Helen Keller – Thawtkhumnak Bulhram Pakhat
1920 kum ih thlatang khawsik zet can ah a si. New York khawpi ih thilri phosuahnak hall lenglam ah minung tampi cun ticket lei ding in an hngak vialvial. Hall sung ih um mi manager cu a lung a hmui nasa zet a bang. Minung tamngaipi an ra thleng. A ruahsan mi hnakin an tam sawn. Cumi ni ah thil thar pakhat an phosuak.
Puanzar a khai aw. Donsang cu inn ih mileng pindan vekin an tuah. Piano kiangih to mi mipa kum no lai pakhat cu a hung ding ih mawi zet in a lu a kun. Cu pa cun nu zah-um zet, kum 40 mi hrawng cu mipi hnenah theihternak a tuah. Cu nu cu Anne Sullivan Macy a si. Anne in thutawi a sim. A aw thlum zet cu mi hmuahhmuah in lunglut zet in an rak ngai. Lehhnu ah mawi zet ih thuam aw mi le zoh a rem zet mi nunau dang pakhat cu donsang parah a hung feh. Anne in a za a rak beng. Cumi nunau cun mipi pawl zoh phah in a ding lawk.
Tawkfang ah cumi nunau – Helen Keller – cu a ttong thok. Ttongfang pakhat cio ttongsuak ding in harsa zet in a zuam rero. A ttong mi kaih ngah thei zuam in mipi khal an talbuai ve. Asinan ttha zet in an hna an thong ringring thotho. Helen in a ttong a ttheh tikah hall pumpi ahcun zabeng awn a thangkhawk ruahro. Annih pahnih hi, cumi san lai ahcun America ih mi hminthang bik lakah an tel ve. Anne Sullivan cu fimthiamnak zirhtu le misenpi canvo lam ih tlangautu ralttha a si. Helen Adams Keller cu hnaset le mitcaw a si ih, Anne ih tlawngta a si. Kuttualleisam a si ko nan cangantu, nunau zalennak hrang cangvaitu le zatlanglam hnattuantu dinhmun ih mi hminthang ah a tuahsuak aw thei.
Misenpi cu Helen ih ttong mi in nasa zet in a hngong. A ttongkam cu a tawizawng cun hitin rel a theih: "Ka sayama khan ziangtivekin a ttongkam kam khat in ka thluak ih khawthim a run hlip kiang ih, hringnun ih lungawinak maksak hmu ding in ka hung tthangharh thei timi a lo sim. Ttong thei lo ka rak si ih, tu ahcun ka ttong thei. Ka ngah mi hlawhtlinnak hi midang pawl ih kut le thinlung ruangah a si. An duhdawtnak ruangah ka thluak khawruahnak ka hawl hmuh thei phah, Pathian ka hmuh thei phah ih, lungawinak ka hmuh thei phah. Taktak ahcun, kan zate'n midang bawm ding le bom mi si ding ah a nung mi kan si. Ttangrual ih kan ttuan ringring ahcun thil tampi kan tuahsuak thei. Duhdawtnak lawng hi kanmah le lungawinak karlak ih a ding mi hruangkulh siatbal theitu a si. Thupek ropi bik cu pakhat le pakhat duhdawtawk ding hi a si. Duhawtnak, lungawinak le ka hnenih a ra thleng lai ding mi hmuahhmuah ruangah ka neih mi aw ring bik thawn Pathian hnenah lungawithu ka sim."
Ziangruangah Helen Keller in khavek thuhla a sim? Helen le a sayama in an nunnak hrangah paisa an ttul. Sumpai ngah theinak ding ah himi tonawknak hi an timtuah mi a si. (Mipi hnenah nun zirhnak hmang in, zirh man ngah an tum mi a si). Asinan mipi pawl cu zirhnak ngai ding hnakin 'a nung mi thilmak' ra hmu ngah ding ih ra an si sawn. A tamsawn cun sersiam mi danglam hleice ra zoh hiar ruangih ra mi an si. Asinan Helen Keller ih sunlawinak cu, cuvek ih nautat-zohniamnak pawl hmuahhmuah kha, taksalam ih tlaksamnak a nei mi pawl in canvo an ngah theinak ding ah, ralttha zet ih a donak ahkhan a um. Taksalam ih tlaksamnak a nei mi pawl khal in zaran minung pawl vekih nun theinak canvo an nei a si timi a phuang.
Helen cun amah vek minung pawl hrangah milaipi zawnruahnak le bangrannak a dil. Curuangah tuini tiang khal ah, harsat vansannak tampi hlawhtling zet ih a rak dotu Helen ih nun hi minung million tampi hrangah thawtkhumnak le zuamduhnak petu a si ringring lai.
Thilmak hlir in a khat mi Helen Keller ih nun hi taksalam ih tlaksamnak a nei mi le hmuhsuam nautatnak phun khatkhat a tuartu pawl hrangah thazang petu a si. A nunnak cem tiang in cuvek minung pawl hrangah a pum a pe ih a ttuan ringring.
Hram: Helen Keller – A Source of Inspiration
https://immstories.wordpress.com/category/short-story-of-great-person/
No comments:
Post a Comment