Zo Na Si? Zo Ka Si?

Zo Na Si? Zo Ka Si?

Vei khat lai ahhin thla 10 sung hrawng tidai pawl a khal thluh ttheu mi, khawpi tuk lo pakhat a rak um. Thlatang a ra thleng. Vur an tla nasa. A daihlam -30 degree lai a thleng thlang. Hitawk hmun ahhin kum thum ah vei khat hrawng vur thlipi a hrang ttheu. Vur thlipi a hran tikah vur tlangtluan pawl an cim. Inn pawl an siat.

Curuangah cutawk hmun ih minung pawl cun vur thlipi a hran tinte'n an hruh ttheu mi korfual pi an hruh. Cui' korfual zal sungah far thling khal pakhat, meitalh pakhat, zanthing tan li-nga hrawng, sapherh cuai hrek hrawng an pai ih, an kiang nai ih puk sungah an beu ttheu. Cuti'n, thlatang can zan khat ah vur thlipi a ra hrang thutthi. Khaw sungih minung pawl cu an kiang nai ih lungto puk pawl ah an va tlan ih, thlipi lak ihsin an relh.

Minung paruk cu a thim khiamkhiam mi lungto puk tumpi pakhat sungah an thleng. Mi pakhat in a ken mi meitalh le far thling hmang in meisa a muah ih sapherh a rawh. Meisa kiang ahcun sapherh rawh cu a ei ih, a korfual thawn a lu khuh in a sing rero.

Cu pai' meisa muah mi an hmuh tikah midang pawl khal an ra ih meisa ahcun an pai mi thing an thlak bet cio. Sapherh khal an rawh ih an ei. Cu thluh ah meisa kiang ahcun an sing rero ve.

Vur thlipi ttih ih ra tlan an si ruangah pakhat le pakhat an zoh hliah aw man hai lo. An cau zet fawn ih meisa sungah thing tan khat cio thlak bet in vur thlipi a reh ding can an hngak. Khua a sik tuk fawn. Ruh le thlik tiang in a fep ngohngo. A lenglam ah vur thlipi hrang awn a huk rero fawn.

A rei tikah an meisa cu zanthing a cem vivo ih a alh dim vivo. A mit zik cuahco thlang. Zanthing thlak bet a ttul.

Khua a sik tuk ruangah mi pakhat a hung tthangharh. A korfual zal a vun pur. Zanthing tan khat thlak bet a tum. Cumi can ciah ah a hmai zawn ih umtu khal khua a sik tuk ruangah a hung tthangharh ve. Meisa tleu riari ahcun pakhat le pakhat an mithmai a tong aw.

Pakhat cu an khua ih mi hmuahhmuah hnenah paisa cawih in a pungtthang a eitu milian a si. A dang pakhat cu a inn le lo pawng ih tlen sal theilotu mi rethei a si.  Sum cawihtu milian cun hitin a ruat: "Shhhh... hivek mi rethei thawn meisa kan rak ai tlang kherkher cu a! Sala! A mithmai zoh men hi vansiatnak a si. Tawk seh, ka zanthing hi meisa ah ka thlak lo ding. Ka thlak ahcun hi milai hi a khua a hlum ding. Ka thlak lamlam lo ding!" Cuti'n a ruat hnu ah meisa cu a dungtun ih a sing peh rero.

A inn le lo sungraltu mi rethei khal in hitin a ruat ve: "Hivek, a hlep tampi ei hmang mi duham thawn meisa kan ra ai tlang ngah kherkher cu ka va van se lawmam ve aw! Kan pupa ihsi kan leiram rori a pungtthang tam tuk la in, dik lo zet ih in laksaktu milai! Meisa ih zanthing ka thlak ahcun ...... tawk seh, ka thlak lo ding!" Cuti'n a ruat hnu ah meisa cu a dungtun ih a sing peh sal ve.

Midang pakhat a hung tthangharh sal ve. Khua a sik tuk cuh! Zanthing a thlak bet tum zawng ah a hmai zawn ih umtu khal a hung tthangharh ve. Pakhat cu hlawhfa latu a si ih, pakhat cu hlawhfa a si.

Hlawhfa latu cun, "Hna hman ttuan paih hnai lo'n a lak ih paisa ngah duhtu thawn meisa kan rak ai tlang kherkher cu a va zia lo ve aw!" ti'n a ruat. Hlawhfa khal in, "Kan nihlawh pawl dik lo zet ih sor in a neinung rero mi thawn kan tonawk kherkher cu aw! Zanthing ka thlak lamlam lo ding," ti'n a ruat ve. Cuti'n an pahnih in meisa cu an dungtun ih an sing peh rero sal. Meisa cu a ziam zik ngaingai thlang. A lenglam ah vur thlipi a hrang nasa lai fawn. Khua a sik ti hman in a daih fawn lo.

Cumi can ah a dang mi pahnih an hung tthangharh ve. Zanthing an thlak tum veve zawng ah meisa tleu riari ah pakhat le pakhat an hmu aw. An pahnih in hiti'n an ruat veve: "Kei ttheu hi cu aw! Hivek sakhaw dang betu, biaknak dik lo neitu kherkher thawn hmaton in kan rak to a si si a!" An pahnih in an biaknak a bang aw lo. Curuangah an zanthing cu an zal ah an san veve sal ih, meisa dungtun in an sing peh veve sal.

A thaizing ah runsuaktu pawl in cui' lungpuk cu an va zoh. Meisa a um lo ruangah khaw sik ih a thi mi mi ruak paruk an va hmu. An taksa an cekfel tikah korfual sungah zanthing an nei, meitalh an nei, far thling an nei, ei ding khal an nei cio. "Zanthing, meitalh, ei ding le far thling nei cio cing in ziangruangah khaw sik in an thi a si pei?" tiah ruat phah rero in mi ruak paruk cu an thiar suak hai.

Kan kiangkap khal ah meisa kiangih minung paruk vek in, phuba lak duhnak tur sia in ih thih a tumtu mi tampi an um. Meisa kiangih minung paruk vekin zo na si, zo ka si, ziang na si, ziang ka si timi duhamnak (mah ret thupiawknak) hi nei lo in, a cang thei tawk in hlon thei cio sehla a ttha zet ding.

Credit: U Phone (Chemistry), Mandalay.