Zawhtepawl ih Siangpahrang

Zawhtepawl ih Siangpahrang

Suakthuan Peter Black cu mi ttha a si. Asinan mi hmuahhmuah in sambaunak tumpi a nei tiah an sim ttheu. A sambaunak cu thuhla zum um lo zetzet rel a hman ttheu ruangah a si.

Peter cu Tabby-on-Thames (Thames tiva par ih um Tabby) khua, St. Thomas the Believer Kawhhran ih biakinn kiltu a si. Biakinn dung, Father Allen ih innn kiang, deuthlam ah a um. Himi  hlan ah hna dang tampi a rak ttuan dah. Asinan thuhla zum um lo zetzet rel a hman ruangah a hnattuanpawl ihsin banter a hlawh ttheu.

Father Allen khal in ralrinnak a pe zo. "Peter, himi hi kan khaw sung ih hnattuan na ngah thei mi netabik si ding a bang. Curuangah himi hnattuan ihsi banter na duh lo ahcun thuhla zum um lo zetzet rel \hi cawlhsan aw!"

Zan khat cu Peter a itthat thei lo. A talpawlok rero ih, a netnak ahcun lakphak mallai in ding in a tho. Asinan tukverh lam a hei zoh tikah, biakinn tukverhpawl cu an tleu pempem ti a hei hmu.

"Ziang si thlang?" tiah Peter cu a phun sepsi. "Tuvek zan ah zohman an um lo ding nan si khawh. Ziangtin an lut si pei?"

Peter cun a kor-tlun-thuah a dirh hnu ah hmuan ihsin a va feh. Awn lo te'n biakinn dunglam sangka a ong. Biakinn thuamhnaw retnak pindan ih a luh lai ah, biakinn sung ihsin awn-au a thei. Miau, miau.....

"Zawhte ai a va bang ve," tiah Peter cu a phun sepsi lala. "Asinan zawhte in sathaufar an van thu ka va thei dah lo ve."

Biakinn sungih va luhnak hmun puanzar phen ihsin a vun bih. A hmuh mi in mangbang kaa ang hiahia ko in a tuah. Zawhte pakhat lawng a si lo. Za tampi an si. A tum a te a phunphun, le rong phunphun an si fawn. Biakinn tohkham khat pi in an to. Minung vek in a tung in an to thluh fawn.

Biakttheng kainak kailawn ah zawhte dum tumpi pakhat khukbil le lu kun in a um. Peter ih hmuh dah mi hmuahhmuah lakih zawhte tumbik a si. A tlun ah bishop thuamhnaw hruhtu zawhte dum pakhat in tlunlam ah a ban a phar ih, "Miau, miau..." tiah a ai rero.

Cu thluh ah zawhte no te pakhat in biakttheng lam ah puan-hmul-nem lukham pakhat a rak keng phei. Lukham par ahcun siangpahrang lukhum a um. Bishop cun siangpahrang lukhum cu a la ih, ttihzah zet in khukbiltu zawhte dum ih lu ah a vun khumter.

Biakinn sung cu Miau, miau ti ih au-awn thawn a khat thluh. Peter cun zoh bet a duh nawn lo. Biakinn thilri retnak pindan ihsin amai' umnak deuthlam ah a tlan ciamco. Ihkhun ah a zuang lut ih, zingpit tiang in a tha a tthia thlohthlo lai.

Zingpit te ah thluak fimvar zet thawn Father Allen tong ding ah a feh. Puithiam Father Allen cu amai' bulpak pindan ah ca a rak siar ih, a zawhte dum Tom cu a cawn parah a kual.

"Zing ttha, Peter," tiah puithiam cun a rak bia. "Ziang thuhla ruangah ha zingpittei' na rat?"

"Father Allen, mizan ah biakinn sungih thil mak rapthlak thleng mi thuhla lo sim ding ih ra ka si. Meitleupawl ka hmu ih, ziang a si ti zohfel ding in ka va feh. Cutikah miau ti ih ai awn ka thei.."

"Miau," tiah puithiam ih zawhte, Tom, cu a rak ai.

"Aw, khavek ciah kha si," tiah Peter cun a sim. "Ka va zoh tikah, biakinn sungah zawhte za tampi an rak um. Himi zawhte dum tumpi khal a um ih, hmailam ah a khuk a bil, culen, an bishop in siangpahrang lukhuh a khumter"

Father Allen cun Peter cu ngaih tuk lo hmelhmang thawn a rak zoh. "Peter, thuhla zum um lo tuktuk na rel len ziang na cang ding ka lo timi kha na cingkeng lai maw?"

