Hni Uar-o Aw (39)

Hni Uar-o Aw (39)

Hmai Fai Tum

Tlangval pakhat in ngakhur pakhat ah sur a rak vorh. Tawkfang a vorh ngah hnu ah pa pakhat a rung ih, "Tlangvalpa, na awk maw?" tiah a rung sut. Tlangval cun, "Tlangval tilttial sur vorh tla cun awk awmtak maw, dong cancan hman pahra lai ka awk silawm," tiah uang aw nawn in a sawn. Pacangpa cun, "Zo ka si ti na thei lo a si hi maw, himi ngakhur neitu hi ka si," a ti tikah tlangval cun, "Nang khal in zo ka si ti na thei lo a si hi, ttiaural lam ih mi bum hmangbik ka si hi," ti phah in a tlan ciamco.

Ca Siar Thiam Lo

"Aiha maw, tuizing ka lenvahnak ah ka uite ka hruai ih, ka va hlohter sokhaw, ziangtin ka tuah ding?"

"Thuthangca ah na uite a hloh thu suah awla."

"Ai, cuvek a tthahnem zik lo. Ka uite in ca a siar thiam cuang lo pi."

Riahsiatnak

Pabik in, "Nupi, ziang na cang saw, na riah a va siat hmel ve?" a ti tikah nubik cun, "Ka cabu siar mi hi a riahsiat thlak tuk silawm," tiah a sawn. Pabik in, "Ziang ca saw na siar, a ngantu a va thiam awm ve," a ti tikah nubik cun, "A ngantu cu cazi ttukttak men khal a si thei ko, ka siar mi hi bank ih paisa kan retnak cabu a si i."

Ngai Thupi Lo

"Ka pa, ka nu cu lungphu cawl in a thi hokhaw."

"Eheu, a va tizia ve aw, cuti a si ahcun zanriah suan ding fangfai pawng khat kan tthum thei  ding a si cu."

Dan Pahbal Lo

A u in, "Cuarte, kan fala leng tlun caan ka nu sim aw hlah ka lo ti rero si, zia'hsaw na rak sim thotho," a ti.

A nau cun, "Ka sim rengreng lo, nazi paziat ah ha nan rung tlun i ti hman ah 'ka thei lo, zingpit in ding tisa soh ah ka buaituk ih nazi ka zoh man lo' ka ti men sisi," tiah a sawn.

Zinghmuh Tlang

A fapa in, "Ka pa, Zinghmuh Tlang hi khuitawk ah saw a um?" ti ih a sut tikah a pa cun, "E, cuvek cu kei ih theih ding ci a si na hen, na nu kha va sut aw. A nih hi 'inn ka thenfai' ti tahrat in thil hmuahhmuah hi a phiat hlo thluh ttheu silawm," a ti.

Mak Danglam

Nu       : Valte pa, tuini cu kan neihawknak kumcam vei hnihnak a si ih, kan arcang hi kan that mei lo ding sawm?"

Pa        : Ziangahmaw kan arcang lamlam kan thah ding? Tu tiangtiang nang thawi' kan neihawk hi ani' thiam lo a si na hen?

Nu       : Aw! Nang ka rak lo nei kherkher hi cu ka rak va aa lawmam ve aw.

Pa        : Na aa ti tla cu a thok ihsi khan rak thei ding hi ka si nan famteh, duhdawtnak khan ka mit a rak ti cawt ruangah ka rak hmu lo maimai silawm.

Kum Zatrep

Sibawi : Na kehlam khukruh ttha thei lo kha cu kum upat ruang men ah hokhaw, ruah har ding a um lo.

Putar  : Asinan ka vorhlam khukruh khal hi kum 70 ih upa a si ve tho fawn silawm.

Mei Khup Zualzo

"Zo rimnam ha ka uico hren mi rong sen rak hnihtu?" tiah tlangval pakhat cu thinling sosang ti theih theih fahran in a au. A kiang ih pa tum liailiaipi pakhat cun aw thuum nawn in, "Keimai hnih mi a si kha, ziangha'm, rel buai duh teh na nei ve mawsi?" tiah a rak hro. Cuvete'n tlangval cun aw zaidam le nem emem in, "Aw e, nei hran lo e, na rong hnih mi hi a ro zo i, na duh ahcun culmamnak ih hnih bet a theih ti ka lo sim zik men silawm," tiah a phat kual.

Poi Luar

Tlangval pakhat in fala hnen ah, "Ka lo duh zia hi a theih hman na theithiam ban lo ding. Kan venghnen tlangval vek cun ka lian ve lo. Anih vek cun sumpai hawl suah dan khal ka thiam lo tla a si men ding. Asinan, ka duhdawtnak hmuahhmuah hi na hrangah ka hlan ih, na hrang ahcun tuah huam lo mi khal ka nei lo," tiah a sim.

Cutikah fala cun, "A va lungawi um ve. Cuti ih ka hrang ah tuah huam lo mi na neih lo ahcun, na rel mi nan venghnen tlangval milian kha in rak biak awla a ttha ding," a ti san cuh.

Thinthir Nei Lo

Inn hrang an timi, a neitu hman in an hngak ngam nawn lo mi inn ah an khua ih pa huaisenbik an timi cu finfiah tum in a riak. Zan lai ah cu pa cu a zun suak in a tthang. A hung tthangfim cu a ihnak pindan sangka cu thli hrang awn huho hin a run hran ong. Veilekhatah thlahrang hmel rap-um zet hi a rung lang thutthi cih fawn. Thlahrang cun cu pai' hnen ahcun aw rap um emem in, "Hi inn ahhin kum sawmruk lenglo ka um zo ti na thei maw?" tiah a sut.

Cu pa khal cun thinthirnak sete hman nei riai lo in, "A va remcang ve aw! Kum sawmruk sung na rak umnak a si awk ah, hi inn umtudan cu na theifiang nasa ding a si cu. Tu ahhin ka zun a suak tuk lawmam ih, nang hi inn ih cincang thei deuh tu na si kha, zun-inn umnak in hun sim hnik e," a ti. Thlahrang cun cuvek ih ningttih nei lo lawmam cu mak a ti tuk thla thuah hnihnak tivek a um a si ding ti'n amah sawn tawsup in a tlan ciamco.

Hnemawknak Rethei

Fa        : Ka nu, ka nu, ka rualpipawl in, "Lu Pawr," ti'n in auh ciamco.

Nu       : E, Valbawih, poi ti duh hlah. Na lu cu tum hmansehla a sung ah zianghman a um cuang lo pi.

Turu Lo

Pacang pakhat hin lamzinpi ah buri dip pakhat a run pu suk. Culaiah pa thurawn tlak a si lo ding ti theih theih zet pakhat in a liang ih rak beng phah in, "Rual, ziangha na put rero?" tiah a rak sut.

Pacang cun, "Buri dip sung ahhin ar an um, a sung ah ar paziat a um ti hun hisap hnik, na hisap dik asile a sung ih ar pahnih hi ka lo pe thluh ding," a rak ti. Anih khal cun buri dip cu zoh cuahco phah in, thungaithlak ih a ruat rero hnu ah, "Pali a si ding," a hun ti thotho cu maw.

Rem Thei Lo Luar

"Kha, ziang tuah ha na tum i, lei na laih rero?"

"Mizan ah ka uicang a thi i, a phumnak ah ka ti a si hi maw,"

"Cuti cu, uico pakhat phumnak ah ziangahsaw hmun thumthum na laih?"

"A, a hmaisa khur hnih kha cu duh hnak in ka rak lai bi deuh i, a tlem thei lo silawm."

………………….