Fala Cungcuangbik (Norway Zatlang Thuanthu)

Fala Cungcuangbik

(Norway Zatlang Thuanthu)

Vei khat lai ahhin Leif timi tlangval no te pakhat a rak um. Leif cu duhnungza a si ih, a hmel khal a ttha. Asinan midang ih sim mi thu a ngai duh dah lo lawlaw. Amai' duhdan le hmuhdan hlir in thil a tuah ringring.

A pa in, "Ka fa, mai' hmuhdan fehpi hi thil ttha a si ko. Asinan nang hnak ih an theih mi a tam sawn can ahcun midang ih hmuhdan thlun khal hi thil ttha a si ve," tiah a sim.

Asinan cumi khal cu Leif cun a thlun duh cuang lo. "Ka pa, keimai' duhdan ih ka um thluh theinak ding khawvel hawl in ka vaksuak ding," tiah a sawn.

A pa cun fehsuak lo ding in a dil rero. Asinan a dil tam poh asile, Leif cun feh a tum sinsin men.

A netnak ahcun a pa in, "Na lungruhnak hin harsat retheihnak hmun ah a lo hruai ding. Asinan himi ruahnak tal hi cu cingkeng aw: Ziang na tuah khal ah, mikei hrang ahcun hna va ttuan aw hlah," tiah a cah.

Leif cu khuitawk ah a feh na zum? Mikei ih inn rori a pan cih!

Leif cun sangka a va king. Mikei cun sangka a ra ong. Mikei cu a tum zet ih, zohman ih hmuh le ton hiar um lo khop in a hmel a sia.

"In zangfah aw, ka pu," tiah Leif cun a sim. "Hnattuan ka hawl."

Mikei cun Leif ih kut pawk sinh phah in, "Tu ah maw? Lo hman theinak ding ka nei ko ding," a ti.

Mikei cun a ran-inn ah Leif cu a hruai ih, "Kei cu ran-khalh-mual ah ka me (kel) pawl ka va khal ding. Tuini cu hna na ttuan hmaisabik ding ni a si ruangah, tampi ka lo fial lo ding. Himi rannung ek pawl hi rak thenfai men aw," tiah a fial.

"Awle, lainatnak na nei zet a si hi. Na lungawiter a ol nasa, ka pu," tiah Leif in a sawn sal.

"Asinan thil pakhat a um," tiah Mikei cun a sim. "Inn sung ih pindanpawl sunglam ah rak lut hlah, na lut ahcun cumi thuhla reltu ding hringnun na nei nawn lo ding," tiah a sim bet.

Mikeipa a feh liam ciah tikah Leif cun amah le mah, "Inn sung zoh lo ding maw? Ziangah? Cumi cu ka tuah duh mi ciah a si!" a ti aw.

Cutin inn sungih pindan hmuahhmuah ah a va lut thluh. A netnak ah coka ah a va thleng. Coka ih bel thawi' rawl rak suang rero falanu a va hmu. A hmuh dah mi hmuahhmuah lak ih nunau duhnungbik a si.

"Bawi ttha!" tiah falanu cun thinphang zet in a rak auh. "Hitawk ah ziang na ra tuah?"

"Mikei ih hna ttuansak ding in kan relrem thluh ciah a si," tiah Leif in a sawn.

"Van in hitawk ihsi suak thei ding in lo bawm hram seh!" tiah falanu cun a sawn sal. "Hitawk ih hna ttuan lo ding in an lo dawnkham lo maw si?"

"Dawnkham e, asinan hitawk ka ra thlen hi ka lung a awi thotho.  Ziangahtile ra thleng lo sehla cun nangmah ka lo tong ngah lo ding pi!" tiah a sim sal.

Cumi ttongkam cun falanui' thinlung a neh. Cutin, an to tlang ih titi thunuam an rel. Leif in falanu cu a ttang ah a pom ih an titi rero, thuhla tintian an rel, ni a liam zik tiang in.

Cumi hnu ah falanu cun, "Mikei in tuini ah ziang ttuan a lo fial?" tiah a sut.

