Hni Uar-o Aw (34)

Hni Uar-o Aw (34)

Noah kha Nga A Siau Maw?

Nipi Tlawng zirhtunu in, “Cuapte, Noah kha a long sung ih a um lai ahkhan nga a siau na zum maw?” tiah a sut.

“A siau thei ka zum lo,” tiah Cuapte cun a let. “Long sungah cangcel pahnih lawng an um sisi.”

Lot ih Nupi

Nipi Tlawng zirhtu in Lot ih nupi dunglam a hoi ruangih cikhawn ban ih a can thu a sim. Cutikah Cuapte cu a hung ding vukvi ih, “Ka nu khal mawttaw a mawn lai ah vei khat cu dunglam a hoi ve dah, cu thluh in ttelifawn zungah a feh!” tiah a hun sim.

Zangfakza Kiosa

Nipi Tlawng zirhtu in nauhakpawl kha Daniel le Kiosa Puk thuhla a sim hai. Zuk khal a nei ih zuk sung ahcun Daniel cu ralttha le rinngamawknak nei zet hmel a pu. A kimvel in kiosapawl in an hil vialvial. Cumi zuk a hmuh vete’n nunau nauhakte pakhat cu a ttap.

Zirhtu cun, “Ttap hlah maw, nute. Daniel cu kiosa in an keu lo ding pi.”

Nauhak nute cun, “Cumi ruangih ttap ka si lo. Zuk kil zawn ih kiosa fate kha, khami kha rawl ei ding a nei lo ding silawm.”

Jonah

Pathian um zumlotu tlawngsaya pakhat in phun khat pawl ca a zirh. Culai ah nunau nauhakte pakhat in a rualpi hnenah Jonah ih thuanthu a rak sim rero. An saya cun nunau nauhakte hnen ahcun: “Asile Jonah kha ngapi pum sungah reipi tiang a nun theinak san kha na thei maw?” tiah a sut.

“Ka thei ve lo. Vanram ahcun ka sut thei ding nan.”

“Vanram ah um lo sehla?”

“Cuti a si ahcun nangmah in na rak sut thei ding."

Hla Nambat 365

Zuu in supawknak hrangih serhhran mi Nipini a si. Pastor in a sermon cem zawng ah thutak zet in, “Leitlun ih beer hmuahhmuah hi ka ta si sehla cun, tiva sungah ka thle bung thluh ding,” tiah a sim. Cui hnu ah, thutak sinsin in, “Cule, leitlun ih sabittii hmuahhmuah hi ka ta si sehla cun, tiva sungah ka thle bung thluh fawn ding,” tiah a sim lala. A netnak ah, thli lak ih a kuttum vai phah in, “Cun, leitlun ih whiskey hmuahhmuah hi ka ta si sehla cun, tiva sungah ka thle bung thluh fawn ding,” tiah a sim lala.

Sermon a ttheh ih Pastor cu a to. Khawm ttiaknak hla netabik sak a cu. Hla hruaitu a ding ih hnino sursi phah in hitin a sim: “Kan hla netabik ding ah, hla nambat 365, “Tiva ah Tong aw Uhsi,” timi kan sak pei.”

Ziang A Tuah Ding?

Kawhhran sungtel lakih thuzilzuang thehdarhtu,  le mah le mah kawhhran sungtel pawl ih nungcang kaihruaitu vek ih ruat-aw-tu nu Mildred cu mi dang pawl hnattuan thuhla rel khal a paih ngaingai. Kawhhran sungtel tampi cun Mildred cu an ngaih lo, asinan an ttih lala fawn ruangah zianghman an ttong ngam lo.

Asinan ttum khat cu Mildred a cangsual ve riai. Mildred in an kawhhran sungtel thar a si mi mawttaw mawngtu George cu zuu a in tiah a puh. Vei khat, siim lam ah George ih mawttaw an khaw sung ih zuu dawr umsun hmai ih a din lai a hmuh ruangah a si.

