Hni Uar-o Aw (41)

Hni Uar-o Aw (41)

Final Thleng Thei Tamter Tum

Saphawhlum Sit Puai an tuah mi, final an sit zan ah an ramkulh ih lehpannaklam tlangbawi (sports minister) cu khuallian ah an sawm. Laksawng an pek ttheh in an khuallian cun hitin thucah a sim: "Tuini ih laksawng petu ka si thei hi a lungawium ka ti nasa. Asinan riahsiat-emem-nak khal ka nei. Kan theih vek in kan ram ah saphawhlum club za tampi kan um. Asinan cumi lak ih team hnih lawng in final an thlen hi cu, bawhlung lam ih kan hnufualzia tilangtu kan ti lo thei lo. Asinan ka kaihhruai ding mi cozah hi cun team tampi in final an thlen theinak dingah theihtawp in taimak kan suah ding ti ka sim duh," ti'n. Mipipawl khal cu mawlmang emem in an za an beng durdo.

Sii Pek Thiam Sibawi

Suakthuan: Sibawipa, sii in pek mi kha ka ngaihmai nasa. Curuangah lungawithu lo sim ding in ka ra a si hi.

Sibawi: Eheu! Cumi, sii ka rak lo pe dah si maw?

Suakthuan: Kei cu pe lo e. Ka paseu sawn kha si, sii na pek mi cu. Sii na pek hnu reilote ah kan vui liam fel thei. Kei hi cu a ro cotu ka si.

Mipa Ngaingai

A Rualpa: Na nupi thawi' nan tawhawk tinte'n na nupi in a lo beng fukfo ttheu hi cu, a ningzahthlak theituk e. Mipa maw caicim ha'm na si ti khal theithiam nawn hla'ng.

Amah: Mipa ka si ti cu a fiang lawlaw.

A Rualpa: Nunau hman ngam lo tla cun 'mipa ka si' ti aw tluaihtlo aw hlah! Caicim hman tluk lo pa.

Amah: Ka nupi in caicim a ttih nan kei cu in ttih lo silawm. Curuangah silawm mipa ka si ka ti ngamnak cu!

Nungdam Lai

"Ka pi, kan dunglam kum nga ah na pasal a thi zo ti i sim fawn, tu ah fate kum 3 mi le kum 2 mi na neih thu i sim lala fawn, ka va theithiam lo ve."

"Ziangmaw theihthiam lo ding um? Kum nga liam zo ahkhan ka pasal a thih thu ka lo sim men na, kei ka thi ve ka ti ual lo."

Rem Thei?

"Thlapi par kai thei hman an um ahcun, ni par ih kai thei kan tum ve a ttul."

"Aizelaw! Cumkhengpawl in riltepeng tla ko in an lo hnihsan dah kei! Ni par na thlen man hlan ah khu ding hman tang nawn lo ko in a rak lo em hlo thluh kei cu! Mi dang tla na sim pang kei, ningzahthlak in."

"Nisa in i em ding na he. Zan ah ka kai ding silawm."

Rem Thei?

"Ka pu, ziangsaw lamzin meisa eng hnuai ih na hawl rero?"

"E, innsung ah ka mitkharh ka hlohter pang i silawm. Innsung cu thimtuk khaw ka hmuh lohli thei ka zum lo i, meisa vannak lamzin lam ka ra hawl a si hi."

Hnam ih Fiang

Lusei tlangval pathum hi hnam ih feng le feng lo an zuam aw. Vai huat an zuam aw a si bik ding. An lak ih pakhat cun, "Mizoram ih Vai dawrkai rengreng vawite khat hman ka dawr hrih lo," a ti. Pakhat leh cun, "Vai sang zuar ka hmuh i piang in kutthak rawtnak ih ka hman bak ah, Vai film rengreng ka zoh ve dah lo," a ti ve. A pathumnak cun, "Vun rel ve ding tla cun a, kei teh phun khat ka kai ihsin Vai ttong (Hindi) exam vei khat hman ka ong hrih na he maw," a ti. (from Hlim Ni leh Nuihlai Ni by Mafaa Hauhnar)

Thluak Nei Lo

"Um hrih hnik unaupa, ka hmailam can ih thilthleng ding theih cia ka duh i, 'thluak lam thiam mi' maw ka pan ding, kutttial zohthiam ha ttha ke?"

"Kutttial zohthiam pan aw. Kutttial cu na neih kha maw?"

Duh Hril Thiam

Thutthentu: Na sualnak hmuh fiang a si ruangah, thi ding in na thu tthencat a si. Asinan na thihdan ding ahcun na duh na hril theinak kan lo pe. Ziangtivek ih thih ha na duh?

Danbuartu: Ka thihdan ding hril theih a si ahcun 'tar thih' ka hril.

Tumtahnak Hnget

Zirhtu: Pa Sawl, phun hra na on hnu ah ziang tuah ding tumtahnak na nei?

Pa Sawl: Ka pa vek in sum dawn le, thla tin ih paisa a thawng za tel ih lak luh ka cak.

Zirhtu: Eheu! Na pa cun thla tin in paisa a thawng za tel in a la lut ttheu si maw?

Pa Sawl: La lut ttheu lo e, asinan, lak luh a cak ttheu.

Paih Sal Lo A Theih Maw?

Vanzam a zam san lai fang ah a cet a siat. Vanzam mawngtu cun, "Kan vanzam hi rei lo te ah a puak kuai thluh ding, curuangah kan lak ah hin thlacam thei kan um maw?" tiah a sut hai.

Putar pakhat, sakhawmi-aw-ter zet pakhat cu, "Keimah thla ka hun cam ke," tiah a hung ding. Vanzam mawngtu cun, "Vanzam par ih minung hi 30 kan si ih, parachute (thlithawng) 29 tlawng a um ruangah, midangpawl kan dawp thlak lai ah nang cu thla na rak cam poh kei cu, kan lung a awi nasa," a ti sal.

Hnemawknak Anhaithlak

Sibawi: Ka pu, na ziangha dam lo?"

Putar: Kar khat lai ka zun ka thawh thei lo zo a si hi.

Sibawi: A si ngai cu a. Kum ziat ha na si thlang?

Putar: Kum sawmkua ka kai ve thlang.

Sibawi: E, cu ti a si ahcun na zun na rak thawh rei ve thawkhat em mai, tuihnu cun na thawh thei nawn lo khal ah ngai hahdamdan thiam thlang mai aw la a ttha ding.

Thu Tthin Awlsam

Tlangval: Zirtawp ah kan tong aw leh ding aw.

Fala: Zirtawp ah ruah rak sur bang sehla teh?

Tlangval: A si ngai, zirtawp ih ruah a rak sur pang le'n tlawngkaininga ah kan tong aw mai ding aw.

Sungttuan Fel

"Duhte Pa, sun ih sii ei ding kha hngilh hlah la maw."

"Phang duh aw hlah Duhte Nu, kan zung ih sungttuan thar nute cu a hmel a tthat tluk thotho in a fel ngaingai?"

"A si ahcun sii ei kha va hngilh sawn awla a ttha ding a si cu."

………………………………