Nun Tthansohnak (XIV)
Zuamdan Danglam in

A hnuai ih thuanthu hi 'The Million Dollar
Forum' timi zirhnak kan tuah thok lai ah kan siar ngah. The Million Dollar
Forum timi cu a ra teltu minungpawl kha kum khat hnu kum khat an sumlut a
million tel ih punter theidan zirhnak a si. Kan zirh thok ah minungpawl cu kalhmang
dik zet ih zuam sinsin lo in, zuam sinsin nak timi lawngah an khumlut aw
ringring ti kan hmusuak. Zuam sinsin timi lawng hin rahsuah ttha a suah ringring
lo. A cancan ahcun hlawhtling sinsin dingin zuamdan phun dang deuh thlengh a ttul cang khal a um. Kanmai'
khawruahnak thawnginn, kan tidan le sidan pangaipawl le, kan hazawhzawng
khawvel tivek kha kan pahbal a ttul cang a um ve.
Milcroft Rawldawr ih pindan reh-rep pakhat ah
ka to. Rawldawr cu Toronto khawpi ihsin nazi pakhat sung feh hrawng, khawpi
lenglam ah a um. Farkungpawl lakah a thup a thli deuh ih a relh mi hmun
dainuamte pakhat a si.
Asinan ka kiangnai pii thum-li hrawng hlatnak
ihsin thifahnukcat ih talbuai rero awn pakhat ka thei. Thothe pakhat in tukverh
(sangkate) thlalang pahtlangh tum in thifahnukcat ih a zuam rero awn a rak si.
A taksa sungih tang mi tha le zang hmuahhmuah cu a cang thei lo mi thil hrangah
a hmangral rero.
A ring deuhdeuh mi thla zap awn cun
riahsiatza a si mi thothe ih ttuanrian cu a tarlang rero. Zuam ding, hlawhtlin
lo asile cuhnak ih zuam sinsin ding, timi taimak suahnak kalhmang a thlun.
Asinan tui ttum ahcun cumi kalhmang cun tthathnemnak a nei lo.
Taimak suah in thifahnukcat ih a zuam rero
ruangah luatnak a ngah cuang lo. Nun theinak ding hmakhua khal a ong phah cuang
lo. Ngaingai ahcun thu dung thu hmai ruat lo ih a zuam lok mai ruangah
harsatnak ih awk tang aw a si. Ziangtluk in zuam khal sehla tukverh thlalang cu
a pahtlangh thei awm cuang fawn lo. Ziang khal va si sehla, thothe cun a tumram
thlen theinak ding ahcun thihcilh khal poi hlah ti lungput thawn kebeu tha suah
ih ttang dingin thu a tluter a si bik. Riahsiatza cu, thothe ih hringnun netnak a langh cia mi
a si. Tukverh tlang ah a thi ding ti a fiang cia.
Ngaingai ahcun, cui' tukverh thlalang ihsi
ke-kar kar hra hrawng hlatnak ah sangka pakhat a ong aw hiahhiah. Second
thum-li hrawng zam men in cui' thothe cun thlen a duh duahdo mi lenglam khawvel
ah a thleng cih thei. Taimak suah ih a talbuai rero lai cu malte vun cawl duak
in a kiangkap vun cuan ta sehla amah le mah a kharhkhumawknak kharh-bawm sung
ihsin a luat thei mi a si.
Thlalang lenglam ih va thlen thei dan asilole
pindan sung ihsi suah theidan cu a kiangnai rori ah a um. A theitui' hrang
ahcun a olsamtuk lawmam.
Cui' thothe taima zet cun ziangruangah
zuamdan dang ih zuamnak cang a thiam lo? A hril mi kalhmang pakhat lawng cu
ziangruangah thifahnukcat in a buaipi? Cumi kalhmang thawi' taimak suah ih zuam
lawng cu hlawhtlinnak petu fiangfelbik a si ti'n ziangruangah a pom bet eueu?
Ka thih phah ding a si hmanah himi kalhmang lawng hi hnget zet ih thlun in ka
zuam ding timi khawruahnak cu ziangvek ruatreldan ihsin a ra suak?
Thothe ih hrang ahcun amai' `uanreldan cu a
dikdawhbik, sullam neibik tla a si thei ko. Asinan a ruahdan le ttuan a reldan
cu thihhlohnak ih net a khar ding mi ruahdan le ttuanreldan a si hi cu
riahsiatza a si.
Zuam ding, hlawhtlin lo khalle cuhnakih zuam
bet ding timi kalhmang hi a dik ringring mi kalhmang a si lo. Cumi ruahdan
pakhat lawng rinsan cun na tumtahnak a hlawhtling ding tiah hnget zetih ruat
ding a si lo. Cumi kalhmang lawng rori aatcilh ih pawk hnget ruangah harsat
buainak hman ton a theih.
Mai' hman mi kalhmang thlirfelsalnak tuah lo,
tuahremh khal tum cuang lo, taimak suahnak sangbik thawn dawnkhamtu ziangkim
pahbal theih a si timi ruahdan kalhmang neih ruangah hlawhsamh i' hlei ah,
hlawhtlinnak ding remcannnak tampi hman mah lala ih siatralter pang a olte.
Na zuam ttentto cing in na pahsuak thei lo caan
ah thothe kha mang suak sal aw.
(Price Pritchett ih Try Something Different - Chicken Soup for the Soul)
No comments:
Post a Comment