Bomawknak Timi Hi

Bomawknak Timi Hi

Ni khat cu ka thinlung a buai in a hnok ciamco. Ka nun hi tla se thluh vekin ka thei aw. Curuangah a lenglam ih vahsuah lawk ka tum. Ka feh tumnak khal ka thei cuang lo. Asinan ka vahsuahnak ahcun thil maksak zet ka va tong ngah.

Dawr pakhat ih tohkham ah putar pakhat a to lai ka hmu. Second-hand kedam zuartu a si. A mal bik in kum 70 cu a si zo ding. A cauh hmel zet ih, a kedam zuar mi khal leitu a nei lo. Thil pakhatkhat pek ka duh nan, zianghman ken mi ka rak nei lo.

Tawkfang ah putar hnen ahcun nunau nauhak te a ra. Nauhak cun, "Pupu, na kedam ka lo rawt sak thei pei maw?" a ti. Putar cun a zangfah ih, hni siamsi phah in a kedam cu rawt ding ah a pe. Nauhak cun, "Kedam ka rawtnak san cu ka ttapa hrangah tlawng thuam (school uniform) thar leinak paisa ka ttul ruangah a si," a ti.

Cumi ka theih tikah ka mitthli a hal. Putar cun, "Naute. Kedam kha rawt nawn hlah. I thlun awla tlawng thuam cu ka lo leih ding," a ti. An pahnih in bazar ah an feh. A thupte'n ka thlun hai. Putar cun tlawng thuam cu a leih. Nauhak cu a lung a awi tuk ih, "Ka lung a awi tuk. Pathian in lo thlawsuah hram seh," a ti. Cuti'n nauhak cu a tlung. Putar cu hni siamsiam in a rung tang ta.

Bazar ihsi putar a suah zawng ah ka va tong ih, "Mi ropi na si! Na zawnruah lainatnak ruangah ka lungawi!" tiah ka sim. Ka feh liam zawng ah dunglam ka hoi kir sal ih putar cu a hni siamsiam lai ti ka hmu.

Ka hmuh mi lainat zawnruahnak cun ka thin a tham tuk. Mah hman rethei zet pakhat in khavek tirhsiannak maksak an neih thei kha ka mang a bang tuk. Cui' zawnruahnak hnattuan cun ka thin a sun ih, ka riahsiatnak khal an hlo viarviar thluh.

Lungawinak ding san le vang ka ngahzia ka vun thei aw. Ni khatkhat ahcun a rethei mi putar in zianghman neilotu hnenah a neih mi a hlawm ve thei vek hin, kei khal in ka neih mi midang ka hlawm ve thei ka beisei.

Sirhsan: Pravs J ih "A Shoe Seller Walks in The Shoes of Kindess."