Tthenawknak Cazual
Kan dunglam kum 14, ruahpi a tak zet mi zan khat ah, ka sungkhat pawl dokalh in ka duhdawt tuk mi nangmah ka lo thlun. Na hrangah a dam lo mi na nu, a tar zo mi na pa, rangva a hrek hawk ih zuar zo mi inn rop pakhat tlun ah, keimah ka um lai ko si ti aw? Himi khawpi ah hnattuan ding ih ka ratnak ding lamcaw hrangah thla khat sung ai-awh tlawng sayama ka ttuan. Thazang bang zet ih ka ttuannak hmuahhmuah hi nangmah thih tiang ih um tlangnak ding ah a si.
Minung ka hril sual lo ka ti pei. Taima zet in hna na ttuan.
Kum hra a liam hnu lawng ah ka innlam pawl an thawpi an suah thei. Ka nu le pa in minung ka hril sual lo ti thei ih, in ngaidam can ahcun tlakrawh inn le mawttaw pawl kan nei zo. Thil le ri kan neih vivo rual in "Na thinlung lo theihtiampitu" dang pakhat a um thlang tiah pheh lo te'n i sim ve. Tthenawknak cazual ih hmin sign ka kar ahcun kan neih mi hmuahhmuah le kan fanau pawl ka lo pe thluh ding tiah i sim.
Kei cun hni phah in, tuihnu ni 3 ah ka lo sim sal ding ka lo ti. A ni linak ah thuhlawm pawl a dangdangte'n ka ngan mi cahnah ka lo hmuh.
(1) Kan neihawk kum hra sungah zan angki zun 3, inn kedam kop 4 le savun kedam 21 na hruh. Savun kedam na hruh zat a tam sawn. Ziangahtile sumpai hawlnak puhmawh in a lenglam ah na um tam sawn. Curuangah "thinlung theihthiampitu" na tonnak khal a si.
(2) Kan neihawk kum hra sungah zan angki zun 10, inn kedam kop 11 le savun kedam 16 ka hruh. Ka hruh mi inn kedam le savun kedam an tam sawn veve. Innsang ttuanvo le fanau kilkhawi in inn ih ka um tam sawn ruangah a si. Nangmah thawn a lenglam khawvel ah hngawngkol bun ih ttan kan khawh tlang can khal a um fawn. Bangcauhnak ruangih a tharhlam nawn lo mi ka hmel hi, na hrang ahcun inn ih ret tthat men ding ah a cang.
(3) Kan neihawk kum hra sungah na thiamtlinnak a let tampi in an pung. Tthenawk hnu ah "ziangkim ih hlawhtling le pitling" mi nangmah lo nei ding ih a ding tlar mi nunau pawl lak ihsin na duh mi pakhat na hril thei.
(4) Kan neihawk kum hra sungah ka hmel, ka kharvarnak pawl a let thawng hra in an tla niam. Diktei' rel ahcun innsang dang ka din theinak ding cu zatek 1 lawng a um. Keimai' kum rual ka neih ngah thei nawn lo ding vekin, fanau a bawr a thlai ih um mi nuhmei pakhat cu zovek mipa in an nei duh ding?
(5) Kan neihawk kum hra sungah hnattuan nei tam zet nang cun rawl 26 i suansak dah.
(6) Kan neihawk kum hra sungah hnattuan nei tam zet kei in kum khat ah ni 365 sung rori, ni khat ah rawl vei thum ka lo suan sak.
(7) Kan neihawk kum hra sungah fa pakhat nei ding in thla 10 ka rei. A suah hnu ah kum 10 sung hrawng ka fingkhawi.
(8) Kan neihawk kum hra sungah, fa pakhat ka hrin hnu ah, a hmin sak ding in minute 10 sung na rei.
(9) Kan neihawk kum hra sungah na nu le pa thawn rualremte'n ka um. Na nu le pa hi aw hro in ka be dah lo.
(10) Kan neihawk kum hra sungah i duhdawttu ka nu le pa na ngaidam thei lo. Ka pi, ka pu ti khal in vei khat hman na ko lo. Na retheih lai ahcun na kawh khal ah an lo 'awi' lo ding na phang ih, na neihnun hnu ahcun na ngaihsak hai lo lala. Nang khal in na fanu cu mi neinung thawn lawng neihawkter na duh ve a si lo maw?
Ka ngan mi cazin pawl hi siar in, ka mitfang rori zoh ih 'tthenawk ka duh' na ti ahcun ziangtik can khal ah si sehla, tthenawknak cazual ah hmin sign ka lo kar sak ding.
Cuti'n tthenawk i dil ding can cu kum khat sung ka lo hngak. Tthenawk ding thu na rel lo lawlaw ih hlei ah tuante'n na ra tlung ttheu. Innsang hnattuan i bawm. Na tuah sual mi mawhnak hrangih leiba na kuan rero maw? Asilole, zawnruahnak neitu minung an tam sinsin ruangah a si pei?
Cuti'n, hi leitlun ah thawnginn hnakin minung inn an rung tam sawn vivo.
Hram: Nine Nine Sanay ih "Let-tthat Sin-dan."
No comments:
Post a Comment