"Thil oltakte," tiah Leif in a sawn. "Ran-inn ih rannung ek pawl thenfai ding lawng si."

"A rel cun a ol men na!" tiah falanu in a sim. "Asinan rannung ek hlonnak thir-fung-ttek kha hmandan pangai ih na hman ahcun, vei khat na hlon mi ih let hra kha an rung pung sal ding sokhaw! Curuangah hitin na tuah a ttul. Thir-fung-ttek kha a linglet in kai awla, a kutkaih umnak lam thawn rannung ek kha hlon aw. Cutikah rannung ekpawl cu anmahte'n an zuang hlo thluh mei ding."

Leif cu ran-inn ah a va feh ih, thir-fung-ttek cu a la. Asinan amahte'n, "Falanui' sim mi kha cu a dik thei lo," a ti hnu ah, hmandan pangai in a hmang. Cutikah rei lo te sungah rannung ek an pung ciamco ih a hngawng tiang a thleng.

"Falanui' reldan khal kha vun tuah harsa a si hran ka zum lo," a ti sal. Cu thluh in thir-fung-ttek cu a linglet in a kai ih, a kutkaih umnak lam in rannung ek cu a hlon. Cuvete'n, rannung ek pawl cu anmahte'n an zuang hlo thluh. Ran-inn cu fai verver ih kholh mi vek ah a cang.

Inn sungih Leif a luh sal zawng ah, Mikei cu me pawl thawn an ra thleng.

"Ran-inn a fai zo maw?" tiah Mikei cun a sut.

"Fai ngah viarviar!" tiah Leif cun a sawn ih, a va hmuh.

"A thenfai dan hi nangmahtei' ruatsuak mi cu a si thei dah lo ding!" tiah Mikei cun a ti. "Ka hnen ih um Fala Cungcuangbik thawn nan be aw ngah zo maw si?" tiah a sut bet.

"Fala Cungcuangbik e?" tiah Leif in a sawn. "Cuvek cu ziangvek minung a si pei, ka pu?"

"A rei hlan ah na hmu ding," tiah Mikei in a sim.

* * *

A thaisun khal ah Mikei cu a mepawl thawn an suakvak sal zik. A feh hlan ah, "Tuini khal hnattuan olsamte pakhat ka lo fial ding. Tlang par ih ran-khalh-mual ahkhin hung kai awla ka rangcang hung hruai aw," a ti.

"Ka lungawi, ka pu. Cumi cu thil harsa a si lo ding," tiah Leif in a sawn.

"Asinan inn sung ih pindanpawl ah lut lo ding ka timi kha cingkeng ttha aw, cuti lo a si ahcun na hnuk a cat si mai," tiah Mikei cun a sim sal.

Mikeipa a feh liam tikah Leif cu coka ah a lut sal ih, Mikeipa in Fala Cungcuangbik ti ih a kawh mi nu thawn to tlang in titi thunuam an rel lala.

"Mikeipa in hitawk ih ra lo ding in a lo hringhro lo mawsi?" tiah falanu in a sut.

"Hringhro e," tiah Leif cun a sawn, "asinan nangmai'thawi' hla aw ter ding cun cumi hnak ih ttihnung sinsin in i hro a ttul lai!"

Cutin, Leif cun falanu cu a ttang ah a pom ih titi thunuam tam zet an rel rero.

Fala Cungcuangbik cun, "Tuini teh Mikei in ziang ttuan a lo fial?" tiah a sut.

"Thil har lo te a si," tiah Leif in a sawn. "Tlang par ih um, a rangcang hung hruai ding lawng si."

"Aw, si ngai. Asile ziangtin na tuah tum?" tiah Fala Cungcuangbik cun a sut. "A rak lo hual ding sokhaw. A kaa le hnar ihsin meisa an suak thei! Asinan hitin tuah aw. Sangka kiang ih rang kaa kharhnak hri thlai aw khi la awla a kiang na thlen tikah thlir aw. Cuvete'n rangcang cu zawhte ngam zet vek ah a cang ding."

