Thaithawh ih Siangpahrangpawl Eitu
(Hindu Thuanthu Roling)
Vei khat lai ahhin India ram ah siangpahrang
tirhsiang pahnih an rak um. Asinan pakhat cu a dang pakhat hnak in a tirh a
siang deuh.
A hmaisatu cu Siangpahrang Karna a si. Zingpit
tinte'n mi rethei pawl hnenah sui pound (pawng) za khat a pe ringring. Cumi a
tuah hlan sung cu zianghman ei lo ding in sia a sam. Asinan cutluk ih a tam mi
sui pawl khuitawk ihsin a ngah timi cu zohman ih theihsuah thei lo mi, thil
mangbangza a si.
A pahnihnak cu Siangpahrang Vikram a si. Vikram
cu mi thinlung ttha tuk a si ruangah, zovek minung khal in thil an dil tikah a
pe ringring. Lungmankhung, rang tivek le siangpahrang innpi tiang in a pe
siang. Ziangtik can khal ah bomnak dil theih a si ringring fawn. Vikram ih
hminthannak cu hmun hlapi tiang in a darh ih, rannungpawl hman in an ngaina, an
duh mi an dil ttheu.
Ni khat cu siangpahrang inn ih hmuan sungah
Vikram a veivah lai ah a ke hram ah vur vek ih a var mi rampai hngawng-sau
pahnih an rung ttum.
"Siangpahrang ttha Vikram, kan ril a rawng
zet! Rawl in do hram aw!" tiah zangfah an dil.
"Ngah tuk e. Thlaici ka rak lo kuat cih ding
aw," tiah Vikram in a sawn.
Rampai hngawng-au pawl cun, "Kannih cu
thlaici kan ei thei lo. Saklam tlangmual sangpi ih um mi Tili thianghlim ihsi a
ra mi ka si. Cutawk ahcun tikeplung tharhlam pawl lawng kan ei," tiah an
sim.
"Tikeplung maw, a ngah thotho," tiah
Vikram in a sawn sal. A tikeplung tthabik pawl kho khat in a va la ih, amah
rori in rawl a pe hai.
Zing tinte'n Vikram cun rampai hngawng-sau pawl
cu rawl a pe ttheu. Asinan zing khat cu rampai hngawng-sau pacang in tikeplung
beuh (tteuh) pakhat a um kha a hmu.
"Zoh hnik! Himi tikeplungpawl hi an tharhlam
lo a si hi!" tiah rampai hngawng-sau pinu cu a sim.
Rampai hngawng-sau pinu cun, "Siangpahrang
Vikram rori hman in kumkhua cun in cawm thei lo. Hmun pakhatkhat ah zuang
uhsi," a ti.
Vikram in a dawnkham man hlan ah rampai
hngawng-sau pahnih cu thli lakah an zuang. Asinan tlunvan ih an zuan phah ah,
"Kan lungawi, Vikram parah kan lungaw, siangpahrang hmuahhmuah lakih
tirhsiangbik!" tiah an au.
Rampai hngawng-sau pahnih cu Vikram thangtthatnak
hla sak phah in an zuang vivo. An zuan vivo tikah Siangpahrang Karna ih innpi
tlun an thleng.
Siangpahrang Karna in an hla a theih tikah,
"Ziangruangah vatepawl tiangtiang in Vikram an thangtthat? Taktak ahcun
kei hnak in a tirh a siang cuang lo pi!" a ti. Curuangah a ramtawih thiam
pawl a thlah ih, rampai hngawng-sau pawl an ttumnak ah thang a va kamter.
Rampai hngawng-sau pahnih cu kharh-bawm sung ah
ret in Siangpahrang Karna hnenah an ratpi.
Cutikah Karna cun, "Vikram cu siangpahrang hmuahhmuah lakih
tirhsiang bik a si tiah ziangruangah nan rel?" tiah a sut hai.
Rampai hngawng-sau pacang in, "Amai' kut
rori in tikeplung in barh," tiah a sawn.
"Asinan kei khal in ni tinte'n sui pound za
khat ka zemdarh ringring a si si! Vikram tluk in ka tirh a siang ko lo
maw?" tiah a sut.
Rampai hngawng-sau pinu in, "Siangpahrang
Vikram cun sualnak nei lo cu thawng a thla dah lo ding," tiah a let.
Siangpahrang Karna cun a kut khat in tikeplung a
la ih kharh-bawm sungah a kut vun hruah a tum. Asinan rampai hngawng-sau pinu
cun a kut a rak tul pet ih, tukvirh ihsin a zuang suak.
