Dil Ding Tlak cu Pathian Lawng A Si
Vei khat lai ahhin, siangpahrang pakhat cu
ral a donak ah hriamhma bese zet a ngah. A hma cu bese tuk ih zovek sibawi hman
in an tuamhlawm dam thei lo.
Ni tawkfang a liam hnu ah, puithiam pakhat
hi siangpahrang ih ram ahcun a va tlawng. Cumi cu siangpahrang in a rak thei
ih, siangpahrang inn ah leng ding in a palai pawl a va kawhter.
Puithiam cu siangpahrang hnenah a thleng
ih, siangpahrang ih hma a tham sak vete’n, a hma cu a dam cih mai. Siangpahrang
cu a lung a awi tuk ih, puithiam cu laksawng pek a tum rero nan, puithiam cu a
la duh lo.
Siangpahrang cun, “Zo hnen hman ah leiba
ka nei lo ding ti’n Pathian hnenah thu ka tiamkam dah zo. Curuangah na hrangih
ka lo tuahsak ding mi i sim aw. Na parah leiba neih ka duh lo,” tiah a sim.
Puithiam cun, “Tu hrih ahcun zianghman
ttul mi ka nei lo. Lehhnu ah ttul mi ka neih asile ka lo sim leh ding,” a ti
ih, a tlung sal.
Thla tampi a liam.
Ni khat ah, puithiam cu Pathian hnenih
thla a cam lai ah, a thinlung ah ttulhai mi a hun nei. Kan dunglam thla malte
ihsin a cawpi hnawi a sawr thei nawn lo ti a mang suak.
Curuangah, “Ka cawpi hi a tar thlang.
Siangpahrang hnenah cawpi thar va dil sehla a ttha men ding,” tiah a ruat.
Cuti’n siangpahrang umnak ah a feh.
Siangpahrang ih inn a thlen tikah siangpahrang cu biakinn ah thla a rak cam lai
ti a hmu.
Cumi a hmuh tikah puithiam cun, “Cawpi cu
ka dil sal lo ding,” tiah a thu a tthin sal.
Siangpahrang cu thlacam a ttheh in,
biakinn ihsin a ra suah tikah, amah tong ta lo ih a kir sal mi puithiam cu a
hei hmu.
Siangpahrang cun a hei dawi thlun ih,
“Ziangah na kir sal? Ziang na duh ti i sim aw. I dil mi cu ka lo pe ding,” tiah
a ti.
Cutikah puithiam cun hni siamsite’n, “Nang
cun zo hnen hman ah leiba nei lo ding in Pathian hnenah thu na tiamkam. Kei
khal in, ttulsam mi a nei laitu hnen ihsin zianghman la lo ding in Pathian
hnenah thu ka tiamkam ve a si,” tiah a sim.
Siangpahrang cun mangbang zet in, “Ka va
thei fiang ciah lo ve?” tiah a sut sal.
Cutikah puithiam cun, “Thla na cam lai ka
lo zoh ih, Pathian hnenah lennak le hminthannak na dil lai ka thei. Nangmah
khal hi na ttulsam mi na ngah thluh hrih lo a si. Ttulsam mi a nei laitui’ hnen
ihsin ziangtin thil ka dil thei ding? Nangmah hman in na ttulsam mi pawl Pathian
na dil rero lai ah, kei in ka ttulsam mi cu nangmah ka lo dil ding maw?” tiah a
sawn.
Cu thluh ah puithiam cun, “Pathian in i
theihter zo. Mi hmuahhmuah hi kutdawh hlir kan si. Curuangah ka duh mi cu
kutdawh thotho a si mi minung hnenah si lo in, amah Pathian hnen sawn ah ka dil
ding,” tiah a sim fiang.
Sirhsan: Moral Stories: Sage and King
Story – Everyone is Beggar
No comments:
Post a Comment