Nunau Dang Pakhat thawi' Tonawknak

Nunau Dang Pakhat thawi' Tonawknak

Kan neihawknak kum 21 a kim hnu ah ka nupi in nunau dang pakhat hruai in rawldawr ih rawl va ei ding, zuknung va zoh ding in i fial. Ka nupi cun, "Ka lo duhdawt ko. Asinan anih khal in a lo duhdawt ve. Cun, anih khal nangmah thawi' um tlang can neih a duh ve ding ti ka thei," i ti.

Ka nupi in i tonter duh mi nunau dang cu ka Nu a si. Ka nu cu nuhmei a sinak kum 19 a si zo. Asinan ka hnattuan le fa pathum buaipi ka si ruangah ka nui' hnen khal vei hnihkhat te lawng ka thleng ttheu.

Cumi siimlam lala ah ka nu cu a leng ih rawl ei ding le zuknung va zoh ding in phone thawn ka hei sawm.

"Ziangah? Na dam lo mawsi ka fa?" tiah ka nu cun i sut sal. Pakhatkhat rinhlelh mi a nei a bang.

"Si lo, ka nu. Nangmah thawi' can lo ek tla a ttha ding ti ih ka ruat ruangah si. Keimah le nangmah lawng kan si ding," tiah ka sawn.

Ka nu cun reipi a ruat hnu ah, "Cuti a si ahcun ka duh tuk lawlaw," tiah i sawn sal.

Cumi ni cu tlawngkai ni nga  a si. Ka hnattuannak ihsi tlun phah ah ka nu cu mawttaw thawn ka vun sawm phah. Ka nu cun kortlunthuah hruh cia in sangka ihsin i rak hngak zo. A sam tla a kirter ih a hruh mi hnipuan khal tthitumnak puai ih a hruh netabik mi mothuam a si. Lasi fala mithmai vek ih tleuzung kap suak aw ka nui' mithmai cun hnih-no mawi zet thawn i rak zoh.

"Ka rualpi pawl hnenah 'tuini cu ka fapa thawn a leng ah kan suak ding ti ka sim ih, in ngaisang zet sokhaw," tiah ka nu cun mawttaw sungih lut phah in i sim.

Rawldawr ttha le nuam zet pakhat ah kan feh. Ka nu in ka ban i pawk dan tla cu First Lady a si hmang ti pangnak a si. Cabuai ih kan to tikah rawl cazin ka zohsak a ttul thlang. Ka nui' mit pawl cu cafang pawr pipi lawng an hmuh thei thlang ruangah a si. Rawl cazin hrek tiang ka zoh hrawngah ka nu ka vun zoh tikah ka nu cun i rak zoh rero ti ka hmu.

Ka nui' hmur parih hnih-no cu lunglen hnih-no a si. "Na nauhak lai ahcun keimah in menu ka lo siarsak ttheu," tiah i sim. Kei cun, "Rak cawl hahdam hrih aw ka nu. Tu cu keimai' lo siarsak can a si thlang," ka ti.

Zanriah ei phah ih kan titi cu a thaw zet. Kan rel mi cu thupipa a si hran lo. Tulai fang ih kan ton mi thilthleng tete pawl an si ko. Kan titi a thawt tuk ruangah zuknung kan khelh nawn lo. Curuangah ka nu cu inn ah ka thlah sal.

Ka nu cun, "Nangmah thawn a leng suahvah sal ka duh. Asinan i sawm lawng ah ka lo thlun ding," i ti. Ka lu ka sut.

Inn ka thlen tikah, "Zanriah ei phah in tonawk teh a ttha ko maw?" tiah tiah ka nupi in i rak sut.

"A ttha lawlaw. Kha tluk in a ttha ding ti ka rak ruat ngah dah lo," tiah ka sawn.

Ni malte a rei ah lungnat besia in ka nu cu a thi. A thutthi tuk ruangah ka nui' hrangih thil pakhatkhat tuah ding khal a remcang thei lo.

Can tawkfang a rei hnu ah rawldawr pakhat ihsin ca-ik te le paisa donnak cahlap te a ra thleng. Ka nu thawi' kan fehnak rawldawr ihsin a si. Ca-ik ih tel mi ca ahcun hitin a ngan aw: "Himi rawl cazin hrangah paisa ka rak pe cia. Himi dawr hi ka thleng leh ding maw thleng nawn lo ding ti ka theifiang lo. Ziang a va si khalle mi pahnih rawl ei man ka rak pe cia. Pakhat cu nangmai' hrangah, a dang pakhat cu na nupi hrangah a si. Khami zan kha ka hrangah ziangtluk in sullam a nei ti cu a thei lo tla a si men thei. Ka lo duhdawt tuk ka fa."

Cumi ciah ihsin "ka lo duhdawt" timi ttongkam hi a can khelh ih ttong a thupitzia le kan duhdawt mi pawl hi an ngah a phu mi can kan pek a ttulzia ka vun theifiang.

Hringnun ahhin innsang tluk ih thupi thil dang a um lo. Na innsang pawl kha an ngah a phu mi can pe aw. Ziangahtile cumi pawl cu "lehhnu ah" ti ih tthawn a theih lo mi thil an si.

Hram: Myanmar Sarpadithar.