Mi Lian Bik ih Fahniang Kan Si
Carl timi leiram kau zet neitu mi lian pakhat a rak um. A neih mi cuan phah ih a aipuangter ding ah, rang to phah in, a leiram sung ahcun a veivak ttheu. Ni khat cu a duh bik mi rang to phah ih a veivah lai ah, midang loram sang cop ih cawm-aw-tu Putar Hans a tong. Putar Hans cu thingkung pakhat hnuai ah to in rawl a rak ei zik laifang a si.
Putar Hans cun, "Ei ding rawl i pek ruangah Pathian hnenah lungawithu ka rak sim ttheh ciah," tiah Carl cu a sim.
Asinan Carl cun, "Kei cu kha zat lawng ei ding nei sehla cun, lungawithu sim lamlam cu ka tum lo ding," tiah a el.
Putar Hans cun, "Ka ttulsam mi hmuahhmuah Pathian in pe thluh, curuangah a parah ka lung a awi," tiah a sawn sal.
Cu thluh ah Hans cun hitin a ttong a peh bet: "Tuini ih ka hnen na ra thlen kherkher cu a danglam nasa. Ziangahtile mizan ah mang danglam zet ka nei. Ka mang ahcun aw pakhat hin, 'Tuizan ah hitawk phairawn ih mi lian bik a thi ding,' tiah i sim. Ziang a sim duh ti cu ka thei lo nan, ka lo sim a ttul in ka ruat."
Cutikah Carl cun ngaih lo zet ih zoh phah in, "Zanmang tivek cu sullam an nei lo," a ti ih, a rang thawn a fehsuak sal. Asinan Putar Hans ih ttong mi cu a hngilh thei lo: 'Tuizan ah hitawk phairawn ih mi lian bik a thi ding,' timi kha. Ziangahtile an umnak phairawn ih mi lian bik cu amah a si ti a fiang zet. Curuangah siimlam ah a inn ih ra ding in sibawi a ko. Carl cun Putar Hans ih sim mi cu sibawi hnenah a sim. Sibawi cun cipciar zet ih a zohfel thluh hnu ah, "Carl, rangcang vek rori'n na harhdam in na cakvak ko. Tuizan ih na thihnak ding san a um lo," tiah a sim.
Asinan, Carl ih thin hahdamnak ah ti in sibawi cu Carl hnenah a riak ih, zanvar in phe an lek. A thaizing ih sibawi a tlun zawng ah Carl cun, Putar Hans ih ttongkam a rak ngai thupit tuk sual ruangah, sibawi cu ngaidam a dil.
Cumi thluh, zinglam nazi pakua ah thuthang phurtu in Carl ih sangka a ra king.
Carl in, "Ziang thuthang a um?" tiah a rak sut.
Thuthang phurtu cun, "Putar Hans ih thuhla a si. Mizan ahkhan itthat phah in a thi lanta," tiah a ra sim.
Hram: http://www.agiftofinspiration.com.au/index.shtml
15 September, 2016
Mi Lian Bik ih Fahniang Kan Si
Subscribe to:
Post Comments (Atom)
No comments:
Post a Comment