Laksawng Thlengawknak
"Laksawng thlengawknak ihsin ka ra tlung sal ciahciah si lawm."
"Na duh lo mi lo pe ngahtu an um maw?"
"Um lo e. Ka ruahsan zat hnakin ka ngah tam sawn."
"Cu cu a hleifuan rori'n laksawng na ngah si pei cu?"
"Si lo. A tam hleifuan ngah tivek a um thei lo," tiah thungai thlak zet in i sawn sal.
"Ka thluak na hnokter. Laksawng thlengawknak nan tuah ih, na hman cawk lo ding tiang ngah cu na duh lo. Asinan a tam luar ti a um thei lo na ti fawn," ka ti sal. Ka ttong mi ih sullam khal ka thei cuang lo nan, cutin ka ttong suak cu a si.
"Si lo. Khirhawk sal theih mi laksawng a si lo. Nei lanta ding ih pekawk mi si lawm."
Ricky Ricardo le Lucille Ball ih can mi 'I Love Lucy' zuknung zoh vekin ka thei aw thlang.
"Kan thok sal pei. Khuitawk ah na rak feh?" tiah ka sut sal.
"Pitar-Putar umkhawmnak inn ah ka feh. Anmah va vehvai ding in tlawmngai ka suah."
"Laksawng thlengawknak ah ka feh na ti fawn."
"Na buainak ka thei ciah. 'Laksawng Thlengawknak' ka timi cu pitar-putar umkhawmnak inn ah feh in, mi kom nuam bik tthenkhat thawn caan kan hman tlang mi kha a si. Tu ahhin kum 40 lawng ka si. Annih pawl cu kum 70, 80 le cumi hnakih upa tla an si. Annih khal in in pek thei mi tampi a um. An rel mi thuhla pawl kha ka hrangah laksawng hleice a si. An tontehnak le zir ngah mi pawl cu a man bikhiah rual lo an si. An hnen ihsin tampi ka zir ngah."
"Cumi cu, laksawng thlengawknak a si pei cu, ti aw?"
"Si e. Kei in ka caan ka pe hai ih, annih in nun thuhla in zirh."
Thlirdan danglam le ttha zet a si. Kum himi zat ca ka rak ngannak ih ka lamzin tluan ah ka ton mi minung hmuahhmuah hi ka hrangah 'Laksawng Thlengawknak' phunphun an rak si cio.
Nang khal in na tuahlonak ding san a um lo. Tuini ah mi pakhatkhat thawn komawknak caan hmang aw. Na venghnen pakhatkhat kha 'Nan rak ttha maw?' ti ding in na feh lai kha ding lawk aw. Kawhhran cangvaihnak ah tel awla mi thar pawl va tong hai aw. Tualsung ih pitar-putar umkhawmnak va vehvai aw. Mi pakhatkhat phone aw.
Pek ding mi tampi na nei ih, ngah ding mi tam tuk na nei ve fawn.
Hminsin: Bob Perks ih " Gift Exchange - lessons about life!" kan miphun nunphung thawn mil ding ih leh-her mi a si.
17 October, 2016
Laksawng Thlengawknak
Subscribe to:
Post Comments (Atom)
No comments:
Post a Comment