Nu, Ka Lo Ngai

Nu, Ka Lo Ngai

Leitlun nisuahlam ihsin nitlaklam ah, thlanglam ihsin saklam ah veivak rero ih nun ka hmannak kum le can hi a mal nawn lo. Ni khat hnu ni khat ka upat vivo rual in, ka hmuh le theih mi theihfimnak khal an pung ve vivo. Leitlun khawte hi nuamtete'n a bi vivo. Khatlam ah, ka suahsemnak hmun ih um mi ka nu cu ni khat hnu ni khat a tar vivo ve.

Kan dunglam kum (20) ahkhan ka suahsemnak hmun ih tlangleng cawlhhmun ihsin leilungpi hliakhlai ding ah ka ke ka kar thok. Kum (20) sungah Beijing ihsin Shanghai, Guandong ihsin Hong Kong, New York ihsin Washington, Thlangta America ihsin Thlangta Africa tiang, cumi hnu ah London ihsin Sidney ah hnattuan phah in ka tawivak vivo. Ka thlen dahnak ram khal ram (20) lenglo a si.

Hmunram thar ka thlen tinte'n thinlung thar le kiangkap boruak thar thawn rualrem ding in ka rak thleng aw thiam mai ttheu. Asinan ka thinlung in ka nu a ngainak cu ziangtik hman ah a thleng aw thei dah lo. IP phone card pawl an hung suah hnu lawng ah ka nu ka phone leuhleuh thei thlang. Phone sungih ka nui' aw zaidam cun hringnun ih ngenngiarnak pawl ka hmaton theinak ding ah thazang in pe sinsin.

Ka nui' aw cu kum khat hnu kum khat an tar vivo. Ka nu thawn phone ih kan biakawk tinte'n harhdamnak ngaihsak ding, amah ruat har lo ding, khuitawk khal ah ralringtei' veivah ding, hnattuan cawlh la ih ra tlun lo ding, ra tlun cu sumpai a cem tam tuk ih hnattuan khal a bahlah ding thu tivek cop le cop ah in cah ringring. Cutikah ka thin a nuam lo. Ka nu in i ngai thlang, i hmu duh thlang ti ka thei.

Ka nu cu kum (75) a si thlang. Curuangah ka kut ih um mi hnattuan pawl ret hrih in, ka thinlung ih ka ruahman cia mi pawl khal ka tthulh ih, ka nui' hnenah thla khat sung va tlung ding ah thutluknak ka tuah. Cumi thla khat sung cu zianghman ttuan lo, zianghman ruat lo in ka nui' kiang ah ka um tum. Ka ra tlun ding thu phone thawi' ka nu ka sim thluh cun, ka nu cun ruahmannak a tuah thok cih. Hminsinbu pakhat thawn ka ngainat mi ei-in pawl a hminsin, ka nauhak lai ih ka duh mi tangphah (ihphah) a tthi ttha sal, ka um sungih ka hruh ding mi hnipuan pawl tuah phah in ka nu cu a rak buai zet ti lehhnu lawng ah ka thei sal.

Kum (75) a si zo mi ka nu, a cangvaih tam tuk can ih bangcau thei zet ka nu cu ka ra tlun ding hrangih timtuah in bang ding hman a hngilh zo ti ka thinlung in a tep ngah. Ka nu ka ton cun ka tlan ding ih ka va pom ding ti'n ka suangtuah ih vanzam parah cun ka hlim zet. Asinan kan tonawk taktak ahcun tlan turto in ka va pom lo. Inn sangka ihsi in rak hmuaktu ka nu cu thingkung ro tar vek a si thlang. A hmai ih vun kir rin pawl ruangah a hlan ih a hmel thawn an bang aw nawn lo. Ka nu a rak tar nasa zo si hi maw!