Mildred cun zo khal in zuu dawr hmai ih mawttaw an hmuh ahcun a mawngtu in ziang a tuah ti cu an thei cih ding tiah a sim. Mi ngaicawi zet George cun zianghman a ttong lo, Mildred cu tawkfang hrawng a zoh nguaungi hnu ah a feh suak. Kam khat hman a ttong ta lo lawlaw.

Cumi ni siimlam ahcun George cun a mawttaw cu Mildred ih inn hmai ah a dinter ih, cutawk ah zanvar tanta in a tlunsan. Mipi in ziang tuah ah ha an puh ding?

Elijah

Nipi Tlawng zirhtu in Profet Elijah thuhla le Baal khuavang pathian ih profetpawl thuhla cu khimkhuahte’n a simfiang rero. Elijah in biakttheng a don dan, a par ih thing a ret dan, cawcang note a can dan, le biakttheng par ih a hun ret dan tivekpawl cipciar zet in a sim hai.

Cu thluh in Elijah in Israel pawl cu biakttheng par ih tidai belpi pali khat tawih ding in a fial hai. Vei li tiang a tawih nonter hai fawn.

“Asile,” tiah zirhtu cun a sim vivo, “ziangruangah Bawipa in Elijah cu biakttheng ah tidai tawih a siansak ti in sim theitu nan um maw?” tiah a sut hai.

Pindan dunglam ih rak to nauhak nute a hung ding vukvi ih, “Ka thei, ka thei,” ti phah in, “tihang suan a duh ruangah,” tiah a let.

Samsau le Ke ih Feh?

Suakthuan pakhat cu mawttaw mawn zirnak ihsin a hung tlung. A pa cu evangelist a si. A pai’ hnenah an mawttaw mawn a duh thu a sim. A pa cun, “Relremnak kan tuah ding. Na tlawngca ih na hmat kha C ihsin B ah na kaisoter ding, tuhnak in malte tal in Bible na zir tam ding, na sam na met ding, cumipawl na tuah thluh asile mawttaw mawn ding thuhla cu kan rel leh ding,” tiah a sim.

Suakthuan khal cun a lung a kim. Zarh ruk a rei tikah an lungkim tlang mi ih thil dang hmuah cu suakthuan cun a kimter nan a sam cu a met lo.

A met lo thu khal ah hitin a sim: “Ka pa, na thei ve ko. Sam met ding thuhla ka ruat rero lai ah Bible ka siar. Bible sung ahcun Samson kha a sam a sau, Baptisma petu John khal a sam a sau, Moses khal a sam a sau fawn, cun, Jesuh khal kha a sam a sau ding ti theih a si,” tiah a sim.

Cutikah a pa cun, “Na dik ko, ka fapa. Asinan annih cu an feh duhnak hmun ah ke hlir in an feh ti teh na rak hmu ngah ko law maw, mawttaw an hman lo kha?” tiah a sawn.

Dik ve Thawkhat

Nipi tlawng zirhtu in a tlawngtapawl cu Bible sung ih siar le rel hlawhbik a si mi Saam 23 a zirh hai. Zoh lo ih siar thei ding in thla khat sung rak siar dingah caan a pe bet.

Bobby khal in Saam 23 zoh lo ih siar thei ding cu a hiar zet. Asinan a baihat thei maimai lo. Vei tam zet a siar, a zir rero hnu in a tlar hmaisabik cu a cingkeng thei ttawkttawk.

Cutin kawhhran mipi hmai ah nauhakpawl in Saam 23 baihat ih an siar ding caan a rung thleng. Bobby cu a thin a tur zet.  Amai’ ha a thlen in maih (mic) a la ih, “Bawipa cu ka Tuukhaltu a si ih, cumi lawng cu ka theih ttul mi khal a si!” a ti hnu ah tonak a pan  cih.

............................................