Curuangah Leif cun rang kaa kharhnak hri cu a liang ah bat in tlang par ih ran-khalh-mual ah a hung so. Asinan amahte'n, "Rangcang hi a ngam hmel zet ko," ti phah in a parih to mei a tum. Asinan rangcang cun a hmuh vete'n a rak hual cih. Fala Cungcuangbik in a rak rel bang in a kaa le a hnar ihsin meisa an suak rero ngaingai.

A rak man zik ngaingai zawng ah Leif cun a liang parih rang kaa kharhnak hri cu a la ih rang hmai ahcun a thlir. A khelh fangfang. Cutikah rangcang cu a cawl ih, ngam zet ah a cang. Cutin Leif cun a kaa a kharh ngah ih ran-inn lam pan in a to tlung.

Inn a thlen rual ah a mepawl thawi' ra tlung Mikei thawn an tong aw.

* * *

"Rangcang cu na rak hruai tlung maw?" tiah Mikei in a sut.

"Him le dam te'n ka run tlun!" tiah Leif in a sim ih, a va hmuh.

"Nangmahtei' ruatsuak mi cu a si lo lawlaw ding!" tiah Mikei cun a sim. "Ka hnenih um Fala Cungcuangbik thawn nan be aw zo maw si?"

"Fala Cungcuangbik maw?" tiah Leif cun a sawn. "Mizansun khal ahkhan na rel ti aw? Ziang a si ti theih ka va hiar ve!"

"Can ttha a um tikah na hmu ding," tiah Mikei cun a sawn.

A thaizing, a mepawl thawi' a suahvah hlan ah Mikeipa in, "Tuini cu tlangmual par ah hung awla, lasipawl hnen ihsin ka lamzin an hman man ngunkhuai hung dil aw," tiah Leif a fial.

"Awle, ka pu. Ka tawlrel thei ding ti ka theifiang," tiah Leif in a sawn.

"Asinan inn ih pindanpawl lenglam lawng ah rak um thotho aw," tiah Mikei cun a sim sal. "Na rak luh ahcun ni khat dang na hmu bet ngah nawn lo ding."

Mikeipa a suahvah liam vete'n Leif cu coka ah a lut sal ih, Fala Cungcuangbik thawn an to tlang lala.

"Mikei hi fatakte hman na ttih lo maw si?" tiah falanu in a sut.

"Ttih e," tiah Leif in a sawn. "Asinan ka lo duhdawtnak hi cu a tluk thei ciah lo!"

Cutin titi thunuam an rel rero lala. Ni a liam zawng ah falanu cun Leif cu ngai kuahko in a hnam ta.

Cu thluh ah Fala Cungcuangbik cun, "Tuini teh Mikei hrangah ziang na ttuan ding?" tiah a sut.

"Thil tluangtlamte a si," tiah Leif in a sawn. "Tlangmual par ah hung kai in lasipawl ngunkhuai hung dil ding lawng si."

"Ziangtin tuah ding ti na theih ahcun a tluangtlam ngai ko!" tiah Fala Cungcuangbik cun a sim. "A lo simtu ding ka um ih na van a ttha! Phar hngohsan ih tun mi talhtum khi la awla tlangmual khi hung vaw aw. Lungto a ong aw ding ih, lasi in ziangzat na duh ti a ra lo sut ding. Cutikah, 'Ka thiar thei tawk' ti ih sim ding kha hngilh hrimhrim hlah."

Cutin, Leif cun talhtum cu ala ih tlangmual ah hung kai in, talhtum thawn a hung vua. Cutikah lungto tumpi kha sangka vekin a ra ong aw ih, lasi pakhat a ra suak. Lungto ong ihsi cun Leif cun sui, ngun le lungmankhung pen khawm liailiai mi tamngaipi a vun hmu.

"Mikeipai' lamzin nan hman man ngunkhuai la ding in ka ra," tiah Leif in a sim.

"Ziangzat na duh?" tiah lasi cun a sut.

Leif cun a hleifuan in dil sehla, amai' hrang khal ah ret ve sehla a ttha ding tiah a ruat. Curuangah, "In pek thei zat in," tiah a sawn.

