Thapeknak

THAPEKNAK

Santhuanthu ih hlawhtlinnak ropibik tthenkhat cu anmah thawn tthen a theih lo mi thil a um ttheu. Cumi cu duhdawt mi asilole rinsan mi rualpi hnen ihsin thapeknak asilole ttanpinak tivek an ngah mi khi a si. Ttanpitu ttha a si mi nupi ttha Sophia timi um lo sehla cun calai ropi cazin sung ahhin Nathaniel Hawthorne timi hmin hi kan thun lut lo tla a si thei. 

Siahkhonzung (customhouse) ihsin beidong zetin Nathaniel cu inn ah a tlung. A hnattuan ihsin banter a si thu beidong zetin a nupi Sophia a sim tikah Sophia cu aipuang zetin a au. Nathaneil in ka nupi cu ziang a cang si pei ti ih a ruat rero lai ah Sophia cun, “A kaihtuk, na ngan tum ttheu mi nunthuleng cu tu ahcun na ngan thei thlang ding,” a ti.

“Aw, ka man awl zo cu a si ko, asinan to men ih ca ka ngan ah ziang kan ei ding?” tiah a pasal cun beidong zetin a rel thotho. Sophia cun cabuai ih pawhdawh pakhat a va dir ong ih paisa tom khat a phorhsuak mi a hmuh tikah Nathaniel cu a mang a bang. “Khuitawk ta si na ngah?” tiah mangbang zetin a sut. “Pianpi B.A na nei tthatuk ti ka thei cia, ni khatkhat ahcun ro a tling mi nunthuleng pakhat na ngansuak lai ding ti ka thei, curuangah zarhtin in pek mi paisa ihsin malte cio ka khawltthen mi a si hi, himi hi kan kum khat hman ding cu a daih, curuangah ca ngan thok cih aw,” tiah Sophia cun a pasal cu zum ngam zetin a sim.

Amah rinsan le zumngam zettu a nupi hnen ihsin thathawhnak le phurnak pawl cu Nathaniel hnenah a kangkai. Cutin American Calai santhuanthu ih kutsuak hminthangbik pakhat a rung si mi ‘The Scarlet Letter’ a ngan ih, Nathaniel Hawthorne timi hmin khal leitlun pumpi ah a thanter thei a si.

(Nido Qubein ih Encouragement - Chicken Soup for the Soul)