Vancungram ih Sanghrang A Thlendan (Angola Zatlang Thuanthu)

Vancungram ih Sanghrang A Thlendan

(Angola Zatlang Thuanthu)

Kimana timi tlangval pakhat a rak um. Kimana cun nupi ah Vancung Thaihlio tthit a duh. Curuangah Vancung Thaihlio ih pa Ni Lalpa hnenah ca a kuat tum.

Cakuat a ngan thluh hnu ah Sabek hnenah a va feh. "Himi cakuat hi in hung pek sak thei pei maw?"

Sabek cun, "Vancungram ah ka feh thleng thei lo," tiah a sawn.

Kimana cu Zuknung hnenah a feh. "Himi cakuat hi in hung pek sak thei pei maw?"

Zukneng cun, "Vancungram ah ka feh thleng thei lo," tiah a rak sawn ve.

Kimana cu Mupi hnenah a feh. "Himi cakuat hi in hung pek sak thei pei maw?"

Mupi cun, "Lamzin hrek tiang ka thleng thei. Asinan Vancungram cu ka thleng thei lo," tiah a rak sawn ve.

Cumi hnu ah Kimana hnenah Sanghrang (tidai sungih um butlak ci khat) a ra. Sanghrang in, "Ziangah na cakuat cu nangmahte'n na hung pek lo?" tiah a sut.

Kimana cun, "A fehdan ding ka thei lo," tiah a sawn.

Cutikah Sanghrang in, "Asile keimah ka hung lo pek sak ding," a ti.

Kimana cu a hni men. "Sanghrang in Vancungram ah cakuat a hun keng thei ding maw?" tiah a ti.

Sanghrang cun, "Ziangvek khal ka tuah thei thluh – ka zuam ahcun," tiah a sawn.

Sanghrang cu tikhur pakhat sungih um a si. Cumi tikhur ahcun ni tinte'n Ni Lalpa riantu falapawl an rung ttheu. Vancungram ihsin Maimom innraang hridai vawk in an rung ttum. Cu thluh in an tithawl ah tidai an thun ih an kir sal ttheu.

Sanghrang in cakuat cu a kaa ah a hmawm ih tikhur sungah a rak relh. Vancungram ih um fala pawl cu tidai khai ding ah hla sak phah in an rung ttum.

Sun ttha awla, ka unau.

Sun ttha awla maw.

Tikhur sungih tithawl an vun thlak tikah Sanghrang cu tithawl pakhat sungah a khir lut. Falapawl cun an hmu lo.

Cu thluh ah falapawl cu Maimom innraang vawk in an kai so sal. Ni Lalpai' inn ah an hung thleng ih, an tithawlpawl cu pindan sungah an ret.

Sanghrang cu amahte lawng a tang. Cutikah tithawl ihsin a khir suak ih, cakuat cu tohkham sau pakhat parah a khak. Cu thluh in kerkawm ah a relh.

Ni Lalpa cu tidai in ding in a ra. Cakuat a hmu ih a ong. A siar: - "Keimah, Kimana, leilung ih um tlangval, in nupi ding ah na fanu Vancung Thaihlio neih ka beisei."

"Ziangtin hivek a cang thei?" tiah Ni Lalpa cun a ttong.

Curuangah tidai khaitu falapawl hnenah a feh. "Himi cakuat hi nan hun ken mi a si maw?" tiah a va sut.

"Si lo," tiah falapawl in an sawn.

A nupi Thlapi Lalnu hnenah a va feh sal ih cakuat cu a siarter. "Ziangtin tuah sehla a ttha ding?" tiah a sut phah.

Thlapi Lalnu cun, "Kei i sut hlah! Na fanu kha va sut aw!" tiah a rak sawn.

Curuangah Ni Lalpa cu a fanu hnenah a va feh. Vancung Thaihlio cun, "Tthitumnak laksawng (nupi man) in pe thei maw timi kan zoh pei cu," tiah a rak ti.

Curuangah Ni Lalpa in cakuat pakhat a ngan ih tohkham sau ahcun a ret. Cu thluh in a feh hlo.

Sanghrang cu a ra suak ih cakuat cu a kaa ah a hmawm. Cu thluh in tithawl kawlawng pakhat sungah a khir lut.

A thaisun ah falapawl cun an tithawl an la ih hla sak phah in leilung ah an ttum lala.

Sun ttha awla, ka unau.

Sun ttha awla maw.

Tikhur sungih an tithawl an vun thlak tikah Sanghrang cu a khir suak. Falapawl cun an hmu lo.

Cumi thluh ah falapawl cu Vancungram ah an kir sal.

Sanghrang in cakuat cu Kimana a va pe. Kimana cun a rak siar. "Paisa bawm khat in pek thei ahcun ka fanu na nei ngah thei ding."

Kimana cun, "Ka tuah thei mi a si ual lo," a ti.

Sanghrang in, "Cuti asile keimah ka lo pek sak ding," a ti.

Kimana cu a hni. "Cakuat cu Vancungram ah na hung pe thei. Asinan paisa bawm khat cu na pe thei ding maw?" a ti.

