22 September, 2016

Na Sulhnu Tanta Aw

Na Sulhnu Tanta Aw

Na rak thei dah maw?

France ram in English miphun an neh lai ih France ralkapbu kaihruai in, a hmaisabik  ah rang thawn a tlan rero mi Joan of Arc kha cumi lai ah kum 17 lawng a si.

John Calvin cu kawhhran thuanthu ih hminthang "Institutes" cabu a suah lai ah kum 26 lawng a si lai.

English biazai khawvel ih William Shakespeare sangtu John Keats kha a thih ah kum 26 lawng a si.

English calai ih rotling kutsuak a si mi "Ode bezai pawl" ngantu P.B. Shelly kha kum 30 a si ah tidai ah a pil that.

Sir Isaac Newton cu 'hiptha ih dan' (law of gravitation) thuhla tamsawn a hmuhsuah lai ah kum 23 lawng a si lai.

Amerika Dingkhawm Ram ih ramkheltu hminthang Henry Clay cu kum 29 a si ah Senate palai a si ih, kum 34 a si ah House of Representatives ih Hruaitu a si.

Zuk suaitu hminthang Raphael in a zuk thupi bik pawl a suai lai ahkhan kum 25 le 30 karlak a si.

Awnmawi khawvel ih hngilh dah lo ding mi Mozart cu kum 30 tiang lawng a dam.

Taktak ahcun, kan lakih mi tamsawn cun hivek mi cungcuang pawl ih hlawhtlinnak vek hi kan ngah thei lohli lo ding ti a fiang. Asinan mi tampi cun tu ih an tuah zo mi hnakih tam rak tuah ding an si nan, tiah an ruat aw. Ka no lai ah thil cangsuak ding ih tuah ka rak duh. Asinan kum malte a rung rei tikah, keimah ka sinak ah diriam in, thil an cansuah lai rak zoh hi ka hrangah a ttha sawn ti ka theisuak. (Tu ah tla cun ziangtin thil an cangsuak ti ka theihthiam lo mi an tampi!)

Himi hin ziangtinkim, mi timkim hrangah can a um timi in mangsuakter. Rah ttha kan rahsuah can a ra thleng hrih lo tla a si thei. Kan tuahttuan mi ttha bik simaw, kan umnak ding hmun ttha bik simaw, cu lehhnu deuh ah kan tong tla a si thei.

Colorado ramkulh ih aspen thingkung pawl khi an tthang cak zet. Rockies tlangtluan ih a thleng leuhleuh mi hramlak meisa kang in a siatsuah hnu ih, hung tthanglian hmaisa bik cu aspen kung pawl an si ttheu. Ram ro kha hramlak ah an canter lohli ih, a tthang cak lo deuh mi far kung pawl hrangah hnemdai an tuahsak. Far kung pawl cu an tthang cak lo deuh nan, aspen hnakin an nung sau. Thingkung pakhat cio in anmah le can an nei.

Minung pakhat cio khal ah cuvek a si. Mi tthenkhat cu an rahsuak lohli. Asinan mi tthenkhat lala cun lehhnu kum reipi ah rah ttha tamsawn an nei ve thung.

Tui can ah nangmai rahsuah can a thleng hrih lo a si khalle, thinphang hlah aw. Na tuahttuan mi le na thinlung phumnak kha khimkhuahte'n ngaihsak aw. Beidong hlah, thinsau suah aw. Ziangahtile tthanlennak timi hi a muangcang thei. Thlipi le natnak pawl hi mi siatsuahtu an si ko nan, lo normawhtu le lo cak sinsintetu khal an si thei ti kha cingkeng aw. Tthatei' na somsohawk ahcun, a can a kim tikah rah bawr zet na nei ve ding.

Ziangtinkim le mi timkim hrangah can a um. Cule, ttuan thok ding can cu tui can hi a si.

Hram: Steve Goodier ih "Leaving Your Mark."
http://www.agiftofinspiration.com.au/index.shtml


No comments: