Nomnak Dawi Tuk Hlah
Leilung saklam deng, vur lakih um ttheu mi polar savom pawl ih thuanthu pakhat na rak thei dah maw?
A dai zet mi leilung saklam deng ah polar savom pawl hi siangpahrang vek an si. Asinan a cakvak zet mi polar savom pawl cu Eskimo miphun pawl cu olsam zet in an kai thei.
Ziangtin an kai thei? Eskimo pawl in sahrem pakhat an that ih a thisen kha pung pakhat ah an ret. Cu thluh ah, sahrem thisen sung ahcun kap hnih hriam mi nam an ret bet. Khua a daih tuk ruangah sahrem thisen cu rei lo te sungah a khal thluh. Cutin nam hriam zet a phum aw mi sahrem thisen khal cu pung sung ihsin an la suak ih, vur lakah an ret ta.
Savom hin thisen an ngaina zet. Cui' an ngainat mi lala cun thihnak kut ah a thlenter fawn. Rim thei thei zet savom cun sahrem thisen rim cu hmun hlapi ihsi khal in a thei ban. Curuangah a va pan ih thisen cu a va liak ciamco. A liak rei tikah thisen dai tuk in a lei khal a hitter thluh. Asinan tanta a sian lo ruangah a liak peh vivo thotho. Tawkfang ahcun thisen cu a thlum deuhdeuh. A tharhlam deuhdeuh. A hlum deuhdeuh.
A liak tam deuhdeuh, a thaw deuhdeuh. Taktak ahcun amai' lei ihsin a suak mi thisen a liak rero sawn a rak si. Thisen khal sungih phum mi nam in a lei a at ruangah amai lei ihsin thisen a suak rero. Asinan a lei a hit ruangah a natnak a thei thei lo. A hnar in thisen tharhlam rim a theih deuhdeuh rual in a liak nawt deuhdeuh men. A netnak ahcun a thisen a suak tam tuk ih tha cem in a tlu. Cutikah Eskimo pawl cun olsam zet in an ra that ttheu.
Nun nomnak kan hawl can ah kan khawruahnak, kan hmuhdan tivek a dik lo can ahcun polar savom vek ah kan cang pang thei ve. Mi tthenkhat cun hnattuan can a tam deuhdeuh asile, kan hlawhtling sinsin ding ih, sumlut khal kan nei ttha sinsin ding tiah kan ruat. Asinan cumi sumpai hmannak ding can an nei lo. Mi tthenkhat tla cun an sumpai hman dan ding hman an thei lo.
An sumlut a tam sinsin nan, khatlam ahcun thil tthenkhat an sungral ve vivo. Minung nun ih thil mankhung bik a si mi innsang thawn um tlang can, nu le pai' duhdawtnak a hal zettu fanau pawl hrangih can pek ding, zatlanglam, harhdamnak le midang bom ding tivek tiang in an hngilh phah ttheu.
Amerika ih zarhtin suak journal pakhat in hnattuan ihsin a cawl zo mi sumtuahlam mithiam cungcuang pahra hnenah thusuhnak tuah in cazin pakhat an tuah dah.
An thusuhnak cu, "Na nun hi a thar in thok sal thei sehla, na ruahsan bik mi le sunral na duh lo bik mi ziang a si?" timi a si.
Mithiam pasarih in sonnak bangrep pakhat an pe. An sonnak cu, "Ka nun hi a thar ih thawh sal theih si sehla cun fanau pawl thawn um tlang can hi sunral ka duh lo bik mi a si," ti a si.
Mi tthenkhat cun thutluknak tuah hnu cun sirawknak a um lo an ti. Asinan thutluknak tuah hlan ih tthatei' ruat ta lo ahcun, a netnak ah sirawknak a thleng thotho. Aipuang zet ih um ttheu ka rualpi pakhat in, "Sumpai cu hawl cem theih lo thil a si. Hawl deuhdeuh asile ngah deuhdeuh, ngah deuhdeuh asile duh deuhdeuh a si. A netnak ahcun 'a tawk thlang' timi ruat nawn lo in sumpai dung kan thlun thluh a si ko," tiah a sim.
Kannih teh polar savom pawl vekin nuam ti zet ih mai' thisen in rerotu kan si pang maw? Diriamtei' um theitu cu ziangtik hman ah a rethei dah lo. Diriamnak nei theilotu cu tlaitluan in a rethei ringring.
Hram: Nine Nine Sanay ih "Polar Savom ih Thuanthu" leh mi a si.
No comments:
Post a Comment