Mikei Hi An Um Taktak Maw? π€
Mikei timi Θongfang hi "minung" le "Keipi" (pawpi) timi Θongfang pahnih kom ihsin a ra mi a si hmang. A tican cu minung si fawn, keipi (pawpi) si fawn, tinak a si.
Lal Ruang ih thuanthu ah mikei (Kei Cal) thawn an rualpiawk thu le Lal Ruang tei' unau mikei khua ih an tlawn thu kan hmu thei. Minung le Mikei hi an rak um khawm nasa.
"Kei Ti In Nu" thuanthu khal ah minung pangai vek ih um can nei, mikei si can nei kan hmu thei.
"Mikei Tlangval le Milai Fala" thuanthu khal a um.
Hlawn Dawh Thang tla kha khual lam hla tlawn a duh can ah pawpi ah a cang ih a veivak mai Θheu.
Tu khal ah Parte khua ah Mikei tikhur a um lai.
Kawl khal in mikei thuanthu hi an nei ve. A hramthok ahcun Shan thuanthu deuh a si. Tu ih Sagaing ramΘhen, Hkamti peng, Htamanthi khua khi "Mikei" khua a rak si.
Shan hrin ci khat a si mi Htaman miphun pawl cu pawpi ah an cang thei ih, sa an deh Θheu. Himi an thiamnak hi miphun dang hnenah thleng lo ding in an kilhim ih, anmai' miphun lawng an zirh aw vivo.
Ramsa an deh duh tikah, hramlak ah mi pahnih an feh ih pakhat cu thingkung parah a kai. A dang pakhat in a hnipuan a hlit thluh ih a hnipuan kha thingkung parih kaitu in a rak keng.
Thingkung parih kaitu cu pawpi ih deh banlonak hmun sangpi ah a um a Θul. A rualpi pawpi ih a can lai, pawpi thinlung a ken lai ah a deh pang lonak ding ah a si.
Cu thluh in hnipuan hlittu a rualpi cu a daibilin ih pawpi var ah a cang. A Θhen cu ciarbek ah an ciahawk hnu ah pawpi ih cang tla an um.
Pawpi ih a can hnu in sa a va deh. A deh mi sa thawn a ra kir sal tikah thingkung parih um a rualpi in a hnipuan kha a hmai ah a vun thlak. Cutikah minung a si kha a mang sal ih pawpi ihsin minung ah a hung cang. Cuti'n ram an tawi Θheu.
A rualpi in a rak tlun san ih a hnipuan petu an um lo, asilole, hramlak ah a hlo ih a rualpi umnak a hawl hmuh thei nawn lo pang asile a san sung in pawpi ah a cang lan ta.
Minung dinhmun hnakin pawpi ih can tikah khualtlawn veivah can ah feh cak a theih, hriamnam Θul lo in sa a thah theih ruangah an hrangah a remcang ti a si.
Cui' minung ihsi pawpi ih cang mi kha ααα်αျား an ti ih cumi ihsin Kawl Θong ααα်းαျား timi a ra suak.
No comments:
Post a Comment