Hni Uar-o Aw (42)

Hni Uar-o Aw (42)

Fala Mitmei Theithiam Cak

A rualpa in, "Tuizan na fala leng cu na va ra tlung ol lawmam ve, zia'hsaw?" tiah a rak sut. Anih khal cun, "Si e, a sungkawpawl an rak leng hlo thluh i, kan pahnih lawng kan um. Titi phah ih tisa kan in thluh cun hla nem diahdo te a phuan ih, nuamtete'n kan lam tlang. Hnget zet ih pom aw phah in rei deuh kan lam hnu ah lektthik eng a phit," a hun ti cun a rualpa cun mitmeng pawng lellel in, "Cu thluh in ziangtinsaw nan um?" tiah a rak sut lohli.

Anih cun, "Khativek cin ah cun e, mi-aa tomtawhlot si ve hek lo cun, 'ka tin a duh thlang a si hi' ti ka theithiam ih ka rung tin mai," a rak ti.

Ngaihsam Thang Tei' Nupa

Nupi    : Aw..a va poi ve, inn ih kir sal lohli a ttul. Tappi meisa ka mih hngilh si, kan inn tla a rak kang pang kei.

Pasal   : Inn kang ding cu phang duh rengreng aw hlah. Kei khal in tipep (pipe) ka on ta mi ka phih hngilh ve kha. Anmahte'n an rak phal mit aw ve mai kei cu.

Khualbuk Tharhlam

Khualbuk pakhat ah mi pakhat in riah man a va sut.

"Mahte ihnak tuah cop in zan khat ah 1500, mahte ihnak tuah cop lo in zan khat ah 3000."

"Eheu, mahte ihnak tuah cop ih cuti zatzat a hlep theih ding tla cun ka ihnak cu keimahte'n ka tuah mai kei cu."

"Aw, a tthat cu. Sobul le tlawngkhen ka lak sung ah kotka ih thing-ah phek khi rak pu so awla a ttha ding."

Sai Thawi' Khaikhinnak

"Sai leinak daih paisa neih ka va cak ve."

"Sai cu zia'hmaw na hai?"

"Sai cu hai lo e, a sai leinak ding daih paisa sawn kha silawm ka duh mi cu."

Hmelse Roling

Bus sung ah nu pakhat in naute hmelse luarkai pakhat hi a run pom lut. A kiang ih to pa pakhat hin hmaisong riai lo hin, "Ka pi, na naute pom cu a va hmelse lawmam ve aw! Moses khan hmu sehla cun amai' ruangah Thukam Hleikhatnak hman a tuah duh tengteng ding. Khavek tete maw, minung hmel khal a si lo kha. Leitlun ih naute hmuahhmuah lak ah hmelsiat lam ah cun a cungcuang rori ding ka zum," tiah ttongkam sup lo in a rak ti. An kiang ih um pawl cu an hni vualvo.

Naute nu cu a ning a na in a thin a heng tuk. Curuangah hmun dang deuh ah a va tthawn. A va tthawnnak kiang ih rak to putar pakhat cun, "Na riah a va siat hmel ve, khativek ih lo titu tla cu va beng fukfi ta hen. A ttul ah cun na pom lai mi zawngte kha cu ka rak lo pomsak hrih mai ding," tiah a rak hnem.

Vannei = Vanduai

Vei khat cu U Salai hi vantthat thlak zet in a duhbik mi fala, ngaihzawn hman a ngaihzawn ngam lo mi in ttelifawn in an run bia. Asinan vanduai thlak zet in nambat a hmeh sual ruangah a si thu ngaidam run dil in phone cu a thlak cih.

Vei khat khal hramlak ah savom hliam tuar in a rak hual ciamco. A ttih lutuk tlan ngaihnak thei nawn lo cun, kham hrap ah a tawlh thla ciamco. Cui kham hrap ah cun vantthat thlak zet in relh-thup-nak ding puk ttha zet hi a rak um. Asinan vanduai thlak zet in cui' puk sung ah cun kiosa rilrawng maktara a rak um.

