Ka Nu in Mit Pakhat Lawng A Nei

Ka Nu in Mit Pakhat Lawng A Nei

Ka nu cu mit pakhat lawng nei a si. Ka hua zet. Ziangahtile zahpi a um. Ka nu cun innsang cawmawknak hrangah tlawngta le zirhtu pawl hrangah rawl suang in a hlawh aw.

Hramthok Tlawng ka kai lai ah, ni khat cu ka nu in i ra veh. Ka nu a rat tikah ka ning a zak tuk.

Ziangtin hivek hi ka parah a tuah thei? Ka nu cu ka ngaihsak duh lo ih, hua zet in vei khat ka zoh hnu ah ka tlansan. A thaisun ih tlawng ka kai tikah ka rualpi pakhat in, "Ee, na nu cu mit pakhat lawng a nei ual!" i ti.

Keimah le keimah phumhlohawk mai ka duh. Ka nu hi hlo vuarvi mai sehla ka duh fawn. Cumi ni ahcun ka nui' hmai ah ka feh ih, "Mi ih hnihsan men ding ih i tuah ding hnak cun, thi mai awla a ttha sawn lo maw?" ka ti.

Ka nu cun i sawn lo. Ka thin a heng tuk ruangah, ka ttong mi cu ziangvek a si ti khal ka ruat sal thei nawn lo. A tuar dan ding lam ka ngaihsak lo lawlaw.

Kan inn suahsan lohli ka duh. Ka nu thawn um tlang ka duh nawn lo. Curuangah ca ka zuam ciamco ih, hmun hlapi ah zirnak peh thei ding in canvo ka ngah.

Cu thluh ah nupi ka nei. Inn pakhat ka lei. Fa tla ka run nei. Ka nun, ka fanau pawl le ka boruak hahdam ruangah ka lung a awi. Cumi lai ah, ni khat cu ka nu in i ra tlawng. Ka nu in i hmuhlonak a rei zet thlang ih, a tu le pawl khal vei khat hman a hmu hrih lo.

Sangka ih ka nu a din tikah ka fa le pawl in an hnihsan. Sawm lo cing ih a rat ruangah ka nu cu ka kawk. A hmai ah, "Ziangtin ka inn ah ra in ka fa le pawl na ra ttihtthaih ngam! Suak lohli aw! Tu rori ah!" ti'n ka hro.

Cutikah ka nu cun dimte'n, "Aw, poi ka ti tuk. Ka feh tumnak inn ka theih sual a si men ding," a ti. Cu thluh cun a feh liam.

Ni khat cu kan tlawnginn ih tlawngta hlun pawl tonkhawmsalnak puai sawmnak ca a ra thleng. Curuangah ka nupi cu hnattuan ttulhai ruangah khual ka tlawng ding ti in ka bum. Tonkhawmsalnak puai kan ttheh tikah ziangvek a rak si lai ti theih duh menmen ah kan inn hlun cu ka va hliakhlai.

Venghnen pawl in ka nu a thih zo thu in rak sim. Ka mitthli for khat hman a for hran lo. Venghnen pawl cun ka nu in ka siar ding ih a duh mi cakuat pakhat in rak pe.

"Ka duhdawt bik mi fapa,

Na thuhla hlir ka ruat ringring. Na inn ah ra in na fa le pawl ka ra ttihtthaih kha poi ka ti.

Tlawngta hlun tonkhawmsalnak puai ah na ra ding ti ka thei ih ka lung a awi tuk. Asinan nangmah lo tong ding in ka ihkhun ihsin ka tho thei nawn lo tla a si thei. Na tthanlen vivo lai ah na hrangih ningzah thlak ka si ringring ruangah ka riah a se zet.

Himi cu maw......naute na si lai ah na tuahmawh aw ih na mit pakhat a siat. Nu pakhat ka si bang in, mit pakhat lawng thawn na hung tthanlen ding cu ka tuar thei lo. Curuangah ka mit ka lo pe.

Keimai' pek mi mit thawn, hmuh theinak thar a neisaltu fapa ka lo neih hi ka uang aw zet.

Ka duhdawtnak hmuahhmuah na hrangah hlan in,

Na Nu."

Hram: Ngantu theih lo ih "My Mom Only Had One Eye."