Kanmah Kan Thlengawk A Ttul Sawn
Khuahlan lai pi ahhin, Siangpahrang Shoelong ih kuthnuai ah mipi pawl cu aipuang zet in an nung. A ram sung mipi pawl cu an nun a semrem zet ih neihsiah tampi nei in, vansiatnak tong lo te'n an um. Ni khat cu Siangpahrang cun a ram sungih hmun hla zetzet ah a um mi santhuanthulam hmun thupi le thlacamnak hmunpi pawl ah feh a tum.
Siangpahrang cun ke thawn feh phah in a mipi pawl ton vivo a duh. A ram mipi pawl cu an siangpahrang an ton ngah ruangah an lung a awi zet. An siangpahrang cu mi nunnem le lainatnak nei a si ruang khal ah an uang aw ngaingai.
An khualtlawn an ttheh tikah, a ram mipi pawl ih nun a hahdam ti a hmu ih siangpahrang cu a lung a hmui pam. Asinan sirawk mi pakhat a nei. Ziangahtile a dam sung ah ke thawn hmun hlapi a feh hmaisabiknak a si ruangah a ke a na tuk lawmam.
A tlangbawi pawl hnenah an ram sungih lamzin pawl cu zawh an harsa tuk tiah a phunzai. An zawh mi lamzin pawl cu lungto biboh hlir an si ruangah a ke na a tuar thei lo. A ram mipi pawl cuvek lamzin ah an feh ringring ti a vun ruat tikah a thin a har fawn. Curuangah mipi pawl an feh hahdam theinak ding ah lamzin hmuahhmuah cu saphaw phah ding in thu a pe. Lainatnak thawn a ram mipi hrangah thil ttha sinsin tuahsak a duh ruangah a si.
Siangpahrang ih thupek an theih tikah tlangbawi pawl cu an mang a bang zet. Ziangahtile cumi thupek cun rannung thawng tampi ih nun a siatsuah ding ih, sumpai tam tuk khal a cem ding ruangah a si.
Asinan tlangbawi pakhat a ra ih ruahnak ttha deuh a neih thu a ra sim. Siangpahrang in a ruahnak a rak sut tikah, "Lamzin khuhnak hrangah rannung tampi thah a ttulnak a um mawsi? Cumi hnak cun, na ke tuam thei ding tawk in savun kha at awla a ttha sawn lo ding maw?" tiah a sim.
Cumi a theih tikah siangpahrang cu a mang a bang zet ih, tlangbawi cu a fak rero. Cuti'n savun kedam kop khat a cah ih, a ram mipi pawl khal amah vekih savun kedam hruh ding in a ngen hai.
Kan kiangkap ih thil um mi pawl camriam le mawhsiat kan hmang ttheu nan, kanmai' sunglam thlengawk a ttul timi cu thei aw lo in vei tampi kan um ttheu.
Ziangkim ah kanmah kha thutthentu ttuan kan tum pang ttheu ih, a khatlam zawng ih ruatnak cang thiam lo in kan um pang ttheu fawn.
Hram: http://moralstories26.com/king-wise-man/
11 November, 2016
Kanmah Kan Thlengawk A Ttul Sawn
Subscribe to:
Post Comments (Atom)
No comments:
Post a Comment