Inn ka thlen vete'n ka nu cun a hlan ih ka rak ngainat ttheu mi rawl pawl a suang thok. Asinan cuvek rawl pawl ka ngainat nawn lo thu cu ka nu ka sim lo. A mit a tthat nawn lo ruangah rawlhmeh pawl khal a al an um ih al lo an um. An thawtnak in tuihlan a bang nawn lo. Ka hrangih in tuahsak mi tangphah khal patpar hlir rori ih tuah mi puan sah zetzet an si. Cuvek puan sah zetzet thawi' ih khal ka thiam nawn lo. Asinan, patpar puan si lo in tuuhmul puan nem tete lawng ka hman thlang thu cu ka sim hran lo. Ziangahtile ka ra tlunnak san cu ka nu ka ngai ruangah, ka nu ka ton duh ruangah a si.

Inn ka thlen pek ni hnih ahcun hnattuan ih a buai ruangah ka nu thawn tthate'n kan titi tlang man lo. Thu a rel khalle minung ih sidan pawl, minung hringnun thuhla pawl lawnglawng a rel rero. Cuvek pawl cu kan dunglam kum (10) hrawngah cop le cop ih a rel dah zo mi an si. Cuvek thuhla pawl cu ka nun le hnattuan thawn khaikhin phah in a rel rero. Ka thin a hnok thlang can ih, cuvek thuhla pawl cu san an man nawn lo thu ka sim pang tikah ka nu cun daite'n hmun pakhatkhat a zoh ciarci ttheu.

Ka nu cu a mit an rau thlang ruangah rawl a suan khal ah thianfainak lam a ngaihsak nawn lo ti ka hmu. Ka nui' suan mi rawl ahcun vei hnihkhat ah pangang, thothe tivek an tel phah ttheu ih, zial parih rawl le hmeh an fuan khal ah sar sal in kheng sungah a ret sal ttheu. Boruak umdan cu tuihlan thawn an bang aw lo. Inn ah rawl suang lo in dawr an kan ei ding ka ti tikah, a lenglam ih rawl pawl cu an borhbah thu, harhdamnak thawn an milawk lo thu i sim. Rawl suangtu ka lo hawlsak ta ding ka ti khalle, "Ka cangvai thei lai. Ka tar hrih lo," ti'n ka parah a thin a heng lamlam. Khawpi sungih ka feh tikah thlun ve i duh. A netnak ahcun, ka nui' kekar ruangah ka duhnak khal kan thleng thei lo.

Thuhla pakhatkhat kan relkhawm tik khal ah ka ruahdan pawl cu an dik lo ih, lamzin dik lo ka thlun zo tiah a ruat. Kei khal in, ziangkim hi santiluan thlun ih an tthansoh thluh zo thu hmaisong lo zet in ka sim ve.

Lehhnulam ih ka nu thawi' kan biakawk tinte'n , ka nin thlang cin cun thuhla dang ih pialpi hrim tivek ka tuah phah ttheu. Ka thin a tawi can ih ringpi ih ttong hrim, ttong bawhcahsak tivek ka tuah pang tikah ka nu cun a ttong lai mi cu cawl in, daite'n a um ciarci ttheu.

Cawlh ka lak can thla khat a kim ih ka tlun zawng ah, ka nu cun ihkhun hnuai ah thingkuang hlun pakhat sungih kum tampi a rak retkhawm mi thuthangca cahnah them pawl in pe. Cui thuthangca cahnah them pawl cu ram leng ih ka thlen lai ah, ka thlen dahnak ram ih a cang mi thuthang pawl an si. In hmuh leh ding in ka nu in cui thuthang pawl cu tthate'n a rak cep thla ih a rak kilkhawi. Ka nu cun thuthangca cathem pawl cu ka kut ah i pe ih, ka phurh a duh.

Mitkharh sah bembem kharh in harsa zet ih ca siar ttheutu ka nu in thuthangca cahmai tin siar thluh in cumi cathem pawl cu ziangtluk ih harsa in a rak cep thla ti ka thei. Asinan a ttangkai lo mi cui' thuthangca pawl cu ka keng paih fawn lo. Ka ruat buai lai fang ahcun ka nui' kut sung ihsin cathem pakhat a tla. Ka nu cun keimah hnakih rang in a sar ih a kor zalte sungah a san.

