Hni Uar-o Aw (38)

Hni Uar-o Aw (38)

Hrem Hmun ah Pastor

Rang Kung timi hmin nei veve hi venghnen aw in an um. Rang Kung pakhat cu sumdawng a si ih, pakhattu cu pastor a si. Ni khat ah sumdawng Rang Kung cu thilri la ding in Yangon ah a tlawng. A feh suah ni ciah ah a venghnen pastor Rang Kung cu a thi kherkher. Sumdawng Rang Kung cun Yangon a thlen vete'n a innsangpawl hnenah thirhri ca a kuat. Cui' thirhri ca cu tipang thilthu in pastor Rang Kung ih nupi hnenah a thleng kherkher. Cui' thirhri ca ahcun hiti'n a ngan aw: "Ka fehnak ding hmun cu himdamte'n ka thleng. Khua a hlum dan cu tawrhawk ttha khal a si lo. Ka ra feh pangpang cu ka sir aw nasa - Rang Kung," ti'n.

Tum Tthelh

"Cumi, na pasal cu tipang thilthu liolio ih na kap that mi maw rak si ngai?"

"Si e, ka kap that tum mi cu ka pasal ih nu sawn kha a si nan, ka pasal hi kan karlak ah a rak tla lut pang si lawm."

Hautak Lo

"Ka fanu neihsun nupi ih neih na duh ngai ahcun a duhzawng na pek thei a ttul ding si khawh, na pe thei kem?"

"Pe thei tuk e. 'Nangmah lawng ka lo duh' i ti ih, thil hautak dang a um ka zum lemlo."

Palik Ihthat Thei Lo

"Boihboih, sun ihthah a cu zo, na ihthah duh lo ahcun palik ka ko thlang ding simai."

"Palik cu ko khal awla tuvek ahcun an itthat duh cuang awm lo."

Lasi Hmel Sia

"Ka falanui' hmel tthat zia cu a, vancung ih lasi hun tawh thlak mi vek rori a si."

"Lasi tawh thlak mi cu a si men thei, asinan a rung tlak lai ah khan a hmel a sawh siat thluh a si zik khi maw."

Remcang Lo

"Sayapa, taxi to man cu ziangzat ding saw?"

"Thawng hnih."

"A si ahcun za nga man hrawng cu dunglam ih kan kir sal mai a ttul ding; paisa thawng khat le zanga lawng ka nei i."

Buaithlak

"Tuizing cu ka kaa a va thaw lo ve."

"Na kaa hnak in voksa hi a thaw sawn lo maw?"

Ngaisang Ttha Duh Lo

Hlasakthiam, hminthang aw ter ve zet pakhat hi a inn luah mi neitu thawn an to aw ciamco. "Ka pi, na inn ka luah duh hman hi lungawi nasa aw. Tuihnu kum 10 hrawng ahcun mi tampi in 'Hitawk ahhin kan ngaisan zet mi hlasakthiam kha a rak um dah' ti'n an run rel lai ding hongei," a ti. Inn neitu nu cun, "Tuizing lala ih inn luah man in pek lo ahcun thaizing ihsin cutin an run rel cih ding a si mai," a rak ti.

Dang Nal Sual

Mipi tam zet in nunau pakhat ih hlasak an rak ngai ttheptthep. An lak ih pakhat in a kiang ih to pai' hnen ah: "Cu nui' hlasak thiam lo dan lawmam cu a va mangbang thlak ve aw! Hla a sannak zawn ah sinthir ai vek, a niamnak zawn ah buthlak ai vek, thengre hman tluk ta hlah," tiah a soisel. A kiang ih to pa cun, "Cu ti maw si, ka nupi a si khi," a rak ti. Cuvete'n, "Aw, ziang lo a si zik sawn khi, a sak mi hla in a zir lo tuk ruangah a si sawn khi, khivek tla cu hla ti hman a tlak lo hrimhrim. Zovek ha maw khivek hla mumal lo rak phuah ruairo i," a ti leh. A kiang ih to pa cun, "Keimai' phuah mi a si khi," a rak ti sal cuh.....um ngaihnak thei lo in a mit a nuai thul, a hrok bol a tham thul, a hmai a sa hiamhiam thluh.

..................................