26 August, 2016

Mitcaw Taktak cu. .

Mitcaw Taktak cu...

Tlawnginn ih mipa nauhak mitcaw a rat tikah, nauhak dang pawl in, "Mitcaw cu ziangti'n ca a zir thei ding?" tiah zirhtunu an sut.

Zirhtunu cun, "Cabu siarlotu minung lawng hi mitcaw taktak a si. Kan tlawngta thar cun a kut in ca a siar thei. Cafang si lo in, a pawng fatak tete a um mi cabu (mitcaw cabu) a nei," tiah a sim hai.

A tir ahcun nauhak dang pawl in mitcaw nauhak cu hnihsuak sainak ah an hmang. Asinan anih cun a ngaihsak hai lo. Thil vei khat a theih zo mi cu a hngilh sal dah lo. Curuangah nauhak dang pawl in an ca tuah bawm ding in an dil thok sawn lam.

Mitcaw nauhak cun a can awl neih mi cu casiarnak ah a hmang. Zirhtu khal in a tlin tawk in mitcaw cabu tampi a ngan sak. A cancan ahcun amah in ca a siar sak ih, a sung thuhla cu an relkhawm ttheu.

Vei khat cu ca an zir lai ah zirhtu ih lungnat a suak thutthi ih, nuamnaite'n a tohkham ah a vung to. A lungnat cu a reh lo nan ca zir can cem tiang cu a zirh peh ttentto.

Cu lai fang ah mitcaw pate cu, "Kan zirhtu a dam lo, sibawi kan kawh lohli a ttul," tiah a hun au thutthi.

Curuangah nauhak pawl cu an ding vukvi ih sibawi an va ko. Sibawi a ra thlen tikah zirhtunu cu norleng thawn zato ah an fehpi.

Nauhak pawl cun, "Kan zirhtunu a dam lo ti ziangtin na thei thei?" tiah mangbang zet in an sut.

"A aw a tthia, a hmai a raam ih a ttong lailak ah a cawl cingcing. Curuangah a dam lo ti ka thei."

"Cumi cu na hmu thei tinak maw?" tiah mipa nauhak pakhat in a sut bet.

"Hmu thei lo nan, ka tongtuar (feel) thei. Tthimnak ah, Anthony, tuizing kha na riah a sia ti ka tongtuar thei. Inn lam ah buainak na nei tla a si men thei."

Anthony cun mangbang zet in, "Si e. A dik. Asinan hmu thei fawn lo in ziangtin na tongtuar thei?" tiah a sut sal.

"Tongtuar thei ding in cabu pawl in in zirh. Minung ih tontuar dan hi ka tontuarnak ihsin ka thei. Zirhtunu ih in sim dah mi kha cingkeng uh: Cabu siarlotu lawng hi mitcaw taktak a si."

Hram: A. Lopatina and M. Skrebtsova ih ngan mi "Wise Short Tales" cabu sung ihta "What do books teach us" leh mi a si.


No comments: