Himdam le Khimkhuahte'n Aw
Jack cun a mawttaw nuamnai deuh ih a fehter hlan ah peng-khul-bawm (speedometer) a zohta. Nazi pakhat ah peng 55 tiang lawng ih fehnak ding hmun ah peng 73 khul in a feh hi a rak si. Tu hi hitawk hmun ah kaih a ton vei linak a si. Hivek lam ih lar khal a phu thlang lo sawm?
A mawttaw cu nazi pakhat ih peng hra khul tiang a muanter hnu ah zin sir ah a ding. Asinan zin sir tuk ah si lo in zin ngai ah malte a umter hrim. Mawttaw sawhhnong aw a um phang in lamzin palik cu buai seh a ti men. Asilole, mawttaw dang in a mawttaw dunglam sir cu an mawttaw thlalang thawn an hnawt sual pang mai thei ih, an buai a si mai.
Palik cu a mawttaw ihsin a hung suak ve. A kut ah caphek tumpi a keng. Eheu! Bob a si lo sawm? An kawhhhran ih Bob? Jack cu a kortlunthuah sungah a pil sinsin. Cui' thil cu cawhkuannak ticket hnakih thil bese sawn a si. Khristian palik in anmai' kawhhran minung cu lamzin dan pahbal ruangah a kai ding a si cu! A kaih ding mi asile, zung ah hnattuan tam ruangih a um siim deuh ruangah inn thlen lohli duh ih hamttamnak malte vun nei mi a si fawn. Thaisun ih golf lek tlang ding kha tuisun ah an kai aw zik a si bik. Jack cu a mawttaw ihsin a suak. Zarhpini tinte'n a hmuh ringring mi si hmansehla, palik thuam thawi' a rak hmuh dah lo mi Bob cu a va pan.
"Hi, Bob. Hitivek ih lo ton cu hnih lamlam a suak si si maw a."
"Hello, Jack." A hni ve lo.
Ka nupi fanau pawl ton ding manhlap ruangah bikhiah ka pahbal pang mi na rak hmu ngah a va si hmel ve."
"Aw, a si hmang hi."
Bob cun a theihfiang hmel ciah lo. A ttha e.
"Zung lam ah ka ttulbuai tuk ih ka tlun siim phah. Mallai hrawng dan ka pahbal tla a rak si pang thei, asinan tui' ttum lawng hi a si ding."
Jack cun minung fehnak zin parih lungte pakhat cu a kezung thawn a tokthai phah.
"Ka innsangnu in tuizan hrangih a tuah mi sa rawh le aalu thuhla mallai i sim. Ka rel duh mi cu na theih ka zum?"
"Na rel duh mi ka theithiam. Cun, hitawk sehvel ahhin hminlarnak na nei ti khal ka thei."
Cereheu! Thil fehnak zawn a tluang lo tum. Kalhmang thleng a cu.
"Ziangtluk cak ih ka feh lai na rak hmu ngah?"
"Sawmsarih-pakhat. Na mawttaw sungah na va to sal thei pei maw, zangfahte'n?"
"Si lo. Malte'n um lawk aw, Bob. Ka lo hmuh vete'n ka zoh cih ve. Sawmruk-panga ka tok nerno fang si lawm." Kaih a ton tam vivo rual in thuphan rel khal a harsat lo sinsin.
"Zangfahte'n, Jack, mawttaw sungah lut aw."
Umdan tthelh buai zet in, Jack cu a ong aw lai mi a mawttaw sangka ihsin a sungah a vung lut. A mawttaw sangka khar bupbi phah in, a hmaizawn ih peng-khul-bawm cu a zoh cuahco. A mawttaw tukvirh khal a ong lohli lo. Minute mallai a liam. Bob cu a caphek parah zamrangte'n ca a ngan zuatzo. Ziangruangah mawttaw khalh license a dil lo si pei? Ziangruang a va si khalle, Zarhpini khawmawknak biakinn sungah himi palik kiangih Jack a to lehsalnak ding cu thla tampi a liam ding a si phot mai.
Mawttaw sangka king awn a theih tikah kehlam a zoh. Bob a rak um ih, a kut ah bil mi cahnah a keng. Jack cun cahnah run thun lut theinak ding fangfang in, a mawttaw tukvirh thlalang cu zungpibok pahnih lawng a herhthla.
"Lungawi." Aw awphawi ih deusiahnak um mi cu a sup thei hran lo.
Bob cu zianghman ttong lo in a mawttaw ah a kir. Dunglam ih a mawttaw a kirter lawk lai cu thlalang ihsin Jack cun a rak zoh. Cu thluh ah cahnah bil cu a pharh. Tui ttum teh ziangzat liamkuan ttul tak kei maw?
Um hrih hnik. Hihi ziang a si? Hnihsuakza a si lo maw? Cawhkuannak ticket a si ual lo. Jack cun a siar thok:
Duhdawt mi Jack,
Vei khat lai ah fanu te ka rak nei. Mawttaw ih a pah that lai ah kum ruk lawng a si. Na theithiam mai ko ding – cak tuk ih mawttaw khaltu ruangah a si. Cawh a kuan ih thla thum sung thawnginn ah a um. Cu thluh ah mi zalen ah a hung cang ih, a fanu pawl cu zalen zet in a pom thei hai. A fanu an pathum rori in a pom thei. Kei cun pakhat te lawng ka nei cing in, ka pom thei salnak ding ahcun vancungram thlen tiang ih ka hngak a ttul. Cu pa ngaidam ding hin vei thawng sawm siar ka zuam. Vei thawng sawm siar ka ngaidam zo in ka ruat fawn. Ka ngaidam taktak tla a si thei, asinan tu khal ah ka ngaidam thei sal a ttul. Tu rori khal ah hin a ttul. Thla in cam sak aw. Cun, ralringte'n na mawttaw kha khal hram aw. Ka hrangih a tang mi umsun cu ka fapa te lawng a si thlang.
Bob"
Jack cu a her aw vukvi ih Bob ih umnak lam a zoh tikah, Bob in a mawttaw cu lamzin ah a kaiter ih a fehsuak lai a hmu man. A feh liam tiang in Jack cun a cuan. Minute 15 a rei hnu ah Jack khal in a mawttaw cu lamzin parah a lutter sal ih nuamnaite'n inn lam ah a tlung. A tlun phah ah ngaidam dil in thla a cam ih, inn a thlen tikah a nupi fanau pawl cu an mangbang ding khop in a va pom ciamco.
Zangfahte'n, himdam le khimkhuahte'n na mawttaw kha khal hram aw.
Hram: Theih lo mi cangantu ih "Drive Safely and Carefully."
No comments:
Post a Comment