"Cingkeng tuk e, Father."

"Cuti a si ahcun himi thu hi kan duhtawk thlang ke, ti aw?"

"Asinan, Father..."

"Ngai hnik, Peter, tilh lo fial ding ka nei. Tuisun ah Brambleton ah feh in Father Rowan hnenah thuhla na va sim thei kem?"

Peter cun a fial mi cu a tuah. Asinan siimlam lawng ah a va thleng ih, a tlun sal can ahcun unau hmelpalh a si thlang. Curuangah pumpelh zin zawh ding in a ruat cat.

Zin lailak, ttilva rawl hramhring pawl umnak hmun a thlen tikah a pawnlam thingkungpawl lak ihsin awn-au celcel a thei. Ran-khalh-mual pawn lam ihsin uico pakhat ih bo awn le a rual ih sal mi Miau, miau awn a ra thang.

"Khami zawhtepawl thotoh an va bang ve?" tiah Peter cun a ruatsuak lohli ih thingkung pakhat phen ah a relh.

Irish ramtawih uico pakhat cu ran-khalh-mual sungah a ra tlan phei. A theipatawp in a bo phah. A dung ihsin zawhte dazin (dozen) tampi in an rak dawi. Zawhtepawl cu thal le conkiang an keng fekfek ih, hridai thawi' an kaa kharh mi cinghniapawl parah an to. A hmaisabik ih feh zawhte dum tumpi cun sui siangpahrang lukhuh a khum.

Peter cun ramtawih uico in zawhtepawl ih ramtawih a hruai ah a ruat lawk. Asinan a theithiam sal. That ding in uico an pel sawn a rak si!

Siangpahrang lukhuh khumtu zawhte cu lungto tumpi kiang a thlen tikah, a to mi cinghnia cu a bah ih a tlu. Cutikah zawhte cu a hlapi ah a then pet aw. Lungto ahcun a lu a khong ih, cangvai lo in leilung ah a ril.

Zawhte dang pawl cun an ramtawih cu an bansan ih siangpahrang luhkhuh khumtu zawhte cu thinphang zet in an va buk vialvial. Cu thluh in ring zet le ttah aw thawn Miau, Miau ti'n an ai ih, ama' to mi cinghnia ah ret sal in, an ratnak lam ah an kir sal hai.

An liam hloh thluh tiang in Peter cu a umnak hmun ah a rak khur thlohthlo. Cu thluh in a ke ttawnttai te ih kar cak theibiknak thawn inn ah a tlung vurvo. Father Allen cu zanriah a rak ei lai. A zawhte Tom cu cabuai kiang, amai' kheng sung ih rawl a rak ei ve rero.

"Father, zawhtepawl thuhla thotho a si. Ran-khalh-mual ka rung thlen lai ah, uico bo awn le zawhte tampi miau ti ih an raak awn ka thei sokhaw."

"Miau," tiah Tom cu a rak ai.

"Aw, khavek ciah kha si," tiah Peter cun a sim peh. "Cu thluh in cinghnia par ih to in zawhtepawl an ra suak hai. An zate'n uico kha an hual. Asinan siangpahrang lukhuh khumtu zawhte a tla ih a lu a khawn ngah hnu in......cu thluh in.....Father, ziangah Tom in khivek in i zoh cuahco?"

Father Allen cun a thir-fung-hai (fork) a ret. "Peter, thuhla zum um lo tuktuk na rel thu ah ralrinnak ka lo pe zo. Tu ah, khavek na rel peh bet asile, na hnattuan ihsin ka lo suah ding. Na theithiam maw?"

"Asinan Father, thuphan a si lo sokhaw. Sia ka sam ngam!"

"A tawk zo, Peter! Siimpi hnu ih tilh lo fial ding ka nei ih, ka lo hmaisong zet. Asinan lo fial cu a ttul thotho. Zum lo pi'n Mrs. Pennyweather a thi thutthi. Thaisun khi a ruak vui ding ni a si. Curuangah a thlan rak lai aw – tuizan ah."

Curuangah Peter cun thla thul zan thlapi eng ah thlanmual ah thlan a lai. Hnattuan khungkhai zet a si ih, cawlh phahphah a ttul ruangah zamttim zikte lawng ah a ttheh thei.

