Ziang Na Hril Sawn Ding?

Ziang Na Hril Sawn Ding?

Tuini cu zingte'n ka tho. Nazi fung in zanttim zawn a tawh hlan ih ka ttuan thluh ttul mi ruat in ka thinlung a sa hiamhiam. Tuini famkimter ding ah ttuanvo neitu ka si. Mi thupi ka si. Ka hnattuan cu ziangvek ni ka hmang ding timi hril a si.

Tuini ah, ruahpi a sur ruangah ka phunzai thei, asilole, hrampi pawl a lakih tidai in tawihsaktu a um ruangah lungawi in ka um thei.

Tuini ah, sumpai ka neih belhsah lo ruangah ka riah a se thei, asilole, fimkhurtei' thilri lei ding ah ka sumpai in i forhfial  ruangah le hlon lak men ding thilri lei lo ding ih lam i hruai ruangah lungawi in ka um thei.

Tuini ah, ka harhdamnak thuhla ah ka phunciar thei, asilole, ka nun ruangah lungawi in ka um thei. 

Tuini ah, ka hung pitlin so vivo lai ih ka nu le pai' in rak pek lo mi hmuahhmuah ruangah ka ttap thei, asilole, leitlun ni eng hmu ding ih ka rung piansuah an rak sian ruangah lungawi in ka um thei.

Tuini ah, rose kung in hling an neih ruangah ka ttap thei, asilole, hling kung in rose pangpar a neih ruangah lungawi in ka um thei.

Tuini ah, rualpi ka neih lo ruangah ka aihram thei, asilole, rualpi thar hawl ding ah phur zet in ka tim ka tuah thei.

Tuini ah, hnattuan a ttul ruangah ka aihram thei, asilole, ttuan ding ka neih ruangah lungawi in ka au thei.

Tuini ah, tlawng kai a ttul ruangah ka phunzai thei, asilole, hlawptlo zet in ka thluak sungah theihfimnak tharhlam phunphun ka thun thei.

Tuini ah, innsang hna ka ttuan a ttul ruangah ka phunciar sepso thei, asilole, Bawipa in ka ruahnak, ruangpum le thlarau hrangih beunak hmun i pek ruangah sunlawih mi ka si in ka ruat aw thei.

Ka hmailam ah 'Tuini' in pianhmang pakhatkhat neihter ding in i rak hngak. Pianhmang nei ding ih sertu ding lemsertu cu keimah ka si.

Tuini hi ziangvek pianhmang a nei ding timi cu keimai' thu a si. Ziangvek ni ka nei ding timi cu keimah in ka hril.

Nang teh, tuini hi ziangvek si ding ah na hril?

Hram: Ngantu theih lo ih "The Sculptor's Attitude."