27 May, 2017

Na Bom Thei Lo Hman ah Va Ngainep Hlah

Na Bom Thei Lo Hman ah Va Ngainep Hlah

Nupa neinung zet tuak khat in an inn ah kum thar hmuahnak puai ropi zet an tuah tum. Curuangah thil mankhung zetzet umnak bazar ah an feh. An dinhmun a sanzia langter an duh ruangah thilri man ah an buai lo. An ttul mi an lei thluh tikah, an thilri pawl an inn ih thiartu ding minung an ko. Cutikah thilri thiartu tar zet, harhdam hmel tuk lo, hnipuan ttet hniaphni hruh, ni tin ei-in hman hlawhsuak thei hmel lo, hi an hnenah a va feh.

Thilri thiar man ziangzat a si ding ti ih an sut tikah, putar cun $20 lawng a lak tum thu a sim. Thilri thiartu dang pawl ih lak zat hnakih niam zet a si. Asinan milian nupa cun an nep ciamco ih a netnak ah $15 in an lungkim tlang. Putar cu cam diktei' rawl einak hman nei thei lo a si ruangah, a ngah hnattuan pohpoh a ttuan a ttul ih rem a ti sak hai mi a si.

Milian nupa cu thilri thiar man an nep thei ruangah an lung a awi zet ih, $15 an pek ta hnu ah, an inn umnak an sim. An nupa ih inn an thlen hnu nazi pakhat a liam, pahnih a liam. Asinan thilri thiartu cu a thleng lo. Cutikah nupi cu a thin a heng ih a pasal hnenah, "Khavek minung va zum aw hlah ka lo ti ringring kha. Ka thu na ngai dah lo si lawm. Ni khat ah rawl vei khat hman ei ringring thei lo minung hnenah, puai ropi tuahnak ding thilri hmuahhmuah na ap. Kan inn ih rak thiar lo in, thilri zate a hlohpi ding ti ka theifiang. Bazar ah feh lohli in kan zingzoi ding ih, cu thluh ah palik zung ah feh in kan hek ding," a ti.

Cutin, an nupa in bazar ah an feh sal. Bazar an thlen hlan ah thilri thiartu dang pakhat an tong. Cu pai' hnenah putar ih thuhla an sut. An thilri khal cu pa ih norleng ah a um ti an hmu. Thinheng zet milian nupi cun, "Rukru putar kha khuiah a um? Himi hi kan thilri a si ih, amah ih thiar ding mi a si. Nannih rukru rethei pawl hin kan thilri hi ru in va zuar nan tum a si hmel hi," a ti.

Cutikah thilri thiartu cun, "Ka pi, zangfahte'n sup aw hram aw. Putar rethei kha kan dung thla ihsin a na zo. Ni khat ah pumpuartei' rawl vei khat einak hman a hlawhsuak thei lo. Nan thilri a rak thiar lai ah, a ril a rawng tuk ih, a dam lo fawn ruangah, tuvek sun ni ling ahcun thiar bet theinak ding thazang a nei nawn lo. Curuangah $15 i pek phah in a tlu. A ttongkam neta bik cu, "Himi thilri thiarnak ah paisa $15 ka la cia, himi hi la awla, zangfahte'n himi address ah i thiar sak hram aw," timi a si. Ka pi, putar kha a ril a rawng, a rethei ko nan mi tlaitluang a si. Tu hi amai' duhdan kimter ding in nan thilri ka rak thiar thok fang a si," tiah a sim.

Cumi an theih tikah, milian pai' mit ihsin mitthli an luang. Asinan a nupi cu a ning a zah tuk ruangah a pasal ih mit hman a zoh ngam lo.

Tlaitluang (honest) ding ih na ruat lo mi minung kha an rak tlaitluang thei. Cun, zovek minung khal ngainepnak mit thawn zoh lohli ding a si lo. Nang hnakih fel an rak si thei. Mi rethei pawl na bom thei lo hman ah, va ngainep lo ding tal ih na fimvar ve cu a ttul fawn.

Hram: Ngantu theih lo mi  "The Last Delivery."


No comments: