Hni Uar-o Aw (28)

Hni Uar-o Aw (28)

Vote Lemnak

"Ka pu, nan tlin thei ahcun buhfai tal cu kan hnianghnar deuh thlang kei cu ti aw?"

"Buhfai hnianghnar mei cu thil olai a si lo. Asinan ration card tal cu kan tuah hlai deuh ding."

Remthei Buhsah

"Pa, cafung in leih duh fawn lo, tlawng ka kai paih nawn lo. Mizansun hman cafung ka neih lo ruangah, tlawnginn hmai ih ni sa lak ah reipi in dinter hokhaw."

"E, pate, tidan ttha zet ka thei silawm," a ti ih thawng ttha zet a lei sak.

Nga le Ngu

"Nga ka zuar," ti'n an kotka ih rung au ttheu kha a ning tuk. Vei khat a run au leh ciah cu, "Nga nan zuar lo ah, zosaw ngu zuar dah," tiah a rak phun hnawh.

Ttuan cu Ttuan Ve

"Phunsangtlawng ahkhin ka ttuan ve," a ti ringring. An hun theifiang taktak cu Thluaklam Zirnak hmun ah mi thinglung kim lo umtudan zirnak hrangah an hmang ttheu hi a rak si.

Thlahawknak Tisa

Tlangval pakhat awk that aw tum kha a hridai hman mi a sau ttha nasa a si hmang. A hridai khatlam zim an inn luanglu ih a ttawn hnu ah a hngawng ah hridai hlimval vuah aw cia in, an hmuanthlangtei' inn ah thlahawknak tisa a vung in.

Kawhte A Bel in

A fanu fasawn pai a rak kawk rero lai ah an kotka ah kawhtebel an run zawrh. Thinheng emem in, "Kan lei lamlam lo ding. Kawhte pakhat lawng nei hman in hitluk kan buai simaw, a bel a bel ih kan neih tla cun, ti ngaihnak a um lo," tiah a rak hro ciamco hai.

Danthiam Thluak Nei Lo

Danthiam : Sibawi, hi pai' thih theihpinak ca (death certificate) na ngan hlan ah a cal le bek na tham ta maw?

Sibawi : Tham ta lo.

Danthiam : A lungtur na ngai ta maw?

Sibawi : Ngai ta lo.

Danthiam : Asile, a thaw teh na zohfel ta rengreng maw?

Sibawi : Zohfel hran lo.

Danthiam (uang aw fahran in thutthentui' umnak lam a pan ih) : Cuti a si ahcun, sibawi, a thih theihpinak ca na ngan lai ahhin a thih le thih lo hman thei fel lo in, tawngpa ngan in na rak ngan men tinak a si maw?

Sibawi : Hiti zawng in hun rel sehla. Hi kan mithi ih thluak hi ka cabuai ih rialno bawm sungah a um. Cuti cing in khuitawk hmun ah simaw danthiam hna ttuan in a rak vak hlo tla a si lo ahcun a thih zo cu a zum um ko e.

Ro Ruangah Si Lo?

Tlangval : Ka pa'n ro in roh ruangah maw si in duh?

Fala : Na pa'n ro a lo roh ruangah si cuang hran lo e. Na pa si lo zovek khal in kha zatzat rothil kha lo roh hai khal sehla ka lo duh thotho ding.

Pai' Thucah

A fapa lengvak zik sangka ihsi suak zo cu a pa in a ko kir sal ih, "Pate, ra kir lawk hnik, thil thupi zet, na dam sung ih na cinken le na hman ringring ding mi lo sim lawk ka duh. Tthate'n rak hminsin aw. Na hmeltheih lo pawl thawi' phe nan kah ding tinte'n 'cut' (kat) tengteng ttheu aw."

Naute Bol

"Ka pi, na naute cu a taksa a va bol nasa ve.

"Si tho lo ziang, rawtuai kheh hrih lo thawn ka phurh cih pang ttheu si lawm le."

Na hnenin Mi An Zir

Sizung ttha hminthang, sibawi pawl ih zirnak tlawng khal si cih, ah a kawng na a va hmuh aw. Sibawi in cabuai parah a kunter ih, thir mak danglam zet pakhat thawn a taw cu a thai kual rero. Cuti ih a ti lai ahcun cat bang lo in a ttong rero fawn. A rei thlang ih, a ning thlang lutuk ti ngaihnak thei lo in, sibawi umnak lam hei zoh na khaw, MBBS zirlai mi tampi cu an cabu ih ca ngan zohzo phah in an rak to vialvial.