Pathian in A Lo Duh Lo Na Phang Maw?

Pathian in A Lo Duh Lo Na Phang Maw?

Pathian in a lo duhlonak ding san tampi an um. Asinan thinphang hlah. Na dinhmun a ttha ko.
Moses cu a aw a hak.
David ih ralthuam cu a hruh tawk a si lo.
John Mark cu Paul in a rak hnong.
Hosea ih nupi cu hlawhhlang a si.
Amos ih zirnak neihsun cu theipi kung kilkhawi lawng a si.
Jacob cu mi bum hmang a si.
David cu ttangttawm sualnak pakhat a tuah dah.
Solomon cu a neinung tuk luar.
Abraham cu a tar tuk.
David cu a no tuk.
Timothy cun pum nat a nei.
Peter cun thih a ttih.
Lazarus cu a thi.
John cu mai hmakhaw sialtu a si.
Jesuh cu a rethei tuk.
Noami cu nuhmei a si.
Paul cu tualthattu a si. Moses khal cu thotho.
Jonah cu Pathian hnen ihsin a tlan.
Miriam cu thuzilzuang thehdarhtu a si.
Gideon le Thomas cun rinhlelhnak an nei.
Jeremiah cu a beidong ih mahte thahawk duhtu a si.
Elijah cu a caurau tuk.
Tihnimtu John cu a luruh a ring tuk.
Martha cu thinhar hlephlep a hmang.
Mary cu a zangzel.
Samson cu a sam a sau.
Noah cu zu a ri dah.

Moses cu mi thin tawi a si ti ka rel ngah maw? Peter le Pual khal an thin a tawi ih, mi thin tawi an tampi.

Asinan Pathian cun hnattuan tonsuhnak (job interview) a ttul ve lo. Anih cun hnattuan neitu (boss) tamsawn ih mi rawih dan vekin mi a ruai ve lo. Ziangahtile anih cu kan hnattuan neitu hnakin kan pa a si sawn. Anih cun sumpai hlep le sunral lam a zoh lo. Anih cu ngaih lo cia mi le mi thleidan nei a si lo. Cuai thlai ding hlir hawl hmang, zah lo zet ih mi zoh, hngirtteu phah ih mi hro, hngalhngawng zet ih mi biak tivek a hmang lo. Kan au-aw hrangah a hna a set lo ih, kan ttulhai mi hrangah a mit a caw lo. Kan zuam thei zat in, Pathian ih laksawng cu a lak in ngah theih an si.

Kanmah cu mi maksak si lo khal sehla, mi maksak pawl hrangah thil maksak tampi kan tuah thei.

Satan cun, "Na tling lo," in ti.

Jesuh in, "A poi lamlam lo. Keimah ka um," a ti.

Satan cun dunglam a thlir sal ih kan diklonak pawl a hmu. Pathian cun dunglam a thlir sal ih Thinglamtah a hmu. Pathian cun na pianthar hlan ah ziang na tuah timi a zoh nawn lo. Cumi cu hminsin khal an si nawn lo.

A si ko. Pathian ih in duhlonak ding san tampi a um. Asinan Amah thawi' kan duhdawtawk ih, kan thawthawt neta ding hnakih Amah kan hal sawn ahcun, zo kan si khal ah, khuitawk ih rak um dah kan si khal ah, ziangvek hmel pu kan si khal ah, in hmang ding a si.

Bikhiah (limit) theih mi na dinhmun ihsin bikhiah rual a si lo mi Pathian ih sinak sungah feh lut aw.

Hram: Christian Life Stories ih "What If God Didn't Want You."