10 October, 2016

Minung Phun Ruk

Minung Phun Ruk

Canganthiam, thluaklam mithiam le physics mithiam a si mi Edward de Bono in 1985 kum ahkhan cahmai 207 a um mi Six Thinking Hats cabu a rak suah. Cumi cabu sungah khawruah dan phun ruk neitu minung phun ruk thuhla a tarlang. Cumi cu tui ni ih Human Resource Management ah minung mizia, nuncan le khawruah dan pawl cekfelnak ah Lukhum Paruk Khawruahnak ti'n a hmin a rung thang.

A hnuailam ih minung phun ruk tarlang mi ah nang teh ziangmi ah na tel? Na rualpi teh ziangmi ah a tel? Ruat phah vivo in siar aw. Na duh ahcun na rualpi na mention thei!

1. Mi Ngiaufiau (lole) Lukhum Dum Khumtu
Mi tthenkhat cu hmuhdan le ruahdan buaithlak zet an nei ttheu. A ttha lo lam in thil an zoh, an ruat. Ziangkim ah mi va elbuai lo in an um thiam lo. Ruahdan um cia mi dokalh zawng in thuron an pe ttheu. Thlengawknak timi an dodal.

Pawlkom pakhat ah hivek minung pawl hi an tel a ttul. Ziangahtile khing khaiawktonnak (check and balance) hi hmun tinkim ah a ttul mi a si. Hivek minung pawl cu cazin kaitu pawl, a tak ih tuah rori duhtu pawl, tidan hlun ngainatu pawl, kengkawhdik (realistic) ruahnak neitu pawl lakah hmuh an theih.

2. Thiampu (lole) Lukhum Tangphaw Khumtu
Mi tthenkhat cu midang parah saya ttuan an duh. An hmuhnak a kau. An theih mi a tam. Anmah tluk in midang in an thei ve lo tiah an ruat ringring. Ziangtinkim ah a tlunlam ihsin huapkim zet ih ruat le thlir thiamtu pawl an si.

Pawlkom pakhat ah hivek minung pawl hi an tel a ttul. Thutluknak dik a suah theinak ding ah a tthalam ih thlirtu pawl le a selam ih thlirtu pawl karlak ih thu-lai hawlsak theitu an si.

3. Sersuaktu (lole) Lukhum Hring Khumtu
Mi tthenkhat cu ruahnak tharlam le danglam hmang in thil sersuak duhnak thinlung an nei ringring. Ziangkim an zingzoi vivo ih ruahnak thar, hmuhdan thar, sersuahnak thar tivek pawl hawlsuaktu an si. Tidan hlun an ngaih lo ih khawruahnak thar hawlsuah ringring an duh. Can bikhiah nei ih hnattuan an huam lo. Buaipi cengmang ih buaipi lawlaw an paih ruangah zungthiam (artist) ah an hung cang duh.

Pawlkom pakhat ah hivek minung hi an tel a ttul. Ziangahtile tui san ahcun a tam thei bik ih thil thar sersuaktu pawlkom pawl lawng an hlawhtlin ruangah a si.

4. Tongtuartu (lole) Lukhum Sen Khumtu
Mi tthenkhat cu ziangtinkim ah an thinlung tontuarnak (feeling) kha an ret thupi ringring. Thutluknak pakhatkhat an tuah zik khal ah an thinlung tontuarnak in a hliahkhuh ttheu. A dik le dik lo timi hnakin, anmai hmuhdan le ruahdan kha an thupitter sawn ttheu. An tontuarnak khal thinlung cangvaihnak, lungawinak, lungngainak tivek ih zir in a thleng aw ol. An pehtlaih mi minung hmuahhmuah khal kha anmai' tontuardan vekin an va pehtlaih ttheu. An thinlung a no. Zatlanglam hnattuan an paih cuang ih, malte ttuan cing in tampi fak hlawh duhtu pawl an si.

Pawlkom pakhat ah hivek minung hi an tel a ttul. Ziangahtile thilri leitu le zuartu pehtlaihnak tivek ah an ttangkai. Zatlanglam hnattuan (mi senpi hrangih hnattuan) tivek ah hivek minung pawl hin hmai an hruai tam.

5. Mi Ti Fekfek (lole) Lukhum Var Khumtu
Mi tthenkhat cu sirhsan um taktak mi thil lawng an zum. Ttongkam kam khat kha ol-aite'n an cohlang duh dah lo. Thuhla hminsin cia mi le thuthang dik pawl lawng sirhsan in thutluknak an tuah ttheu. Buaibainak pakhat ih bulhram data pawl lawng an khawlkhawm ttheu ih, a dik sawn mi ngah thei ding khal in data dangdang an hawl vivo ttheu. Thil pakhatkhat kha a sinak ciahciah lawng ih ruattu an si ih, thinlung tontuarnak dung thlun ih thutluknak tuahlotu an si.

Pawlkom pakhat ah hivek minung hi an tel a ttul. Rinsan a tlak mi thuhla lawng rori zohtu an si ruangah pawlkom ih thutluknak diktertu an si.

6. A Tthalam ih Thlirtu (lole) Lukhum Aihre Khumtu
Mi tthenkhat cu ziangtinkim ah a tthalam ih thlirtu an si. A siava bik an ton hman ah a tthalam ihsin an ruat ttentto. "Ka ke lawng a kiak ih, ka thih lo ruangah a zia-um lai," tivek ih ttong ttheutu an si.

"A ttha tuk panteh!"
"A ttha tuk, ti mai aw!"
"Thiam lawlaw si!"
Cuvek ttongkam pawl khi an hman zungzal mi a si.

Pawlkom pakhat ah hivek minung hi an tel a ttul. Mi dang ih diklonak rak somdawltu ding, a tthalam ih ruat thei ringringtu, hmeltheih le rualpi nei tamtu an si.

Minung Phunphun, Ruahnak Phunphun le Senpihlawm (Society)

Pawlkom pakhat sungah minung phunphun an um vekin, ruahnak le hmuhdan phunphun khal an um ttheu. Mi pakhat le pakhat cu an bangrep ciah thei lo vekin, "Zo a ttha ih, zo a sia," ti'n ol-aitei' thutluknak tuah ding a si lo.

Kut pakhat ah a saulam a rual aw lo mi kutzung pawl an um. Asinan anmah le zawn cio ah an ttangkai thluh. A hleifuan ti ih hlon theih mi kutzung an um lo.

Cuvekin pawlkom pakhat khal ah ruahnak phunphun a neitu minung an um a ttul. Ruahnak phunphun neitu an tam sinsin rual in pawlkom kha a cak sinsin thei.

A thupi taktak mi cu, zovek minung khal kha a umnak ding zawn ciah ah ret ngah ding, le pakhat ih tlaksamnak kha a dang pakhat ih somdawl ding, timi kha a si.

Sirhsan: TopBiz Facebook Page


No comments: