Jesui' Cakuat

Duhdawtmi Ka Rual:

Na dam maw? Ka lo duhdawtzia le ka lo ngaihsakzia lo sim ka duh ruangah himi ca hi ka lo kuat. Mizansun ih na rualpi pawl thawn nan veivah lai kha ka rak lo hmu. Kei khal in i kom ve beisei in sunvute'n ka lo hngak ve. Siimlam a rung nai tikah, na hman mi ni khat cemter ding in ni tla eng mawi ka lo pe ih, na cawlh hahdam theinak ding ah zilthli dai nem ka lo pe. Cu thluh in ka lo hngak sal. Asinan rat ti na nei lo. Himi hin ka thin a nater zet. Asinan na rualpi ka si ruangah ka lo duhdawt lai thotho.

Mizan ih na ihthah lai khal ka lo hmu. Na mittlang run dai ka duh ruangah na lukham le hmelfang cu thlapi eng ka run tletter. Cu thluh in ka lo hngak lala. Kan biakawk theinak ding ah na hnenih i kawh thlak lohli ka beisei. Lo pek ding mi laksawng tampi ka nei.

Zing ah na tho tlai ih mansahlap in na buai ciamco. Ruahpi sur lak ahkhan ka mitthli an tel. Tuini cu na riah a siat hmel zet. Na um khal a har hmel tuk. Ziang na tuar ti ka theihthiam ruangah ka thinlung a na ve zet. Ka rualpi pawl in vei tampi in beidongter ih ka thin an nater ve ttheu. Asinan ka lo duhdawt. Awn-au rehnak hmun hrampi hring lakah ka lo duhdawt thu lo sim ka tum. Thinghnah pawl le thingkung pawl lakah dimte'n ka ttong ih, pangpar pawl ih rong lakah ka awkam ka thlah. Tlang lakih a luang mi tiva pawl ihsin na hnenah ka au. Vate pawl hnenah an sak ding mi duhdawtnak hla ka pe. Ni tleu hlum thawn ka lo thuam ih, na hip ding mi thli khal a rim ka thawtter.

Ka lo duhdawtnak cu tifinriat pawl hnakin a thuk sawn ih, na ttulhainak tumbik simaw, neih na duh zat tumbik simaw hnak in a tum sawn. Vancungram ah kumkhua timi kan cen tlang ding. Leitlun ih nun hi ziangtluk a harsa ti ka thei. Ka thei taktak, ziangahtile ka rak um ve dah. Curuangah lo bawm ka duh. Ka pa khal in lo bom a duh ve.

Ka pa cu mi bom huam mi a si ti na theih kha. I ko aw, i dil awla, i titi pi aw. Thutluknak cu nangmai ta a si. Ka lo hril zo. Curuangah ka lo hngak hrih ding. Ziangahtile ka lo duhdawt.

Na rual,
Jesuh