26 September, 2016

Vanneihnak Hleice

Vanneihnak Hleice

Kum ruk ka si lai ih ka nu in i rak pek mi dollar hnih ca hi ka paisabawm ah ka ret ringring lai. Thuserh nei ka si hran lo nan, kan fehnak tinkim ah dollar hnih ca cu ka keng tel ringring.

Cui' dollar hnih ca cu vanneihnak in ka fehnak tinkim ih i thlun ringring theinak ding ah ka nu in i pek mi a si. Ka nu in cumi i pek lai ah i zoh phah in, "Vanneihnak hleice na neih theinak ding ah himi hi keng ringring ding ah ka lo duh," tiah i sim.

Kei khal in, "Ka lungawi, ka nu. Ka kol ringring ding," tiah ka sawn.

Zing tinte'n hnipuan ka thleng tikah ka zalte ah dollar hnih ca cu ka ret ttheu. Ka nu cu kum 17 ka si lai ah mual a liam. Cumi ttum ah ka dollar hnih ca cu ka phorh ih, ka kut ah rei zet tiang ka hum ringring. Cutikah ka nu cun a tang lai mi ka nun lamtluan hmuahhmuah i run thlir ringring ding ti theihnak ka vun nei.

Nekcep buainak ka ton tinte'n dollar hnih ca cu ka phorh ih, ka cabuai ah ka ret ttheu. Nazi tampi sung cumi ka zoh ringring tikah, cinfelnak pakhatkhat ka polsuak thei ringring. Hnattuan ih ka luh hmaisabik ttum ah kum 30 ka si ih, ka ning a zak zet. Hnattuan ding ih tonsuhnak (interview) timi hin i ttihtthaih ciamco. Asinan ka tuah a ttul fawn. Tonsuhnak hmaisabik nei ding ih ka va feh tikah, hngahawknak room ah ka va to. Cutikah ka hmai ah nunau panga an um ti ka hmu. Cui' nunau pawl cu kei hnakih no le mawi zet ih thuamhnaw hruh an si thluh. An lak ih pakhat tla cu tangphaw rong thawn a ttial mi hnipuan, amah thawn mil aw zet mi paisabawm le kedam pawl thawn, soisel bo a si ko. An thiamnak le tontehnak ngan mi pawl an sau zia ka hmuh tikah, cui' nunau pawl thawn kan linglet verver ti ka hmu fawn.

Tawkfang ah zung manager Mrs. Martin in i run ko.

Ka vung lut tikah, "Himi hnattuan hrangah tling ih na theihawknak ziangmi a si?" tiah i sut.

Kei cun, "Himi hnattuan hi ka hrangah a ttul zet ih, tuah thei lo mi ka nei lo," tiah ka sawn.

Thusuhnak dangdang i sut vivo hnu ah tonsuhnak cu a cem. Zung ihsi ka suah zawng ah, dunglam ka her sal ih, "Mrs. Martin, hnattuan ra diltu dang tluk cun ka tling lo ti ka thei. Asinan canvo i pe hram aw. Thil ka zir lohli thei ih, na hnattuantu ttangkai zet ka si thei," tiah ka sim ta.

Lungawithu ka sim hnu ah caurau zet in ka tlung. Thaisun cu ni danglam a si ding tiah ka ruat. Zan ih ka ihkhun ka pan zawng ah, ka phone a rung lut ih, Mrs. Martin a rak si.

Mrs. Martin cun, "Gina, hnattuan diltu lakih tling bik cu na si lo. Asinan rinsanawknak na neih tuk ruangah, a tak ih na langter theinak ding ah canvo lo pe ding in thutluknak kan tuah," tiah i sim.

Ka zum ban lo tuk mi a si ruangah ring zet ih au phah in, ka room sungah ka tlan kual ciamco. Cutikah Mrs. Martin ih hnih rero awn ka vun thei ih, phone ka rak thla hrih lo ti ka vun mangsuak thutthi.

"Mrs. Martin, ka lung a awi. Himi thutluknak ruangah cun na sir aw lo ding tiah ka lo kam," ti phah in phone ka thlak.

Cu thluh ah ka paisabawm ka la ih dollar hnih ca ka vun phorh.

Ka nu in a theih theinak ding ah ringpi'n, "Ka lungawi, ka nu. Hlawhtling ko in ka zuam ding," tiah ka au.

Cumi can ciah ah, ka nu in kan unau zate'n mileng pindan ah ko khawm in, "Ka ruahnak ahcun nan zate'n mi turu hlir nan si. Asinan vei khat nan hlawhsam tikah beidong hlah uh. Hlawhsamnak hi ttih hlah uh. Zuam sinsin ding ih in tuahtu a si. Nan hlawhtling ding tiah ka lo tiamkam," tiah in sim lai kha ka vun mang dukdi.

Tuini tiang in, ni tinte'n ka nu ka ruat ringring ih, dollar hnih ca khal ka paisabawm ah a um ringring lai. Kum tampi rei hnu ih innsang tonawksalnak kan neih tikah ka unau hmuahhmuah khal in an paisabawm ah dollar hnih ca an rak ret cio ti ka hmu. Kan zate'n kan hni ih, kanmah pakhat cio hrangah kan Nu ih in pek mi laksawng ih sunlawizia kan rel hai. Dollar hnih ca cun kan Nu in kan sungih a rak thun mi rinsanawknak kha a tharthawh sal ringring ttheu a rak si.

Hram:  Eugenia Lampley ih "Extra Good Luck."


No comments: