26 August, 2016

Hruangkulh ih Khatlam Kap

Hruangkulh ih Khatlam Kap

Amai' pangpar hmuan ih pangpar cin le zohkhen nuam ti zettu fala tleirawl pakhat a rak um.  Amah zohkhentu a pi in, amah ih a rak duhdawt le ngaihsak vek thotho in, pangpar pawl duhdawt le ngaihsak ve ding ah a zirh mi a si. Curuangah a pi vek thotho in, a pangpar hmuan cu a mawi bik a si ringring.

Ni khat cu pangpar ci a cah ttheunak dawr ih pangpar cazin a zoh rero lai ah, pangpar ci khat hmin cun a mit a la vukvi. Cuvek pangpar cu a rak hmu dah lo. Curuangah neih ve a duh ih a cah lohli.

Pangpar ci a ra thlen tikah, a rak timlam cia mi hmun ah a cing. A cinnak hmun cu a hmuan dunglam ih lungto hruangkulh tawhram kiang ah a si. Hri nei ci a si mi, cui pangpar cu cak zet in a hung tthang ih, hnah hring mawi zetzet khal a nei. Asinan a par dah lo. Fala tleirawl cun ni tinte'n cumi pangpar cu a vur, ti a paih, a cawm ih, hung par lohli seh tiah ttongkam tiang hmang in a thlem. Asinan zianghman a tthahnem lo.

Zarh tampi a rei hnu, zing khat cu a pangpar hri kiang ah ding in, hung parsuah ti a neih lo ruangih a lunghmui lo thu a phunzai. Pangpar hri cu sat cat in cutawk hmun ih pangpar ci dang cing ding ah khuimawcin a rak ruat zo fawn.

Cumi lai fang ah a hmuh dah lo mi an hmuan car nu in, "Ka lung a awi tuk! Na cin mi pangpar hri ih pangpar pawl hi ziangtluk in ka duh ti hi a ruat hman na ruat ban lo ding," tiah a rak auh. Cutikah fala tleirawl cun lungto hruangkulh kotka ihsin a khatlam a va zoh ih, a khatlam ahcun a cin mi pangpar cu a hri khat in a rak par serser thluh ti a va hmu.

A hmuh mi lakih pangpar mawi bik rori an rak um. A cin mi pangpar hri kha hrungkulh parah a kai ih hrungkulh khatlam ah va thleng in, cutawk ahcun mawi le duhnung zet in a rak par ttheu.

Thil ttha na tuah mi ih rahsuah na hmuh thei lo ruangah, tthathnemnak a nei lo tinak a si lo. Hruangkulh ih khatlam kap ahcun mawi zet in a rak par thotho ih, midang hrangah lungawinak a thlenter ringring ttheu. 

Hram: Randy Reynolds ih "The Other Side of the Wall."


No comments: