Hni Uar-o Aw (40)

Hni Uar-o Aw (40)

Kai Fuh Thei Lo

An sayanu in, "Pa Sawl, Kawlram ukawknak daan hrampi ngantu kha zo ha?" ti ih a sut tik ah Pa Sawl cun, "Ka theih sawm," tiah a sawn. An sayanu cu a thin a heng ih, Pa Sawl nu le pa hnenah an fapa in saya thu a ngai lo thu a sim.

Cutikah Pa Sawl pa cun, "Sawlte, nangmai' ngan mi a si ah tla cun pha kual rero lo in phuang aw mai awla, thuphan per cu a ttha lo ho pi," tiah nun a sim.

Mipi Hmai ih Thucah Simtu

"Cuti ih vun rel ve ding tla cun a, bualrawn khat ih mipi to hmiarhmiar hmai ah thu ka sim ve dah hun si ah."

"Nang ve hin khuihman ah thu na sim hnai zik lo. Asile, ziang thu saw na sim i."

"E, sikret, kuak le kuva ka zuar thu ka sim hai famteh."

Cumkheng Speed in

"Eheu, Pa Berh, ziang ca ha na ngan rero?"

"Ka fala, ca ka kuat tum i."

"Cu cu va si sehla, na va ngan fuung lawmam em?"

"Aa, ka falanu hi ca siar thiam ve ttawkttawk fang a si i, ca a siar cak thei lo ruangah silawm."

Theithiam Fiang

"Rualnu, na tlangvalpa in nunau dang a hnam lai kan hmu ngah sokhaw."

"A hlawhtling maw?"

"Hlawhtling lamlam hlah."

"Ka tlangvalpa a si lo tinak a si cu."

Please in

"Pa Bong, please in tidai i run suah hnik e."

"Ka u Bawr, please ka hmu lo ih khuathai in ka run suak mai."

Thucah Netabik Siava

Innsangnu cu thih ngam in ihkhun ah a it. A ihkhun kiang ih amah kiltu a pasal hnenah, "Valte pa, ka thih hnu ah cun in theihhngilh bembem lawlaw aw, na duh le'n nupi dang tla nei in, nuam zet in run nung mai aw. Cule, nupi thar na neih tikah ka suitthi, zunghruk le fautepawl siseh, ka hnipuan hmuahhmuah siseh, kenter thluh awla ka duh. Hihi ka dam lai ih, ka par ih na rinumnak hrangih lungawithu ka lo simnak ah run ruat awla ka duh," tiah thucah netabik a sim.

A pasal cun a lu dom nguaingo phah ih thu a ruat hnu ah, "Um hrih, Valte nu, na hnipuanpawl cu a hruh thei ka zum lo. Anih cu nang hnak in a tum in a sang sawn silawm," a ti cuh!

Hnam Hmaisabik

"Darling, kei hi mipa na hnam hmaisabik mi ka si maw? Ka si ding ti aw?"

"Si tuk e. A va mak thei ve aw, ziangtin si pei, mipa ka hnam dah mi i piang in hivek thusuhnak mak lo lutuk in sut ttheu hi aw! Ka hnam hmaisabik mi mipa na si bak ah, na zei bik fawn."

Pa?

"Hei, Palikpawl, in rung bawm uh; ka palepawl an sualaw ciamco."

"Valte, a sual-aw-tu lak ah zo sawn khi saw na pa cu?"

"Ka pa zo sawn a si ti an theih lo ruangah silawm an sualawk rero."

Pianthar Caan Tawi

Pa pakhat in a nitinbu ah hitin a ngan: "Christmas le Kum Thar hrawng ah khuitawk hman ah ka veivak lo. Zu ka in lo, zuknung zohnak hmun ah simaw, huauhuaunak hmun ah simaw, ka feh lo lawlaw. Tuante'n ka it ih, tuante'n ka tho ringring. Midang in tuah ding ih in tuk mi tapoh cu phunnawi lo in ka `uan vivo. Ka nupi hrang khal ah ka rinum nasa," ti'n. Cu thluh in cahmai hnuaita lam ah hitin a ngan bet: "Asinan, hi'ang thil hmuahhmuah hi tui' ka umnak thawnginn ihsi ka suah hnu ah cun a dan a dang verver lai ding."

Zaidam Man Tthahnem?

Pa zaidam zet, nupi sualral nei a um. A nupi in ttongkam siava hmuahhmuah sawm khawm in, "Na ning a zak lo maw? I sawn kir, i sawn kir nawn hlah, ka lo khawng kuai thluh ding hokhaw," tiah tapsak kawm ih daitei' to ngiaungi men a pasal cu a hro ciamco.

A pasal cun awkam nemte thawn, "Aw, Nute nu, zianghman ka rel si lo maw, daite'n ka to men silawm," a ti.

Nubik cun awki sang le tteng ruairo in, "I melh dan hrukhro tla kha! Na thinlungte'n "hrothak" i ti a si kha. Na bawngbi zal tla cu na hei pur lai sapbai. Na zal sung ihsi khan na kutzung in i run khih tengteng ding," a ti ciamco cu maw.

Ttaza Lo

"Valte, tuisun teh tlawnginn ah tthate'n na um maw?"

"Ka pa cu na ttaza lo thei lutuk. Kei teh zung ah tthate'n na um maw ti ka lo sut dah mawisi?"

Anmah An Buai

"Rangoon na vung tlawn cu a, Kawl ttong le'n a hmik a hmak hman na thiam fawn si lo, na vung talbuai nasa lo maw?"

"Kei cu talbuai lo e, anmah sawn kha ka ttong an theithiam lo ih an talbuai nasa."

Poi Lo Nasa

Pa pakhat hin bus sung ih a kiang i' totu hnenah, "Kuak fawp sehla poi na ti lo ding ti aw?" tiah fel cuh fahran in a vun sut. A kiang ih totu cun, "Poi ti hran lo e, amahlawngte ka kiang ih kuak an fawh tinte'n ka luak ciamco ttheu, na par ih ka luak pang khal asile poi cu na ti cuang lo kei cu ti aw," a rak ti ve.

Hnak Famteh

Khawte ih nunau pakhat Falam ah a tlawng. Mawttaw thawi' Falam Town Hall hmai ih an feh tikah, cu nu cun a kiang ih to pai' hnak ah dimtei' kheuh phah in, "Himi hi mawsi, Falam Town Hall an timi cu?" tiah a sut. A kiang ih to pa cun, "Si hlah e, kha kha cu ka hnak a si kha," tiah a sawn.

Bangrep Ciah

Innsangpa cu, "Nunaupawl hi a, 'Ka bazar ding' nan ti ih, sunvute'n nan vak hlo, zanlam ah zianghman run lei tlung lo in nan rung tlung leh fawn, nan umtu dan hi theithiam nawn hlang," tiah a phunzai.

Cutikah innsangnu cun, "Mipapawl teh, 'Sa ka bawh ding' nan ti ih zan riak rori'n nan pok suak, a thaizing ah zianghman run tlun lo'n tilhum in nan rung tlung ttheu fawn, nan umtu dan hi theithiam ve ce hlang," tiah a sawn.

…………………..