Cumi a rel vete'n sui, ngun le lungmankhung pawl cu tlangmual ihsin an rung luang huho ih a kiang ah an rung finkhawm aw. Rei lo te ah an khuh pil zik man. An rung luang huho rero lai fawn.

"Ka thinlung ka thleng sal!" tiah Leif cu a au. "Ka thiar thei tawk in si sawn seh!"

Hlawnthilpawl cu tlangmual sungah an lut kir sal ih, lasi cun dip pakhat ih thun mi hlawnthil a rak pe.

Inn a thlen tik ah Mikeipa a va tong. "Ka ngunkhuai cu na rak khong zo maw?" tiah Mikeipa in a sut.

"Khong ngah zo," tiah Leif in a sawn ih, dip cu a phelh tikah sui, ngun le lungmankhung pawl an rung bung huho.

"Nangmahte ruahsuah mi cu a si lo lawlaw," tiah Mikeipa cu a ttong lala. "Ka hnenih um Fala Cungcuangbik thawn nan be aw ngah zo a si hi!"

"Fala Cungcuangbik maw?" tiah Leif cun a sawn. "Tu hi vei thum na relnak a si thlang, ka pu. Keimah rori ih hmuh ka va hiar ve aw!"

"A rei nawn lo ding,' tiah Mikei cun a sawn sal.

* * *

A thaizing ah Mikeipa cun Leif cu Fala Cungcuangbik hnenah a hruai. Cu thluh in, "A sa can awla suang aw. A sa a hmin tikah i tthang aw," tiah a fial. Cu thluh in tohkham sau ah a it ih a hngawk hluahhlo.

Fala Cungcuangbik cun phar ih thlai mi sa cannak nam a la.

"I that hlah aw!" tiah Leif in a dil.

"Aa aw hlah!" tiah falanu in a sawn.

A mehtok zim ah fatakte'n a at pem ih ke-thum nei tohkham parah a thisen for thum a forter. Cu thluh in hnipuan sia pawl le kedam tawdam sia pawl a la ih a suang. Coka ih um cia mi kawpi, zinghnam thi cia pahnih, le rannung ek a awmtawk tthenkhat khal a rawi.

Cu thluh in thing ih tuah mi thaithih pakhat, ci hlangh tlang khat, le tidai thawl khat a la.

"Zamrang!" tiah Leif cu a sim. "Kan tlan thei lai ah tlan lohli kung!"

"Kan zamran a ttul taktak maw si?" tiah Leif in a sawn.

Asinan Fala Cungcuangbik cun sangka lam ah a tul ih, ran-inn ah a fehpi. Rang-kung pahnih an la ih rangnu pahnih parah ret in a cak thei patawp in an tlan cih.

Culai ah Mikeipa cu a ihthahnak ihsin a hung tthang. "A hmin zo maw?" tiah Mikeipa cun a hun sut. Asinan a mit cu a meng hrih lo.

"Savun tluk in a hak lai!" tiah thisen for hmaisabik cun Fala Cungcuangbik ih aw in a rak sawn. Curuangah Mikeipa cu a itthat sal.

Malte a rei tikah Mikeipa cu a hung tthang lala ih, "Na suang ttheh zo maw?" tiah a hun sut.

"A hak deuh lai," tiah thisen for hnihnak cun a rak sawn. Curuangah Mikeipa cu a itthat lala.

A netnak ah Mikeipa cu a tthang lala ih, "A hmin ngah hrih lo mawsi?" tiah a hun sut lala.

"A hmin zo, a thawt laifang a si!" tiah thisen for thumnak in a rak sawn.

Mikeipa cu thohmu phang pi thawn a hung tho ih, bel umnak ah a feh. Thing ih tuah mi buhtlei thawn rawlhmeh cu a vun suak ih a kaa khatpi'n a mom. A kaa sung a thlen vete'n a phui darh thluh sal.

"Miluket nu te!" tiah a au. A mit khal a hung kau pulpo. "Tlangvalpa thawn an tlan a si tengteng ding!"