Zamrangte'n Vikram hnenah a zuang kir sal ih, a
thaw sam helhel in a ke hram ah a va ttum. "Siangpahrang ttha Vikram, in
bawm tengteng a ttul! Ka pasal thawng a tla!" tiah a sim.
A sim mi cu Vikram in a rak ngai. Cu thluh in,
"Hnangamte'n cawl aw, ka rual. Na pasal cu keimah ka va run ding,"
tiah a sim.
Cutin Vikram cu hnipuan siava pawl hruh in mi
rethei vek in a um aw ter ih Siangpahrang Karna hnenah a va feh.
"Siangpahrang Bawipa, na siahhlawh i
ttuanter hram aw. Nangmah hi siangpahrang hmuahhmuah lakih tirhsiangbik na si
thu ka rak thei," tiah a va dil.
"A dik. Thaizing ihsin ka zemdarh ding mi
sui pawl na thiar bawm thei," tiah Karna cun uang aw nawn in a rak sawn.
A thaizing ah Vikram cun siangpahrang innpi
kailawn ih sui tangka thiar a bawm. Siangpahrang in thaithawh ei hlan ih sui a
zemdarh thluh lai cu a rak zoh ringring.
Cutikah amahte'n, "Karna hi siangpahrang
tirhsiang a si taktak a si hi. Asinan ziangtin sui hi zatzat hi a ngah
thei?" tiah a ttong. Curuangah siangpahrang cu ralringtei' thlingthla
ringring ding in a ruatcat.
A thaizing khua a van hlan ah siangpahrang inn
ihsi Karna a suah thup kha Vikram in a hmu. Karna cu tlangmual zin zawh in
zamrangte'n a feh ih, amahte a um mi deuthlam pakhat ah a va feh. Vikram cun a
thupte'n a thlun vivo.
Vikram cun deuthlam tukverh ihsin a rak bih.
Siangpahrang Karna cu ruh le vun lawng tang khop ih ttawl ttiangttiang, mit
kaai (mit kalh) sakhawmi (hermit) in a rak hmuak. Meisa alh puak tthukttho
parah thirbeel tumpi pakhat a um fawn.
Karna cu a thuamhnaw a hlit lohli ih thirbeel sungah
a lut cih! Siti in a kiau curco, a awn surso ih sui rong ah cang in a rum-moih
zet mi hmehkiau ah a cang. Cu thluh in lunghmui tuk ruangih hrum hngurhngo le
ai ngurngo phah in, sakhawmi cun a ttam ruapro, a tthial rupro ih, a mom cem
thluh.
Sakhawmi cun a ei thluh tikah, ruhpawl cu zial
parah a ret khawm. Ruhpawl tluan ahcun a kut vai phah in,
"Ruh cu an ttha ko nan, titsa a tthabik.
Ka pum in rawl a rial sungah nunnak pe aw!"
tiah a samh.
Cutikah Siangpahrang Karna cu tuahmawhawknak
zianghman um riai lo in a hung nung sal!
Sakhawmi cun, "Ka lungawi tuk. Rawl thaw zet
na si ringring a si hi. Tu ahcun keimai' ttuanvo lam ka vun ttuan thlang
ding," a ti.
Sakhawmi cun lingkin (thil thlainak) ih thlai mi
korfual ttet hniaphniap pakhat a la ih, a zalpawl a thing. Cutikah sui tangka
pound za khat cu dawi korfual ihsin zial parah an rung bung huho.
Siangpahrang Karna cun, "Ka lungawi! Tu
ahcun thaithawh ka ei theinak ding ah ka siatcamnak ka va hlawhtlinter tengteng
a ttul!" a ti. Sui cu a sar hai ih, tlangmual hnuailam ah a ttum thok.
Vikram cun dimte'n, "Tu ahcun ka hmu zo!
Rampai hngawng-sau runsuah dan ding ka thei thlang!" a ti.
A thaizing cu Siangpahrang Karna ih thawh hlan ah
a tho. Siangpahrang inn ih coka ah a va lut ih a taksa parah rawl thawtertu le
rim hmuitertu phunphun a va culh aw. Cu thluh in sakhawmi ih deuthlam ah
zamrangte'n a va feh.
Sakhawmi cun a naite ngaingai lawng hmu thei a si
ruangah, le a ril a rawn tuk ruangah Siangpahrang Karna a si lo ti a rak
theithiam lo. "Siangpahrangpa, tuini cu na va zing ve!" ti phah in
Vikram cu a rak hmuak.
