Buddha ih Nunthuanthu (ii)

Buddha ih Nunthuanthu (ii)

 

Sanphunglam Kiangkap Umtudan (Historical Context)

Buddha hi Ganges Tiva suahka saklam ri ih um Kapilavastu (Kapilbastu) kiang ih Lumbini (Rummin-dei) ah a suak. Hitawk hmun hi Saklam India nuncenphung (civilization) umnak hmun ih saklam ri a si ih, tuisan ahcun Nepal ram thlanglam ri ah a cang. Mithiampawl in Vedic caanbi (period) nelam san ahhin hitawk hmunram ih rak um minungpawl hi hrinhnam zawng ih ukawknak hnuai ah um in an zum. Hrinhnampawl cu hrilsuah mi council upapawl asilole hrilsuah mi hruaitu pakhat in a rak uk hai a si hmang. Buddha ih hringnun thuhla ah tarlang tel a si ttheu mi siangpahrang inn ropi pawl cu thilhlunphunglam nehnang (archaeological remains) zawng cun hmuh ding an um hrih lo. Himi Ganges Tiva suahka hmuram ih umtu zatlang mihlawm pawl hin hrin lakhranawknak kalhmang (caste system) ziangtluk an thlun ti a fiang lo. Asinan Buddha ih innsang cu raldo hrinhnam (Kshatriya) an si ti a si. Ganges tiva suahka laili cu khawpi-ram (city-state) 16 hrawng umnak a si ih, cui' khawpi-rampawl cu siangpahrangpawl in an uk. Vei tam zet cu khawpi-ram pakhat le pakhat an do aw ttheu.

India ram laili ih himi rampawl an hung dinsuahnak, le an ukawknakpawl le sumtuahnak, hin zatlangnunlam (social), ramkhellam (political), le sumsiamlam (economic) thlengawknak phunphun a suahter. Cui thlengawknakpawl cu Buddha phungthluk hung dinsuahnak, le BCE zabi paruk le panga san pawl ih sakhuanaklam cangvaihnakpawl hrangih somdawltu tawhfung thupi pawl (key factors) an si tiah vei tam zet cu tarlang a si ttheu. Buddhist ngancapawl ah dungthluntu mibur tampi a hip theitu, hmun khat hnu hmun khat tlawng vivo ih thu zirhtupawl (itinerant teachers) phunphun thuhla tarlang an si. Cui zirhtu tthenkhat cun thutak hawlsuak ding ih thuruahnak (meditation), yoga, le tenrenphungthluk (asceticism) tivekpawl an zirh ih, khawruahphunglam thlirdanpawl (philosophical views) an somso, vei tam zet cu minung ih sizia (nature of the person) zirnak lam an hoi ih, milai cangvaihnakpawl (karma) hin hmailam can hrangah hmual a neih le neih lo khal zingzoinak an tuah ttheu. Buddha hi cui' zirhtupawl lakih pakhat vek in ra lang hmansehla, Buddhistpawl cun anih cu zirhtu dang hnak ih danglam hranpa in an thlir. Curuangah thurosiah cindan (tradition) sungih a dinhmun taktak hi a hringnun le a rak khawsak can ih thilthlengpawl lawng zoh cun theihfiang theih a si lo (cui thuhlapawl cu ngah theih vas i hman hai sehla maw). Anih cu Buddhist theory pawl sung ih can le sanphung umtudan boruak sawn ih thlir a ttul.

Buddhist thurin ahcun, vandumkulh (universe) hi karma (cangvaihnak) ihsi ra cangsuak a si. Cangvaihnak in san le vang an nei ih hmual khal an nei timi dan (law of the cause and effect of actions) ruangih ra cangsuak a si ih, a thianghlim tlamtling mi cangvaihnakpawl (virtuous actions) cun hmailam can hrangah hlimnak an sersuak ih, a borhbah mi cangvaihnakpawl cun na (pain) an sersuak. Vandumkulh sungih nungcapawl hi thoknak nei lo in khawvel paruk ah an piangnon (reborn) kual rero. Cui' khawvel paruk cu pathianpawl, pathianhrekpawl (demigods), milaipawl, rannungpawl, thlaraupawl, le hremhmun nungcapawl khawvel tla an si. Himi nungcapawl ih cangvaihnakpawl (tuahttuannakpawl) in nungca pakhat cio ih bulpak tontehnakpawl lawng si lo in, an khawsatnak ding khawvel tiang a sersuak. Piannolhnak herkual rero hi samsara (a ttongfang sullam ciah cun "tawihvahnak") tiah an koi h, tuarnak(suffering) umkhawmnak hmunhma a si tiah an pom. Buddhist cindan thlunnak ih tumtah netkhawt cuncui' tuarnak ihsi luatsuah ding kha a si. Cui' luatsuahnak thlen theidan kalhmang cu mi famkim a si mi minung pakhat in samsara ihsi luatsuahnak lamzin hmuhsuah theinak huham a ngah ih, cui' lamzin cu zangfah lainat zet in leitlun hnenih a theihter hlan ahcu minung damkum million tampi sung theihsuah a rak si lo.

Tuarnak ihsi luatsuahnak hawlsuah tum ih khual lam hlapi a tlawngsuaktu, le cui' luatsuahnak lamzin thuhla midang hnenih a zirhtu cu bodhisattva tiah kawh a si. Cui' lamzin a hmusuaktu, a cem tiang va feh thlengtu, le leitlun hnenih cumi a zirhtu, cu buddha ti ih kawh a si. Buddhapawl cu an thih hnu ah an piangnolh sal nawn lo. Tuarnak um nawnlonak hmun a si mi nirvana (a ttongfang sullam ciah in "liam hlo") ah an thleng. Buddha pawl hi can reipi sung hman ah malte lawng an hung lang ruangah, le tuarnak ihsi luatsuahnak lamzin lawng an phosuah ruangah, leitlun ih buddha ra langsuahnak hi vandumkulh ih sanphung thilthleng lak ahcun thil reilote sung men ih ruah a si.

Buddha pakhat cio ih thuanthu cu a piansuah hlan ihsin a thok zo ih a thih hnu tiang in a cem hrih mei lo. Buddha sinak (Buddhahood) a ngah hlan, bodhisattva dinhmun in a rak hman liam mi hringnun million tampi le buddha si thei ding ah taimak suah ih a zuamnak pawl cu, nirvana ih a liam hnu tiang in a thuanthu in a huap thluh. Ziangahtile buddha hin a rak hman liam mi hringnunpawl hmang in midang a zirh ttheu ih, a rak hman liam mi hringnun thawn a pehpar mi rothilpawl (relics) khal a dungthluntupawl hrangih thil thupi an si ruangah a si. Sanphung sung ih kan theih mi Buddha hi leitlun ih rung lang buddha hmaisabik a si lo vek in a netabik khal a si lo. Thurosiah tthenkhat cun buddha pasarihnak a si an ti, thurosiah dang cun 25-nak a si an ti, a dang leh cun a palinak a si an ti ve. A ra lai ding mi Maitreya buddha cu Shakyamuni ih zirhnakpawl le rothilpawl leitlun ihsi an hlohvai hnu ah a ra lang ding. Thurosiah thlirdan ih Buddha hringnun cu himi thlirdan thlun ih ruat (thlir) a ttul.