"Ziang cathem si nunu, in hmuh awla."

Ka nu cun awloksong deuh phah in i pe ih, coka ah a feh cih.

Cui cathem cu ka vun siar cih.

"Ka Tar Tikah" ti ih thulu tar mi, 2004 kum, December 6 ih cahram tawite pakhat a si. Cahram ahcun:

"Ka Tar Tikah"

"Ka tar tikah a hlan ih keimah kha ka si nawn lo. In theithiam awla, thinsaute'n i be aw.

Ka kut ttawnttai pawl ruangih ei-in pawl ka hnipuan parih ka burh ngah pang tikah siseh, kedam hri sih ding ka hngilh can ah siseh, i ten hram hlah. Na nauhak lai ih ka rak lo zirh mi pawl kha zangfahte'n in mansuah sak hram aw.

Ka rel dah mi thuhla cop le cop ih ka rel sal pang khal ah ka ttong botcat lo in, zangfahte'n i ngaisak aw. Na nauhak lai ah zan ih pek tinte'n zan thawng khat le zan khat thuanthu pawl tthing lo ding ih lo sim in ka lo thlim mi pawl kha in vun mansuah sak hram aw.

Ka cangvaih thei lo ih, tidai bualawk bom ka ttul can ah i ning hram hlah. Na nauhak lai ah lem phah, kawk phah ih ka lo khawlh lai kha na mitthlam ah i vun hmuhsak hram aw.

San thar, thiamnak thar pawl ka theihthiam lo khalle i hnihsan hlah. Na nauhak lai ah "Ziangruangah?" timi thusuhnak hmuahhmuah thin sau zet ih ka lo son sal mi kha vun mangsuak hram aw.

Ka thinlung ih duh vek in ka taksa an cang thei nawn lo ih, ka feh thei nawn lo can ah, a cak mi kut thawn i kuah aw. Feh na thiam pek lai ah kar khat tete ih ka rak lo zirh dah mi kha zangfahte'n i vun mansuah sak hram aw.

Kum upat ruangah ka ttong rero lai mi thu dung thu hmai rual aw lo in, hngilh mi thuhla ka neih tikah can pe ih ruat sal i siang hram aw. Ka rel mi thuhla pawl cu ka hrangah an thupi lo. Ka kiang ihsin ka ttong mi hmuahhmuah i ngaisak cun ka di a riam zo.

Ni khat hnu ni khat a tar vivo mi keimah zoh in na lung ngai hlah. I theithiam aw, tha i pe aw. Tuihlan ah hringnun kaisohnak hrangih lam ka rak lo hruai vekin, tui can ah ka nun ih can netabik pawl hrangah i umpi aw. Duhdawtnak le hahdamnak pawl hi hni siamsi phah in ka cohlang ding. Ka hnih siamsinak ahcun a cem thei lo mi ka duhdawtnak pawl na hmu ding. "

Ka mitthli for lo ding ih sup ttentto phah in a cem tiang ka siar. Ka khualtlawn dip ihsin hnipuan tthabik kop khat ka tanta ih cui' cathem pawl cu ka san. Cathem dang pawl cu ka hrangah an ttangkai lo nan cui' cahram a tel mi cathem cu khuitawk hmun ka thlen khal ah ka hnenah a um ringring.

Tu tiang in, thlalang kawm sungih ka ret mi cathem cu ka casiarnak cabuai parah a um lai. Keimah vekin mai' suahsemnak ram suahsan ih nu thawn  a hla aw tu pawl hrangah cui' cahram cu ka run tarlang sal a si. Na nu na phone ringring thei lo hman ah, ni thupi le can thupi pawl tal ah phone in na ngai thu, na harhdam thu, a suanrawl na ei hiar thu.......

Link bulhram:
http://gate.sinovision.net:82/gate/big5/blog.sinovision.net/space/do/blog/uid/53521/id/156383.html

Lehnak: Nine Nine Sanay ih "Laylwintthu Tayauk ei Lonsotmhu."