A laih mi thlankhur sung ihsi a hung kaisuah zik zawng ah hlaral ihsin Miau timi a thei lala. Miau, Miau ti'n a ra thang leuhleuh fawn.

"Zawhtepawl an si cu!" tiah Peter cun a thei mei. Thlankhur sung ahcun a dawp thla sal ih, ralringte'n tlunlam a bih.

Thlanmual lam pan in bishop zawhte dum a ra. A dunglam ah zawhte dum dang paruk in mithi ruakkuang fatakte pu phah in an thlun. Ruakkuang cu puan-hmul-nem dum thawn an khuh ih, ruakkuang tlun ahcun Peter in vei hnih a rak hmuh dah mi siangpahrang lukhuh a um.

Zawhtepawl cu nuamnai zet le khunkhan zet in an feh. An ke kar thum an kar tinte'n Miau tiah an ai. An fehnak zin cu Peter ih relhnak thlankhur kiang ah a si. Peter ih kiang pii malte lawng hlatnak an thlen tikah bishop cun cawl lawk ding in a kut a thlir. Cu hnu ah Peter a vun zoh keukeu ih, a ttong.

"Tim Toldrum a thi ti'n Tom Tildrum kha va sim aw."

Cu thluh in a kut a thlak ih, ke-kar thumnak ah Miau ti ih ai vivo phah in zawhtepawl cu an feh peh.

Peter cu thlankhur sung ihsin a suak ih, Father Allen tong ding in a feh cih. Sangka cum phah in a au, "Father! Father! In lutter hram aw!"

A netnak ahcun sangka a ong aw ih, Father Allen cu a zan-ih kor thawn ihhmu zet in a ding. "Peter, ziang si cang?"

"Ka rung lut ta pei, Father. Cumi hnu ah ka lo sim ding."

Father Allen in a calaibuuk ah a hruai. Cutawk ah Tom cu amai' zawhte ihkhun parah haaham phah in a taksa a dok aw tthuahttho rero. Puithiam cun a meifar a vang.

"Asile, ziang thu si maw na neih, Peter?"

"Father, i zum a ttul thlang. Mrs. Pennyweather ih thlan ding ka laih ttheh ciah ah Miau timi awn ka thei..."

"Miau," tiah Tom a rak ai.

"Aw, khavek ciah a si," tiah Peter cun a sim bet. Ka zoh tikah zawhte dum pasarih ka hmu. Pakhat cu bishop kha a si ih, a dang pawl in a par ih siangpahrang lukhuh um mi mithi ruakkuang an zawn. Ka kiang ihsin an ra feh. Ka kiang an thlen tikah bishop in a cawlhter hai hnu ah i run zoh.... ..khi...khi.... Tom ih....Father, ziangah si Tom in khiti'n i zoh?"

"Peter," tiah puithiam cu a ttong thok.

"Asinan Father, ka lo sim ding, i run bia a si cu! Thu i cah. Tim Toldrum a thi ti ih Tom Tildrum sim ding ah i fial. Asinan Tom Tildrum cu zo a si ti ka theih lo tikah ziangtin si Tim Toldrum a thi ti'n ka sim thei ding?"

"Peter, himi hi a netnak rori a si thlang. Ralrinnak ka lo pe non rero zo."

"Father! Tom khi zoh hnik! Tom khi!"

Tom cu a herh aw kual, a taksa ruangpum a hung tum uar-o, ih a dunglam ke pahnih thawi' ding in, a hun ttong.

"Ziangtin e? Tim Toldrum a thi maw? Cuti a si ahcun Zawhtepawl ih Siangpahrang ka si thlang!"

Cu thluh in Tom cu tappi lan ah a va khir pet ih, Miau tiah vei khat ai phah in meikhu suahnak ihsin a suak.

Hmuh sal a si nawn lo.

* * *

Cumi hnu ah Peter in a hnattuan a hloh tivek thuhla rel ding khal a um cuang lo. Asinan Father Allen thuhla ahcun......

Si ko. Father Allen cu mi ttha a si. Asinan mi hmuahhmuah in sambaunak tumpi pakhat a nei an ti thluh. Ziangahtie thuhla zum um lo zet – Zawhtepawl ih Siangpahrang Tom ih thuhla – a rel ttheu ruangah a si.

Miau.