Vei khat khal paisa a ttulhai lai tak fang ah, vantthat thlak zet in, a hngilh hman a hngilh zo mi paisa baktu pakhat in 5,000 a run sam leh. Asinan vansiat thlak zet in paisa lem a rak si.

Ttum khat khal ttek in a tlak leuleu. Vantthat thlak zet in a kiang ih thinkung sawn cu a tlak ngah. Asinan vanduai thlak zet in thingkung tlu cun a nen that ve.

Putar Maksak

Putar No: "Sibawipa, na theih vek in kum 92 lai ka si zo, nikum ah khan tleirawl kum 16 mi nupi ah ka nei. Hi, tu ah hin beisei ban lo thil a thleng. Ka nupi in fa thla ruk mi a pai a si cu. Mak na ti in, in lungawipi ve zet lo sawm?"

Sibawipa: "Leitlun ih thilmak pariatnak a si rori cu! Thuanthu pakhat ka lo sim ding aw: Vei khat ah, ramtawipa pakhat hin meithal hman theih nawn lo pakhat thawn pawpi a rak bawh. Rei tawk a bawh hnu ah pawpi pacang mawi thiauthiau zet hi a ra suak. Uluk emem in pawpi pum zawn cu a vun tin. A tin fuh hnu ah a meithal cu a hun hmet. Asinan a meithal cu ttha hek lo, a tlawlh men. Asinan vantthat thlak zet in pawpi cu a ril tupti. Va zoh fiang na khaw, pawpi calpadar ah cerek a rak lut hi a rak si! Mak na ti ve lo maw?"

Putar No: "Aa! Cuvek cu, thuphan ti hman a tlak lo! Hmun dang ihsi rak kap-ve-tu an um hun si ding ah. Cuti lo cun a ngah lo rengreng.

Sibawi: Si tuk e.

Fim Leh Mai Ding

Rampi tlangsuak palai pakhat in amai' bial sung ih thinlung buai pawl retkhawmnak hmun a va hal. Thinlung buai pawl lak ih a zia-um deuhbik pakhat cun, "Ka pu, zo na si?" tiah a rak sut.

Anih cun, "Hitawk kiangkap bialtu tlangsuak palai ka si," tiah a sawn. Cutikah a suttu cun hni khukkho phah in, "E, ka pu, na thinharter duh rengreng hlah maw. Kei khal hitawk ih ka ra lut pek ah cun rampi uktu vek in hokhaw ka theihawk, asinan in kilkhawi dan hi a tthat zet ruangah ka zia-um cak nasa.  Nang khal thla thum hrawng na um hnu cun na ttha ve deuh mai ding,"tiah a rak hnem.

Sibawi Buhsah

Sibawi pakhat hin a mina hnen ah, "Na ke ttha lam, tan ttul lo kha ka rak tan pang, curuangah a se lam kha kan tan a ttul sal thotho. Asinan na riah rak seter tuk hlah, thu lungawium pakhat a um. Hitivek dinhmun na thlen ding tak ah cun na kedam hi na hrang ah a ttul nawn lo ding a bang. Na kiang ih mina pakhat in, 'Awmmawi a ti zatzat ngen sehla, ka rak tlen ding,' a ti," ti'n thu lungawium a sim.

Pumkhat Fuh Lo

Kutsih ttiak ciah in inn ah an tlung mai. An nupa lawng pindan sung ih an um lai ah a pasal cu vei nei ti theihtheih emem hin a um. A nupi cun duat zet in, "Duhmi, ziang harsatnak si na neih? Nupa kan si ih, pumkhat kan si thlang hi, i hun sim awla a thawidam dan ding tla kan ruat tlang pei cu," tiah a hnem.

Cuvete'n a pasal cu a ding thutthi ih, "Taktak maw? A tthat cu! Cereheu law! Ih maw, kut kan sih hlante ah khan kan hmuansak fala in kan fa thla hnih mi a pai thu ttelifawn in i run sim i," a ti.

………………………..