Nun Pali Kom – Minung Nun
A ni khatnak ah Pathian in uico a sersiam. Cule, uico hnenah, "Na inn sangka kiangah sunvu in to awla, a ratu asilole a fehliamtu pohpoh rak bo aw. Damkum kum 20 ka lo pe ding," a ti. Cutikah uico cun, "Bo-bo-bo ti ringring mennak ding ahcun kum 20 cu a rei tuk. Kum 10 lawng i pe aw, kum 10 cu ka lo khirh sal ding," a ti. Cumi cu Pathian in a lungkimpi.
A ni hnihnak ah Pathian in zawng a sersiam. Cule, zawng hnenah, "Minung pawl nuam le hlim ding in tuah aw. Zawng thiamnak pawl suah awla, hniter hai aw. Damkum kum 20 ka lo pe ding," a ti. Cutikah zawng cun, "Zawng ih thiamnak tuah rero mennak ding ah kum 20 maw? A tthat ka zum lo. Uico in kum 10 a lo khirh, kei khal in cuti si thotho seh, a ngah maw?" a ti. Cumi cu Pathian in a lungkimpi.
A ni thumnak ah Pathian in caw a sersiam. Cule, caw hnenah, "Lothlopa thawn loram ah sunvu in na feh pei ih, sun nisa tuar in lei na let ding. Cu thluh ah, lothlopai' hrangah cawhnawi na pe ding. Damkum kum 60 ka lo pe ding," a ti. Cutikah caw in, "Cutluk ih nun harsa rori kum 60 sung hmanter i tum cu a fuh lo. Kum 20 lawng ka la ding ih, kum 40 cu ka lo khirh sal ding," a ti. Cumi cu Pathian in a lungkimpi.
A ni linak ah Pathian in minung a sersiam. Cule, minung hnenah, "Ei aw, itthat aw, lek aw, nupi nei awla, na nun hi cen aw. Damkum kum 20 ka lo pe ding," a ti. Cutikah minung cun, "Ziangtin? Kum 20 lawng maw? Hitin siseh: ka neih mi kum 20, caw in a lo pek kir mi kum 40, zawng in a lo pek kir mi kum 10, le uico in a lo pek kir mi kum 10, kha ka la ding. Cuti'n kum 80 a si ding, a ngah ko maw?" a ti. Pathian in, "Awle. Ka lo lungkimpi," a ti.
Curuangah kan nun ih a hmaisa kum 20 sung cu kan ei, kan itthat, kan lek, kan nun kan cen. Cumi thluh kum 40 sung cu kan innsang somdawl in ni sa hnuai ah sal kan ttuan. Cumi thluh kum 10 sung cu kan tu le pawl lungawiter ding ah thiamnak hnihsuakza phunphun kan tuah. Cule, a netabik kum 10 sung cu inn sangka hram ah to in, kan hmuh mi pohpoh kan rak bo ttheu.
Nun tarlangtu thuanthu awmang zet pakhat cu a si ko hih.
Hram: The Living Treasure.
No comments:
Post a Comment