Zangzel pawl hrang Thazang Laknak

Zangzel pawl hrang Thazang Laknak

Kan mino zangzelpawl hrangah zethel zet ih ruat phah ding in Hong Kong milian tontaw Lee Ka Shin ih ttongkam pawl lo sim ka duh.

#20/80 Kalhmang

Minung zatek 20% in an hngawng tlunlam in paisa an hawl. Zatek 80% cun hngawng hnuailam in paisa an hawl.

Zatek 20% in caan an lei ih, zatek 80% in caan an zuar.

Zatek 20% in hnattuan picang an ttuan ih, 20% cun hnattuan menmen an ttuan.

Zatek 20% in hmailam caan hrang ruahmannak an tuah ih, zatek 80% cun zinglam an thawh hnu lawng in tuini ziang ka tuah ding timi an ruat.

Zatek 20% cun anmah le anmah an thleng danglam aw ih, zatek 80% cun kiangkap boruak an thleng danglam.

 Zatek 20% cu an neinung ih, zatek 80% cu an rethei.

Nang zatek 20% maw na si ding, zatek 80% sawn?

#A Pathumnak Nazi 8

Pathian in minung hmuahhmuah hi bangrante'n ni khat ah nazi pariat vei thum in pe thluh.

A pakhatnak nazi pariat ahcun hna kan ttuan cio. A pahnihnak nazi pariat ahcun kan it cio.

Minung pakhat le pakhat karlak ih danglamnak suaktertu cu a pathumnak nazi pariat in lai a rel ttheu tlangpi.

#Lamzin Pahnih

Mi hmuahhmuah in zawh ding mi lamzin pahnih kan nei. Lamzin pakhat cu zawh lo theih lo lamzin a si. A dang lamzin pakhat cu mai' fehnak ding ih hril mi lamzin a si. Zawh lo theih lo ih zawh ttul mi lamzin kha mawi zet ih na zawh hnu lawng ah na zawh duh mi lamzin ah na feh thei ding.

#Vei Khat Daih Zumngamnak

Zumngamnak timi cu cahnah pakhat vek a si. A kir siaisiai zo hnu cun pharh rero sal khal awla a kel a awh thei nawn lo.

#Sirawknak

Tuihnu kum 20 a rei tikah a lo riahseter sawntu ding cu na tuah mi thil pawl hnak in, na tuah ngah lo mi thil pawl sawn an si.

#Hmun

A-dai (theiti) lang khat khi lamzin sir ah fang hra in an zuar. Asinan hotel ahcun sawmthum in an zuar. Minung pakhat ih manmual khal a thlennak hmun parah a tthum aw ve.

Hram: Irrawady thuthangca ih Naing Suan ngan mi "Bawa Aungmin Yae Sarsu Myarr – 15."