Nangmah Vek Zohman An Um Lo
Rang fate pakhat hin tiva pakhat tan a duh. Tiva cu a thuk le thuk lo a thei lo. Curuangah tuu hnenah, "Ka Pu Tuu, himi tiva hi a thuk maw?" tiah a sut.
Tuu cun, "Aw, ka fa, kei cun tiva hi tan sehla cun ka thi thei ding," tiah a sawn. Cumi a theih tikah rang fate cu a ttap. Ziangahtile tiva cu tankai a duh tuk.
Cumi lai ah caw pakhat a ra ih, "Ziangruangah na ttap?" tiah a ra sut. Rang fate cun, "Pu Caw, himi tiva hi ka tan thei lo. Ka hrangah a thuk tuk," tiah a sawn. Cutikah caw cun, "Hahaha, na aa tuk aw, tiva hi a thuk lamlam lo, kei tla cun olte'n ka tankai thei," tiah a sim.
Cutikah rang fate cu a lung a hnok. Curuangah a nui' hnenah a feh ih, "Nunu, tiva hi ka tan thei ding le tan thei lo ding ka theifiang lo. Ziangahtile Pu Tuu cun a thuk a ti ih, Pu Caw cun a puan a ti. Ziangtin si pei?" tiah a va sut.
A nu cun, "Ziangah nangmahte a thuk le thuk lo na tah lo?" tiah a rak ti. Curuangah rang fate cun tiva cu tankai thei a va zuam ih, a tankai thei ngaingai.
Himi thuanthu hi tluangtlamte a bang nan, mi tampi ih kan nun umtudan tarlangtu a si. Tuu in tiva a thuk tuk a timi cu a hrangah a dik ko. Ziangahtile rannung niamte a si. Cuvekin kanmah hnakih ttawnttai le ttihhrut pawl cun kan neh thei ding mi khal kha, anmah le anmah kha tahfung ah hmang aw in, kan neh thei lo ding vekin in sim ttheu. Anmai' hrangah cun an ttong mi cu a dik mi a si fawn.
Caw in tiva a thuk lo a timi khal kha caw hrang ahcun a dik thotho. Ziangahitle rannung tum a si. Curuangah amah le amah kha tahfung ah hmang aw ve in, rang fate hnenah tiva cu tankai olte a si thu a sim ve. Tuu le Caw ih thuron pek mi ahcun Caw ih thuron pek mi hi a ttha sawn. Asinan a tthat thluhlonak khal a um thei.
Kanmai' nun hrang lala ah midang ih thuron lak lo ringring hi thil ttha cu a si lo. Asinan a ttha bik mi cu kanmah rori in kan va tuah, kan va ttuan mi hi a si. Ziangahtile leitlun ah kanmah thawn a bangrep ciah mi zohman an um lo. Mi pakhat cio hi mi hranpa kan si ih, kan tuah thei cin a bangrep cio lo.
Leitlun ah nangmah vek ciah zohman an um lo ruangah, nangmai' hmailam can cu nangmah rori in khuakhang awla, nangmah rori in dinsuak aw.
Sirhsan: " Little Horse Crosses the River", A fable from China told by Zhifan Li- Fables and Folktales of the World, Told by the students of 152-1 Written Communication, Spring 2009, English Language Program, Kansas State University.
19 September, 2016
Nangmah Vek Ciah Zohman An Um Lo
Subscribe to:
Post Comments (Atom)
No comments:
Post a Comment