Sanghrang cun, "Ziangvek khal ka tuah thei – ka zuam ahcun," tiah a sawn.

Curuangah Kimana in Sanghrang cu paisa bawm khat a pe. Sanghrang cun a kaa in a keu ih tikhur ah a feh pi. Tikhur sungah a lut ih a rak hngak.

Vancungram ihsin falapawl an rung lala.

Sun ttha awla, ka unau.

Sun ttha awla maw.

Sanghrang cu tithawl pakhat sungah a lut. Falapawl cu Vancungram ah an kir sal ih, an tithawlpawl cu pindan pakhat ah an tanta.

Sanghrang cun tohkham sau ah paisa cu a ret. Cu thluh in a relh.

Ni Lalpa a ra ih paisa bawm a hmuh tikah a mang a bang. "Ziangtin a cang thei?" ti'n a ttong.

Falapawl hnenah a va. "Paisa hi nan hun ken mi a si maw?" tiah a sut.

"Si lo," tiah falapawl in an sawn.

A nupi hnenah a va feh sal. Thlapi Lalnu cun, "Kei i sut hlah! Na fanu sut aw!" a rak ti.

A fanu hnenah a va feh. Vancung Thaihlio cun, "I hung hruai thei maw timi kan zoh pei cu," a rak ti.

Curuangah Ni Lalpa in cakuat pakhat a ngan ih tohkham sau ah a ret.

Sanghrang in cakuat cu a kaa in a hmawm ih tithawl kawlawng sungah a lut. A thaisun ah falapawl in leilung parah an vun thiar sal.

Sun ttha awla, ka unau.

Sun ttha awla maw.

Sanghrang cu tikhur ah a khir suak. Falapawl cu Vancungram ah an kir sal.

Sanghrang in cakuat cu Kimana a va pe. Kimana in a siar: "Na hung hruai thei ahcun ka fanu na nei ngah thei ding."

Kimana cun, "Ka tuah thei mi a si ual lo," a ti lala.

Sanghrang in, "Cuti a si ahcun keimah in ka hung lo hruai sak ding," a ti.

Kimana cu a hni. "Vancungram ah cakuat na hun keng. Paisa bawm khat na hun keng. Asinan mo pakhat hung hruai ding cu na hlawhtling thei ding maw?" a ti.

Sanghrang cun, "Ziangvek khal ka tuah thei thluh – ka zuam ahcun," tiah a sawn.

Sanghrang cu tikhur ah a kir sal. Falapawl cu tithawl keng in an rung ttum lala.

Sun ttha awla, ka unau.

Sun ttha awla maw.

Sanghrang cu Vancungram ah an kaipi.

Sanghrang cu a khirsuak. Tithawlpawl hmuahhmuah sungih tidai ah a cil a phui. Phui. Phui. Phui. Cumi thluh ah tithawl kawlawng pakhat ah a relh.

Ni Lalpai' inn ih minung hmuahhmuah in cumi tidai an in ruangah an na thluh.

Ni Lalpa in khuavang sibawi a ko. Sibawi in, "Leilung ih tlangval pakhat hnenah na fanu pe ding in na tiamkam. Asinan na fanu cu a feh hrih lo. Curuangah leilung ih tlangval in natnak khawsia a hun thlah. Natnak khawsia cu sanghrang pakhat pianhmang a nei," tiah a sim.

Ni Lalpa cu a nupi hnenah a feh. Thlapi Lalnu cun, "Kei i sut hlah! Na fanu sut aw!" a rak ti.

A fanu hnenah a va feh. Vancung Thaihlio cun, "Ka feh ding," a rak ti.

A thaisun ah Vancung Thaihlio cu tidai khaitu falapawl thawn tikhur ah an ttum.

Sun ttha awla, ka unau.

Sun ttha awla maw.

Falapawl in an tithawl ah tidai an thun. Falapawl cu Vancung Thaihlio tan ta in an tlung.

Sanghrang cu tikhur ihsin a hung khir suak. "Na pasal ding hnenah ka lo hruai ding," tiah Vancung Thaihlio cu a sim.

Vancung Thaihlio cu a hni. "Sanghrang pakhat in nunau pakhat lamzin a hruai thei ding maw?" a ti.

Sanghrang cun, "Vancungram ah cakuat ka hun keng zo. Paisa bawm khat ka hun keng zo. Mo ka hung hruai zo. Ziangvek ih thil harsa an si hman ah, ka rak tuah thei. Asinan ka zuam hnu lawng ih ka tuah thei mi an si," tiah a sim.

Cutikah Vancung Thaihlio cun, "Cuti a si ahcun ka neih duh mi pasal cu nangmah na si hi," a ti.

Curuangah Sanghrang cu Vancungram ah a hruai kir ih pasal ah a nei. Cutin khua an sa lan ta.

Cule, Kimana cu tu tiang in a nupi ding a hngak rero lai.

Hram: How Frog Went to Heaven, A Tale of Angola, Told by Aaron Shepard