Vikram cun a hnipuan a phelh ih, thirbeel sungah
a lut. Siti in a kiau curco, a awn surso ih sui rong ah cang in a rum-moih zet
mi hmehkiau ah a cang.
Sakhawmi cun rawlhmeh rimhmui a hip ngah tikah,
"Cui rimhmui mangbangza cu ziangmi si? Siangpahrangpa hi hi tluk in a rim
a hmui thaw dah lo!" a ti.
Lunghmuinak sangbik ruangih hrum hngurhngo le ai
ngurngo phah in Vikram cu a ttam ruapro, a tthial rupro ih a mom thluh. Cu
thluh in ruhpawl cu zial ah a ret khawm, ruhpawl tlun ih a kut vai phah in,
dawi ttongfangpawl a samh.
"Ruh cu an ttha ko nan, titsa a tthabik.
Ka pum in rawl a rial sungah nunnak pe aw!"
Vikram cun a mit a hun meng ih, a thawpi a suah
hlunhlo.
Vikram kha Siangpahrang Karna ih ruat ringring
laitu sakhawmi cun, "Ka, ka, Siangpahrangpa, tui zing hi ziangruangah na
thaw tuk cuang?" tiah a sut.
Vikram cun rawlhmeh tuahthawtnak rimhmui pawl
thuhla a sim. Cu thluh in, "Ka duh mi i pek ahcun, zing tinte'n hmeh thaw
zet ah ka ra tuah aw ringring ding," a ti.
"Ziang khal i dil aw! Ziangmi khal!"
tiah sakhawmi cun a sawn lohli.
Vikram cun, "Zing tintei' tlangmual suk ih
sui pound za khat thiar ringring hi ka ning thlang. Curuangah dawi korfual kha
i pe awla, siangpahranginn ah ka ret ding ih, cutawk ah ka rak thing ttheu
ding," a ti.
"Ka lungkim!" ti phah in sakhawmi cun
dawi korfual cu a pe.
Vikram cu deuthlam lenglam ah a suak. Asinan
tukvirh lenglam ah a relh. A rei hlan ah Siangpahrang Karna a ra thleng.
Ziangvek thil a rak thleng ti a hmuh tikah sakhawmi cu a kawk ciamco.
"Ziangtin korfual na rak pe thei?"
"Nangmah ah ka lo ruat si lawm!" tiah
sakhawmi cun a auh ve.
"Thil theithiam deuh ding na si nan!"
tiah siangpahrang cun a hrawk ve.
"Na dik! Nang tla cu kha tluk in na thaw
thei dah lo, mecang tar pa!" tiah sakhawmi cun a hro ve.
Siangpahrang Karna cu thinheng zet in tlangmual
ihsin a ttum suk.
Cumi zingpit ahcun siangpahrang inn kailawn ih
thiar ding sui pound za khat a um nawn lo. Siangpahrang Karna khal in sia a sam
vek in zianghman a ei lo. A ihkhun ah sunvu a it ih, a ril a rawng deuhdeuh, a
rawng luar sinsin.
A netnak ah Vikram cu siangpahrang ih ihkhun
kiang ah a va feh. "Rualpa, rawl na ulh a ttul nawn lo ding," a ti.
Sakhawmi ih korfual cu a thing. Zial parih sui
tangka an rung bung huho tikah Siangpahrang Karna cu lungawi aipuang in a au.
Cu thluh in Vikram cun Karna cu a thuhla a sim.
"Rampai hngawng-sau na thlah zalen ih, sakhawmi ih ei ding ah rawlhmeh
thaw zet ih na tuahawk ding ahcun, lungawi zet in korfual hi ka lo pe
ding," a ti.
Siangpahrang cun a lu a su. "Rampai
hngawng-sau pawl hi an rak dik. Kei cu mi ttulsam pawl bawm ding ah a keu ih
keu ding tiang lawng in ka tirh a siang. Nang cu rampai hngawng-sau pacang
pakhat men hrangah a pumhlum ih mom tuar tiang in na tirh a siang," a ti.
An pahnih in rampai hngawng-sau retnak kharh-bawm
ah an feh ih, Siangpahrang Karna in sangka a ong.
Rampai hngawng-sau cu a leng ah a zuang suak.
Tukvirh ihsin siangpahrang innpi tlun ah a zuang zo ih, thli lakah a nupi thawn
an tong aw. Cu thluh in anmai' inn lam pan ih zuang phah in, "Kan lungawi,
siangpahrang hmuahhmuak lak ih tirhsiangbik Vikram, kan lung a awi!" tiah
an au.
No comments:
Post a Comment