in a rak ei lo. Cumi zinghnam hmang in man bikhiah rual lo ttawnttok rampi a dinsuak thei. Hlawhtlinnak timi cu harsatnak nasa zet pawl paltlang ding in taima zet ih zuamnak rahsuah a si. Hlawhtling ding in a copcilh ih tuah theih a si lo. Hlawhtling ding cun taimak suah ih zuamnak pawl kha nuam tetei' khonkhawm a ttul.
Ngantu: Thomas Waterman
No comments:
Post a Comment