Mikeipa cu ran-inn ah a va tlan cih ih a rangcang a va phelh. Cu thluh in phusing tluk ih rang in rang thawn a dawi hai. A rang ih cun meisa a thaw suak vivo.

Rei lo te ah Leif in dunglam a hei zoh tikah, Mikeipa in a rak dawi kha a hmu. "Kan cem a si hi!" tiah a raak.

Asinan Fala Cungcuangbik cun thing-thaithih a hlon thla ih hitin a au:

""Thaithih hramlak, ka nunnak thlawsuah hram.

Thingkung ah cang in Mikeipa kham hram."

Cuvete'n thing-thaithih cu hramlak thingkung pit zet ah a cang ih Mikeipa cu a rak kham.

Mikeipa cun, "Himi cinfeldan cu ka thei silawm," tiah a hei auh hai.

"Hramlak Tthialtu, a nunnak camsiat hram.

Hramlak tthial in, Mikeipa bawm hram."

Cutikah khuitawk in simaw Hramlak Tthialtu a hung suak ih thingkungpawl cu a ei. Curuangah Mikeipai' rang hrangah fehnak lamzin a hung ong sal.

Leif cun dunglam a zoh tikah Mikeipa a hmu lala. "Kan hlovai thlang a si hi!" tiah a raak. Asinan Fala Cungcuangbik cun a dunglam ah ci tlang khat cu a phulh darh.

"Ci hlangh tlang khat, ka nunnak thlawsuah hram.

Tlangmual ah cang in, Mikeipa kham hram."

Cuvete'n ci cu tlangmual hraap zet ah a cang ih, Mikeipa cu a feh thei nawn lo. Asinan, "Himi cinfeldan khal ka thei thotho!" a ti ve.

"Tlangmual Ttamtu, a nunnak camsiat hram.

Tlangmual ttam in Mikeipa bawm hram."

Tlangmual Ttamtu a hung suak ih tlangmual ahcun a pop pakhat um ding in a ttam. Cutin Mikeipa cu a feh thei lala.

Cumi lai ah Leif le Fala Cungcuangbik cu tipithuanthum an va thleng. Tipi kap ahcun hridai ih ttawn mi tangphawlong pakhat an hmu. Rangpawl an tan ta, long cu an tul ih, a khatlam ral pan in an feh.

Tipithuanthum laifang an thlen tikah Mikeipa cu tipithuanthum umnak a ra thleng. "Himi khal hi ka cingfel thei thotho," a ti lala.

"Tidai Dawktu, a nunnak camsiat hram.

Tidai dawk in, Mikeipa bawm hram."

Cutikah Tidai Dawktu a hung suak ih tipithuanthum cu a dawk thok. A rei thlan ah long hnuailam in leilung a dai thlang.

"Kan cemnetnak a si hi!" tiah Leif cu a raak. Asinan Fala Cungcuangbik cun a tithawl a vun la.

"Tidai for khat, ka nunnak thlawsuah hram.

Tipithuanthum silhkhat awla, Mikeipa kham hram."

Long lenglam ah tidai for khat a vun thlerh. Cumi for khat cun tipithuanthum cu a silhkhah thluh.

"Dawk thluh aw! Dawk thluh aw!" tiah Mikeipa cu a rak au. Asinan Tidai Dawktu cun tidai for khat dang cu a in bet thei nawn lo. Cutin Leif le Fala Cungcuangbik cu a khatlam tipi kap ah himdamte'n an va thelng.

***

Leif le Fala Cungcuangbik cu rei lo te ah Leif tei' inn an va thleng. A rei hlan ah tthitumnak puai an tuah. Tthitumnak ni ah rawngbawltu in Fala Cungcuangbik hnenih, "Na pasal hi na duhdawt in, na ttihzah in, a thu na thlun pei maw?" timi a sut tikah Leif in, "Khami cu ngai thupi duh hlah! Amai' thu ka ka thlun hi a tthabik sawn," tiah a rak sim.

Cuvek in a thu khal a thlun taktak fawn. Curuangah si, lungawi aipuang ih an nun tlang lanta.

Hram: Master Maid, A Tale of Norway, told by Aaron Sephard